Pahadar 78 thun Harei Thuong binh – Liet si, tinh Lam Dong hu padang dom kapul urang jakar nao ravang, alin hadiah jaik 16.000 paok pandap ka baoh sang mbang tui sarak, urang daong katmang meng kal dalam tinh, hu taong abih jien labaih 10 ty 600 trieu dong. Tui ong Y Thanh Hà Niê Kđăm, Uy vien Trung uong Ndang, Bi thu Tinh uy, Akaok kapul Lambaok vakil Quoc hoi tinh Lam Dong, gam haong grauk abih dalam taneh ia, Lam Dong tuk halei jeng sangka ka rahra hu daong bruk taneh ia lac bruk ngak chinh tri, lac adat saong hatai anit ranam praong glaong. Kayua nan, tinh hu peih ngak rilo sarak lagaih daong raidiuk saong dom bruk lagaih karei ka baoh sang mbang tui sarak, urang hu daong bruk kat mang meng kal.

Jeng dalam bingun ini, Bol lin Bien phong tinh Tay Ninh padang rilo kapol nyaom nao cuh gilau, pok bingu kakuk hadar dhar phol dom anh hung liet si di dom kubo kanum saong labik inem mek sajarah dakrai di jalan taphia negar Tay Nam. Di Labik  kubo kanum liet si Đồi 82 saong Labik inem mek sajarah dakrai Ban An ninh Trung uong Cục mien Nam, kapol urang jakar hu mai kakuk pok binguk, cuh gilau pahadar dom anh hung liet si. Dom bruk pahadar jeng hu peih ngak di dom Don Bien phong rah tui jalan tapen negar yau Xa Mát, Chàng Riệc, Tân Phú, Lò Gò...

HĐ Bhap bini Ban raya Ho Chi Minh hu brei tapa sarak tah angan bahrau ka 60 jalan saong pasiam 7 jalan karei. Mbang salih ini piah ngak ka njauk angan jalan, plaih bruk dreih yau gauk hadei tuk pagam phuong. Urang pan akaok ban raya brei thau, taong abih bruk salih ini piah brei kein lagaih ka rahra, tuai damuai dalam bruk brei mboh labik, gam haong nan duh siam lagaih ka bruk pasang iek karja.

Sang iek ruak Ung buou Ban raya Can Tho birau ngak salah blaoh saong ba tame ngak bruk Don vi tacei pato di truyen ung thu akaok meti di Bhum taneran kraong Cuu Long, taong yaom bruk ngak hu makna praong dalam iek glang urang ruak ung thu tui y hoc lagaih di rup pabhap yaok urang. TS. BS Võ Văn Kha, Yam ndoc sang iek ruak Ung buou Ban Can Tho khan lac, ini lac bruk ngak hu siam dalam bruk pambuak khang kajap di sang iek ruak saong Kong ty TNHH AstraZeneca Viet Nam. Bilan 11 anak tal, sang iek ruak pambuak haong urang ilamo naih joi gah peih bruk pato pasram  ka di truyen di bhum taneh.

Dom bruk ngak tabiak meng hareik katak yau robot ramik hareik dalam ia, mac in 3D ngak meng hareik katak, khan ao karo kajap…mbang akaok meti hu ba tabiak saong yaih khan di Nyaom ndem bao nao mai ngan haong kadha Salih jeng Hacih sa-at saong Harei pasiam harei 2025 di Ban raya Ho Chi Minh di harei 31/7 anak tal. Bruk ini hu peih ngak di Hoi truong Thống Nhất, Ban raya Ho Chi Minh, pataom jaik 500 urang lambaok vakil meng dom mentri, dom gah, trung uong, karja palei, gah ngak mbang pablei salih, kapul dunya, sang bac dai hoc saong dom urang peih mbang ngui hadah krah ka alam langik.

Dom urang thiet ke di Muyim Madame Tussauds, di London, Anh harei kabroi brei tabiak 13 rup thaik birau ngak meng ralin ka urang kumei daoh negar Mỹ Taylor Swift hadei mbang nao daoh dom taneh ia angaok dunya di anai ini thun dahlau. Piah ngak salah rup thaik thaok binguk nan, labaih 40 urang nghe si abih 14 bilan. Yaok rup thaik hu mbeik dalam khan ao ngui cuh bo kumei daoh  ini cuh dalam dom mbang tagok daoh dalam tuk parang iek. Dom rup thaik ini hu parang iek di rilo labik karei di gauk angaok dunya.

      Ozzy Osbourne - "Cei Putra sup malam” saong urang paneh tabiak janih ragu Heavy metal, plang lahik di umo 76 thun. Dom adit dahlau, ong bahrau taom gaok dom adei sa-ai dalam kapul ma-in ragu Black Sabbath dalam var ma-in ragu piah likau drei di gauk, di bhum palei Birmingham negar Anh. Ozzy Osbourne lac sa dalam dom urang danei angan dalam janih ragu Rock, urang nghe si hu rilo bruk ngak katuak, urang ngak kadha gaok mai ka ka urang vil di nan mboh glaih glan, saong jaik ini lac urang danei angan di angaok papar binguk hu anit ranam.

          Mariah Carey, dalam angan lac “Urang kumei patao alat ragam Noel”, sa mbang tra ngak ka dunya caik hatai haong danak dak alat ragam birau anih di drei, brei thau sa kadha daoh bilan He chreih chrai angan Sugar Sweet. Umo thun 56, urang kumei daoh Mariah Carey patui veik brei mboh  anai ini oh kan kandah hagait ka tukvak atau umo thun. Dalam gah kong nghiep alat ragam daoh bhian takre dom urang radaih umo, Mariah daok khik hu labik dang di drei kayua naih joi jang urang karei saong thau ngak birau rup eng. Anai lac urang pachreih hatai rilo nghe si./.