Ngak adat dahlau tuk cuk kon bal 

Ngan haong urang Êđê, baoh kon bal lac pandap oh kurang hu saong hu makna prong dalam rilo adat cambat. Kon bal oh lac pandap sanya, kak kajap hatai anit di diuk pasang, adei sa-ai bo nyu daok ba mai rilo patuah jamo, siam mekre ka pren yava di anek manuac. Ini jeng lac pandap brei mboh ka panuac pagul dahlau, panuac sanya di urang hu ngak adat anak yang mebhang saong bol bhap rah ra anak mbaok mong iek di manuac sia.

Tui ong Y Le Niê, daok di buôn Ea Bông, xã Cư Êbur, bal Buôn Ma Thuột, urang Êđê HU rilo adat cambat pambuak pagam haong rai anek manuac. Yaok adat ngak Yang hu sa makna karei. Dalam tuk ngak adat, urang iew Yang meda pok panuac lar kar, gam pal tangin ba tame baoh kon bal piah cuk tame tangin urang hu ngak adat. Nan lac sa pandap piah ka po yang sraong daong, pacang khik ka urang cuk baoh kon nan. Hadei di yaok mbang iew yang, baoh kon bal nan hu sarak dom inem samu haong dom ché tapai bo po sang pandar piah ngak adat, bhian lac 3, 5 atau 7 inem sarak.

Dalam rai anek manuac di yaok urang ye tuk thau rui, thau nao lac tuk hu ngak adat cuk kon bal, ngan haong pandap ngak adat lac 3 ché tapai saong sa drei pabui tano piah jao brei ka amuk mbuai ngan haong hatai caong khin khik caga siam ka uranaih nan. Tal tuk padang mbang angui, tok hadiuk, hu anek meda ngak adat iew yang ngan haong sa drei pabui tano Pasaih saong 5 caik tapai, brei mboh bruk padeih rai daok haong sang amaik ame pajeng piah salih tapa rai daok di sang gah hadiuk. Ngan haong gah sang hadiuk anek, ye urang likei  hu brei ngak adat iew yang meng sa drei pabui saong 5 caik tapai, sarak 5 inem tagok baoh kon bal.

Daok tui amuk Hoàng Ngọc Lan Byă, daok di buôn Sut Mđưng, xã Cư Suê, huyện Cư Mgar, tỉnh Đắk Lắk, bruk cuk kon bal tame takoi tangin urang hu ngak adat daok lac panuac tadhau ayuh pren yava khang kajap saong patuah jamo. Kayua yau nan ye, dalam biak rilo adat cambat, hadei di tuk ngak adat blaoh cuk kon bal ka urang po ngak adat, dom urang dalam sang, gauk gar saong dom urang hu mbaok pak nan jeng pal sa baoh kon bal piah cuk tame tangin urang hu ngak adat, gam tui nan nan lac 1 pok pandap atau panuac tadhau ayuh.

Dalam adat cambat tanarakun di urang Êđê, baoh kon bal daok lac panuac sanya jeng diuk jeng pasang di dom urang likei dam, kumei dara tuk tal umo tok hadiuk tok pasang. Tui nan, tuk njauk hatai gauk blaoh ye urang kamei nao khan haong amaik ame di drei nao tal sang urang likei ngak adat jao brei kon pagul lakhah.  Pandap panda ba tapa tui hatai caong khin di gah likei, min takik abih njauk hu 8 baoh kon bal saong sa blah khan siuk bak, brei mboh hatai thau dhar phol di urang kamei haong amaik ame gah pasang kayua hu pajeng tabiak, raong pato urang likei nan jeng manuac jeng urang. Dalam tuk ngak adat, baoh kon bal hu makna dreh yau baoh karah lakhah hu urang lambaok dua gah pok brei ka  likei dam kumei dara nan ngan haong panuac kakei ka jalan diuk rai hadei di tuk jeng hadiuk jeng pasang. Tuk dua urang gaok tangin tame baoh kon bal, 2 urang nan hu  jeng hadiuk jeng pasang, sanya anak mbaok amaik ame dua gah meda mbang daok haong gauk tal saratuh thun taha ndua mbuk patih. Dua baoh kon bal nan hu cuk tame tangin di 2 hadiuk pasang urang dang ngak chứng ka bruk lakhah ini hu khang kajap.

Baoh kon bal daok kak kajap hatai ranam di baoh sang urang Êđê haong sa urang oh njauk lac ralo darah, hatung pruac tapa adat pambuak talei rohim. Baoh sang meda jao brei ka urang adei sa-ai kết nghĩa baoh kon bal yau sa pandap pambuak pagul, hu mong urang nan yau sa urang dalam sang, dalam but pajaih. Dua gah hu kaka kajap yau hatung pruac saong gam klah rabha dom  bui sambai, jeng yau duh hatai atau kan kandah, hana hua.

Baoh kon bal daok lac pandap prong piah pambuak haong dom yang mebhang, salih ka panuac kakuh likau atau sanya, pagul. Ong Y Hơ Êban, daok di buôn Knia 4, xã Ea Bar, huyện Buôn Đôn brei thau, urang Êđê biak iek prong panuac sanya, abih di nyu lac panuac sanya anak yang mebhang saong puk palei. Kayua YAU nan ye, tuk oh ka ngak hu panuac sanya, iek tui mbang angui di baoh sang, bo ngak adat khan veik kon bal piah likau dui atah panuac sanya tal tuk laghaih.

Meng kan dahlau, baoh kon bal hu mbaok dalam rilo bruk praong di urang  Êđê ngan haong makna biak karei. Harei ini, yaom lac dom adat cambat ini oh daok rilo yau dahlau min di Đắk Lắk, baoh kon bal jeng daok hu khik ramik yau sa drap ar hu yaom glaong. Tuk hu ba tabiak ngak adat, nyu jeng pandap biak hu yaom, hu manuac sia pok brei ka gauk yau sa adat siam gheih daok hu khik ramik./.

Urang lang: Jasi - 25/4