Mentri Ilamo, Padhih saong Yulit dang tabiak pambuak haong dom jabat, labik hu pambuak peih ngak iek dahlau Dom kadha di baoh sang haniem phol tukvak thun 2025 – 2029. Tui nan, Dom kadha di baoh sang haniem phol lac pataom dom asal kadha, piah dut iek saong taong yaom ka bruk njauk hatai di dom urang dalam sang, ngan haong asal kadha yau ye: bruk pambuak pagam gauk dalam baoh sang, kein lagaih drap ar jien padai, prein yava saong bruk cheh chai drut druai, labik daok saong labik dang di baoh sang haong but pajaih, bhap bini, rahra. Dom kadha nan brei hu ngak iek di Ban raya Ho Chi Minh saong Ban Hai Phong.

Labaih 450 urang lambaok valik dom urang jakar, urang lin, urang doan, dam dara dom sang bac, dai hoc, bol pan phao kraong tinh An Giang hu mbaok cuh padangdien, cuh gilau di kubo ghol liet si di Kubo liet si tinh An Giang. Sa-ai Phan Duy Bằng, Bi thu Tinh ndoan An Giang khan lac: Ini lac bruk nga piah pato padar yaok urang dam dara ka bruk anit ranam taneh ia, hatung hatian praong ka bangsa, piah diukrai, ngak bruk, bac megru, khik caga Taneh ia njauk haong bruk var klak rup drei di dom rairah anh hung, liet si, thuong binh, benh binh, urang ngak bruk ka taneh ia.

Jaik tal, mbang akaok meti Ban raya Ho Chi Minh raok salam sa danak dak seni nghe thuat siam gheih, labik bo ilamo Viet hu khan tapa alat ragam meng lan saong kreim. Bruk pambuak karei di dom alat ragam bhap bini saong ngak tui jaman bahrau ba mai sa bruk pang iek biak drut druai, tapa dom alat ragam bhap bini yau ragam ragu campi, ragam ragu bầu. Dom hagar Chum, ragam ragu Niêu atau raleng lan – lac dom kaya randap pagam haong raidiuk urang Viet hu ngak jeng ragam ragu yava tabiak sap bangi pang, ndung bak ilamo Viet.

Mban Chi huy Bol lin Bien phong Ban Cần Thơ birau peih tal bac panuac, akhar huroh Khmer ka 20 urang lac si quan, bol lin chuyen nghiep. Tal bac peih pato dalam 25 harei kuhria abih tih 200 tuk tui danak dak pato panuac, akhar huroh Khmer di Mentri Pato megru, dalam nan hu 3 kadha yau: Pasram krein akhar, pagam anek akhar; ndem meyai yaok harei saong dom panuac gah bol lin. Tapa nan, rik tame paglong bruk ngak, ngak hu siam bruk pathau khan, jak ba bhap bini bangsa takik di bhum tasik taphia negar di Ban Can Tho.

Ngak Jalan ngak jien padai taong abih  saong Danak dak bayar jien oh meng jien mbaok di rajaei, camreip meng mbang bayar jien bilan 8/2025 anak tal, bao hiem xa hoi (BHXH) Ban raya Ho Chi Minh pambuak haong gilang pariak pabak CCCD saong peih tai khoan ka urang mbang jien huu, daong BHXH. Kuhria tal puac thun ini, 96% urang njauk hu jien hu tok mek tapa tai khoan di drei. Ini hu maong yau sa takai yam hu makna dalam bruk ngak bahrau gah BHXH, duh rahra dak harei dak siam jang.

Labaih sa 100 thun tapa kuhria meng gilai danei angan Titanic kram dalam mbang nao tasik akaok meti di thun 1912. Min damnei dalikan ka gilai nan daok pachreih rilo mbang urang nao rivang iek mbuan gaok bala piah duah nyu. Sa kong ty Tây Ban Nha angan Madrid Artes Digitales ba tuai damuai nao rivang iek gilai Titanic hu rilo kadha yau biak, dalam nan hu thaok binguk 360 ndo. Dom kaya parang iek hu pandap ngak meng kandaik lan, ban, dom pandap piah menei ia, khan ao saong dom ndap nda ngak mekre sang danaok meng gilai Titanic.

Dalam dom thun jaik ini, ralow menuk cien Han Quoc oh lac hu palei nduac abih di darak pasar dalam negar bo daok jeng sa ndap mbang hu takre dalam dunya. Meng bruk oh lac sa ndap mbang di jalan, ralaow menuk cien Han Quoc patui veik jeng “talei pambuak” ba ilamo ndap mbang Han Quoc tabiak dunya. Ralaow menuk cien Han Quoc patui veik brei mboh ka prein khang gheh ghang di ilamo, tuk sa ndap mbang truh tapa abih talei paga piah nao tal hatai urang dalam dunya./.

Dom taneh ia chau Au, dalam nan hu Prang, daok dang anak dom mbang langik pandiak catang me-om tagok ralo labik. Njauk caik hatai, langik pandiak catang di bilan 6 meng blaoh ngak ia khan tuyet di talei ceik Alps ralai samar. Bruk nan rah tabiak tuk jaik tame bilan tabung glong ma-in ndik ceik di bilan He. Langiu di nan, pandiak catang ngak ka 1.400 kraong ia khan di Thuy Si ba tabiak panuac khan kakei dahlau. Urang ngak praong di taneh ia ini khan lac tuyet saong ia khan ralai aval dahlau bhian thun meng 5 tal 6 adit.