Bol lin sak ka sa angan Chau Đết, Kapul 93, Mintri pan akaok Pato tacei bol lin tinh An Giang bahrau mai meng Campuchia. Ini lac mbang akaok meti sa-ai hu mbaok tame Bruk duah, pataom atau talang bol lin meng kal dahlau; sa bruk biak naih gheih, brei mboh adat “menyum ia hadar tal halau”, “thau phol thau dhar”, pahadar tal dom urang hu klak rup drei ka bruk katmang. Bol lin sak ka sa Chau Đết brei thau:

“Ini lac mbang akaok meti adei hu mbaok tame bruk duah atau talang bol lin meng kal, bruk ini oh njauk lac njuel njac gam saong drei kayua drei hu mbaok tame mbang akaok. Mbang akaok meti duah hu atau talang dom cei adei biak bui sambai, chreh chrai, ngak jang oh mboh glaih. Adei caong lac duah hu rilo veik atau talang di dom cei va piah ba mai negar drei”.

Kapul bol lin taka 90, Kuk Politik Quan khu 9, hu jao bruk duah, pataom, ba mai ka negar dom atau talang bol lin meng kal dahlau di dua tinh Kandal saong Kampong Chhnang, nagar Campuchia, labik ngak bruk praong, nan gaok oh takik kan kandah, rilo meng lac dalam bruk duah thau, duah khau tin kubo bol lin meng kal dahlau. Piah ngak siam bruk hu jao, labik bhian pambuak bruk saong dom jabat karja di dom bhum palei, dil samu pathau khan tuk hu bruk duah mboh bahrau; piah meng di nan labik peih ngak padang harak cih jalan piah duah, pataom atau talang bol lin meng kal. Thuong ta Lê Phước Em, Urang ngak Chinh tri daok di kapul K90, Kuk Chinh tri Quan khu 9 brei thau.

“Mesuh metak rah tabiak suai paje, dom cei klak rup drei tal ini jeng labaih 50 thun; Negar Campuchia pandiak hajan oh yau bhian, pandiak ye biak catang; bruk mbang daok di bol lin ye biak kan kandah; oh karei hagait Kapul K90 bo dom kapul K di dom tinh jeng biak kan … Jalan ngak bruk di nagar Campuchia, yaom lac kan daman yau nan, min urang jakar, bol lin khol dahlak hulin, meng hatai kham merat, pasiam dom kan kandah gam haong kapul urang kham merat duah atau talang dom bol lin meng kal khik kajap bruk karo salamat saong ba dom cei, dom sa-ai gilac mai taneh riya bhum palei amaik siam mekre, tani tanat”.

Gam tui hatai thau ka bruk di drei saong kham merat glaong abih, dalam tukvak bilan khon 2024 – 2025, dom Kapul daok dalam kapul bol lin pan phao karaong Quan khu 9 hu ngak siam bruk pathau khan, pato pakai, paglaong ilamo thau ka bruk ngak saong dhar phol rilo, bruk duah, pataom atau talang di bol lin meng kal dahlau hu ngak njauk tukvak; truh tapa dom kan kandah, tavak tavaiy, peih bruk duah thau, roh cakac duah, pataom hu 234 atau talang bol lin meng kal dahlau (oh ka thau hu tantu angan 5 urang bol lin dahlau). Dalam nan, di angaok taneh nagar Campuchia hu 122 atau talang, di labik dom tinh dalam negar hu 112 atau talang bol lin meng kal dahlau.

Tui jalan angan “Daok hu khau tin ka bol lin meng kal, kubo bol lin ye daok peih bruk duah, pataom”, urak ini, dom labik, bhum palei di dalam labik Quan khu 9 hu ngak saong daok buh tabiak tukvak; yaok thun jeng cih tabiak jalan ngak, peih bruk dua, pataom atau talang bol lin meng kan tani tanat; peih bruk kan brei thau, pathau khan, jak ba dom kapul, menuac urang pabak khau tin ka bol lin meng kal, kubo bol lin; pasang duah, ngak ka tantu, pabak khau tin ka dom bruk kubo bol lin oh ka hu pataom hadei tuk thau ka labik, ngak tabiak ban do piah duah, pataom atau talang bol lin… Thieu tuong Huỳnh Văn Ngon, Phaok Chinh uy, Akaok mbang Pato tacei duah, pataom atau talang bol lin Quan khu 9 ndom mayai lac:

“Bruk ngak dak harei dak gaok rilo kan kandah, kayua nan ye khol drei brei pambuak haong rahra, pambuak saong bhum palei, oh huec glaih glar, srap gap nao tal grauk labik piah duah atau talang tui hatai thau ka bruk di drei glaong di abih”.

Mesuh metak dak harei dak kadun atah min bruk matai lahik pandik pandua jeng daok. Kayua di halei nan dalam taneh riya ceik glai lac dom kubo bol lin oh ka hu duah mboh. Kinh te xa hoi dak harei dak patagok, bruk duah, pataom atau talang bol lin jeng kan kandah jang. Nan brei yaok urang jakar, bol lin di dom kapul K brei hu kham merat jang, patruh tapa dom kan kandah piah samar drah ba dom bol lin meng kal dahlau gilac mai bhum palei amaik, gilac mai haong baoh sang saong ayut cuai di drei./.