Pakacah gaiy Ngo lac sa dalam dom raya adat praong di bangsa Khmer hu rah tabiak di bilan 10 tui saka ia bulan yaok thun. Di Soc Trang, raya adat ini tuk halei jeng dui pachreih rilo rahra saong tuai damuai mai rivang me-in. Thun ini, tinh Soc Trang kuhria brei raok labaih 60 kapul gaiy Ngo mai tal pakacah  di harei raya. Thun blaoh, Harei raya hu peih ngak praong prang tui pakat Bhum taneran kraong Cuu Long, dui pachreih 60 kapul gaiy saong labaih 7.000 urang vah gaiy di dom tinh Soc Trang, Ca Mau, Bac Lieu, Hau Giang, Kien Giang saong Ban Can Tho, hu labaih 620.000 mbang urang saong tuai damuai mai rivang me-in di dom danak dak dalam harei raya.

Dalam 4 harei tapa, hu 115 urang lambaok vakil gah van nghe si TPHCM hu rivang iek bac megru tapak dom labik sajarah dakrai pambuak haong bruk mesruh metak haong kol Mỹ daong taneh ia. Bruk peih kaok danak dak di tỉnh Kon Tum lac duah thau bruk jayak Đăk Tô - Tân Cảnh saong alin pandap ka dom baoh sang sarak karja, urang bangsa takik daok gaok rilo kan kandah. Di tinh Gia Lai, kapol urang hu alin pandap ka 100 baoh sang sarak karja, bol bhap di bhum atah bayah, bhum ceik saong anek saih  kham merat bac megru di huyen Ia Grai…

Ban raya Ho Chi Minh bahrau ba taiak 3 bruk “sa pambang” haong ka urang kamei, uranaih saong urang njauk taong paoh, ngak kan kandah, hu padang di dom sang iek ruak: Ni dong 1, Ni dong Ban raya saong Chan thuong chinh hinh Ban raya Ho Chi Minh. Ini lac bruk pabak jitvu bruk ngak daong rahra meng kdung jien ban raya, patui veik bruk jak jeng meng bruk ngak iek dahlau Bồ Công Anh hu padang di Sang iek ruak Hùng Vương, hu peih ngak meng thun 2023. Langiu di bruk nao tal rilo jabat, urang njauk taong paoh urak ini tok brei nao tal sa labik piah hu daong taong abih saong khik kandauk.

So Ilamo, The thao saong Yulit Dak Lak birau brei thau Danak dak pachreih urang mai rivang ma-in yulit dalam bilan he thun 2025. Ngan haong kadha “Ma-in he duah thau Ceik glai radam rasa -Rilo kadha biak mekre, sambai”, danak dak hu dom tour yulit bhap bini, ilamo, sinh thai; vah ghe jrai ia, radaih peih nduac tahak glai glo cagar ia jrai. Langiu di nan, meda hu dom bruk parang iek kong cieng, nghe thuat, the thao, le hoi jalan raya saong Roya pandap mbang. Danak dak patui veik thaot binguk yulit “ Dak Lak - labik salamat, anit ranam, ndung bak ilamo Tay Nguyen”.

Ngan haong he thong 127 inem mek sajarah – ilamo saong rilo palei ngak bruk meng kal, tinh Long An daok dak harei dak patagok kein lagaih gah yulit bhum palei. Tinh jhul khang bruk yaih khan, buh jien tame jalan mbak, balai, sang bac saong gom truac hadah, pandar ilamo kong nghe khik ramik drap ar, pambuak rivang me-in ilamo – sajarah haong ndap nda OCOP, dui pachreih dak harei dak rilo tuai damuai sit thun umo, daong patagok kinh te bhum palei saong khik ramik ilamo bangsa. Tinh jeng jhul khang bruk pandar ilamo kong nghe dalam bruk khik ramik drap ar, ngak lek taka ka du lieu piah duh ka tuai damuai jirah rivang.

Blackpink lac sa dalam dom kapol nyaom urang kumei daoh tamia danei angan di Han Quoc saong dunya - meda hu mbang nao parang iek vin taom dar dunya hu angan Deadline saong brei tabiak pandap birau dalam thun 2025. Mbang nao parang iek hu peih ngak meng harei 5 -6 bilan 7 anak tal di mblang pakacah Goyang di Seoul, Han Quoc saong patui veik di grauk negar Bac My saong dom ban chau Au… Ini lac mbang akok meti hadei 2 thun, abih 4 urang di nyaom  Blackpink hu pataom ginup mbaok daok take.

Urang kamei adaoh di kapul ragu ragam Birds of a Feather Billie Eilish hu yai thuong glaong abih, yai Nghe si di thun di Yai thuong ragu ragam My hu peih ngak di Las Vegas. Ini lac yai thuong ragu ragam yaok thun pok meyaom dom urang hu jayah hu pilih ruah tapa bruk pilih ruah di urang pang maong. Oh lac tok yau nan,  Billie Eilish daok mek hu jayah di taong abih 7 tal pakat, dalam nan hu album di thun saong nghe si adaoh hu chreih mekre rilo abih…

Urang ndik ceik ranaih umo negar Prang Benjamin Vedrines birau ini samar abih gam ndik tagok saong trun ceik Mont Blanc, hu pagap lac “ tabung sang di chau Au”. Bruk ngak jak jeng siam mekre yau nan yam tapa  tanut glong labaih 10 thun kayua urang danei angan negar Tây Ban Nha Kilian Jornet mek hu. Urang ndik ceik Vedrines, umo 32 thun, hu ndik saong trun ceik dalam 4 mon, 54 minit saong 41 giay, samar jang urang pakacah dahlau diah lac 3 minit./.