Brei panuac di Nyaom biai jhul khang bruk cakrok patagok phun jien di karja thun 2025, Thu tuong Pham Minh Chinh mboh lac: Khol drei daok dalam dom harei bilan sajarah, sahaneng  “drah samar, ngak catang” min bruk ngak meng kadung jien karja oh lac “drah samar, ngak catang” bo daok suai damuai. Yau nan ye, Thu tuong caong khin parabha bruk cambaic laic ka rajakar yaok sa danak dak, bruk ngak nao gam haong phun buh jien buh tame ngak. Kuhria tal harei 30 bilan 4 thun 2025, phun jien buh tame ngak dalam negar labaih 128 ribau ti dong, sumu labaih 15% bruk Thu tuong ba tabiak, biar jeng tukvak ini thun 2024.

Di tinh Gia Lai, hadei jaik 5 thun peih ngak danak dak “Amaik raong” hu 172 urang amaik taduan raong tapak saong 150 maik raong tapa urang pakan. Dom urang amaik raong dalam tinh daok daong, sangka iek glang, raong 407 uranaih metui. Tapa rilo jalan daong, danak dak jak ba hu alin labaih 57.000 paok ndap, 580 paok jien bac, 185 radaih juah, daong ramik pasiam sang daok ka uranaih metui…kuhria abih tih jien jaik 10 ti dong. 

Urak ini, bein durian di tinh Tien Giang daok tame bilan paik baoh ralo, yau nan min kayua brei takik baoh, yaom biar yau nan ye po bein oh hu laba hadom. Durian  pajaih Ri6 janih ka 1, yaom meng 40-50 ribau dong sa kilo, durian janih ka 2, ka 3 yaom trun meng 10-20%. Yaom durian trun kayua pablei ka negar Trung Quốc nyu pasang iek kan kandah, dalam tuk nan bein durian tame bilan paik baoh ralo ba tal pablei suai, takik. Urak ini, jaik abih baoh durian di Tien Giang ba tabiak pablei di darak pasar.

Di tinh Hau Giang langik daok salih tapa bilan karei yau nan ye hu pandiak, hajan meblak gauk, page subuh rilo ia kakuan mbuan labaih ka halak lahin palai kaik ngak khut khat phun padai He thu. Urak ini, tinh hu jaik 2.900 ha padai halak halin palai pajua. Yau nan ye gah ngak nong kakei urang ngak nong tui iek tani tanat phun padai hu halak halin palai kaik saong ngak tui dom jalan pacang caga piah plaik njiak njom mbak tabiak mblang hamu praong.

Jaik ini, angaok mang xa hoi hu khaw tin saong thaot binguk “baoh manuk ja” ngak haduh hatai manuac sia. Kadha nan ngak biak jhak tal darak pasar, ba tal yaom baoh manuk di rilo bhum palei trun biak biar. Kapol nyaom Manuk ada Viet Nam mboh lac, angaok dunya ini oh ka hu harak pasang iek ka bruk ngak tabiak baoh manuk ja bo dreih yau baoh manuk biak. Min negar drei oh ka mboh baoh manuk ja pablei di darak. Yau nan ye, meda lac, dom khaw tin nan menek tabiak.

Dalam harak kuhria mboh, dom urang ilamo Trung Quoc khan lac, mbang jit ruak COVID-19 meng akaok bilan 3 di negar drei kuhria tagok tabung glong di bilan 5 ini. Urak ini, urang njom ruak COVID-19 mboh haduh hatai di taneh ia ini meng bilan 4. Yau nan min, tui dom gru iek ruak mbang ini oh huac, oh njauk bruk praong, kayua ralo hu klauk jru vaccine saong njom ruak, nan ye pacang hu ruak.

Mbang ahaok par akaok meti di karja Tong thong My Donald Trump brei ka yaok pluh urang tame negar karei suan hukum “ta-eng tabiak” hu taduan 1.000 USD hu peih ngak di Houston di page harei 19/5 (tui tukvak pak nan). Tui Danak dak “ta-eng tabiak” di rajaei My, dom urang tame negar My suan hukum  eng drei tabiak truh hu brei ba nao sang oh abih jien saong daok hu daong 1.000 USD. Ini lac jalan piah jhul pakhang dom urang tame negar suan hukum tabiak mbaok brei karja thau.

Indonesia daok jhul pasamar dom bruk ngak di danak Pasang iek prein yawa oh abih jien praong abih kayua Rajaei peih tabiak, caong samar duah mboh ruak ka bhap bini, trun takik metai jeng yau takik abih jien iek ruak. Meng bilan 2 tal ini, Danak dak ini taduan hu 5 trieu 8 rituh ribau urang. Danak dak nan rik tame bruk praong piah duah thau dahlau ruak. Yau nan ye, Rajaei taneh ia ini daok peih praong bruk iek ruak ka anek saih./.