Gah Pathau khan saong Jak ba Tinh uy Ben Tre bahrau peih harei tamat, alin yai Mbang pakacah paneh, yaih khan tac pham van hoc, nghe thuat saong bao chi haong angan “Bac megru saong ngak tui jalan diukrai hadah krah di Ho Chi Minh”. Di harei alin yai, Phaok Akaok Gah Thuong truc Gah pathau khan Tinh uy Ben Tre Nguyễn Trúc Hạnh pandar, dom labik, bhum palei meng jalan lagaih, piah pathau khan ka dom kadha ini; tapa nan, parilo dom urang menuac, kapul, bruk ngak lagaih, bruk ngak hadah krah, daong pambak khang bruk bac megru saong ngak tui Wa Ho dalam rahra.

UB bhap bini tinh Kon Tum birau meyaom 113 gru pato saong 185 anek saih naih joi thun bac 2024 -2025. Dalam thun bac tapa Kon Tum hu 36 anek saih  bac naih joi dalam mbang pakacah anek saih naih joi pakat negar; 2 anek saih mek hu yai dalam Mbang pakacah ilamo ky thuat pakat negar brei ka anek saih bac trung hoc; dom anek saih bangsa takik hu tame Mbang pakacah anek saih naih joi pakat tinh dak harei dak rilo gam bac joi… 

Ban raya Ho Chi Minh daok gaok dom urang njauk ruak laka tangin, takai, pabah tagok samar drah 40%, paglaong dom urang njauk ruak meng akaok thun 2025 tagok labaih 6.700, tagok jaik 50% dut haong tukvak ini thun dahlau. Bruk tagok rilo urang ruak di dom quan, huyen saong Ban Thủ Đức. Urak ini, ruak laka tangin takai pabah oh ka hu vaccine caga ruak. Kayua nan, bruk caga ruak hu ngak rilo saong siam lagaih abih lac khik ramik bruk hacih sa-at ta-eng drei saong alam langik.

 Kong an tinh Kien Giang peih mbang ngak bruk tabung glong, cap mek kol ngak tabiak, pablei ndap ja di dalam  tinh, meng harei 15/5 tal harei 14/8. Hadei sa adit ngak bruk, gah kong an duah mboh saong langyah rilo bruk suan, cap mek rilo ndap ja ndap hu angan je, oh hu siam. Njauk caik hatai, dom urang nan dak harei dak ngak kan thau dahlau piah tapa mbaok urang jakar. Gaok mai meluh pablak ndap ja – ndap biak piah pagat urang blei.

Dalam dom harei anak tal, bhum Taneran kraong Cuu Long patui veik hu hajan di rilo labik, ngan haong hajan meng 50-80mm. Urak ini asar siam halau ia di dom labik bhum Taneran kraong Cuu Long urang ini kurang takik. Makna lac kayua daok di tukvak salih bilan, ia hajan brai haong dom janih meng angaok mbaok taneh theik tame dom ribaong, ba tui tanut di dom janih njom nerak partaom dalam ribaong rilo tagok. Kayua nan, dom bhum palei brei patagok dom jalan langyah piah pasang iek tanut mbak di ia pabak ka kavei raong piah ngak hacih samu saong pasang iek jit ruak.

Bruk pabak ndien di Cuba daok yam tapa tukvak biak kan kandah, bruk kahik ndien dui atah saong kurang ndien labaih 1.600 megawatt (MW) ndien yaok harei dalam tuk tabung glong, sumu labaih 55% bruk caong khin hu sang daok. Karja saong Rajaei Cuba daok peih bruk ngak suai lavik piah trun bruk ngak kurang ndien jeng yau trun mon pandar ndien di bilan He pandiak. Dalam nan hu kuhria taong abih dom kong nghe ngak tabiak ndien.

Coca-Cola, sa dalam dom kapul pandap menyum praong abih di dunya, daok gaok bruk oh njauk hatai saong bruk jak ba gauk oh menyum Coca-Cola meng urang pandar dalam dunya. Coca-Cola hu ramik tame lac kongti ngak njom nerak katak rilo abih dalam 6 thun danak dak. Yaok thun, kapul ini ngak njom nerak saong pablei labaih 100 tỷ kalaok katak pandar sa mbang. Rilo dalam nan oh hu pasiam veik njauk lagaih, bo tuh tame labik klak hareik, kraong ia saong ia tasik.

Tong thong Ukraine peih bruk ginum biai caga ka bruk bayar urang guk tui kuhria “ 1.000 salih ka 1.000” haong Nga. Tong thong Zelensky cih vak lac bruk ba dom urang guk Ukraine di Nga mai veik lac sa dalam dom bruk brei ngak dahlau di Kiev. Kuhria meng bilan 3 thun 2022, Ukraine saong Nga peih ngak 64 mbang salih bayar urang guk, labaih 4.700 lin Ukraine hu bayar mai.