Makna siam gheih Adat paling yang pambang palei di urang M’nông.

Adat paling yang pambang palei di urang M’nông bhian rah tabiak di puac bilan thu, akaok bilan hajan, dahlau di tuk mikva tame bilan ngak puh cakak. Ini lac adat praong saong oh kurang hu dalam thun, likau ka hajan siam angin lagaih, sang siam mekre, menuac urang khang kajap, pala drak njauk saong puk palei plaih hu bala. Hadei di ini, kol drei duah thau ka adat paling pambang palei di mikva bangsa M’nông daok di xã Ea Huar, huyện Buôn Đôn, tỉnh Dak Lak, sa adat cambat sit min ndung bak makna siam mekre.

Di var pagaiy harei ngak adat paling yang pambang palei,  bhapbini pataom gauk saong taha palei kuhria caga pandap. Pandap piah pok tagok dom po yang hu dom sang kuhria caga hu: brah, baoh kayau, ralo saong alak tapai. Abih di nyu nan lac njauk hu ahan ndiuk kayua dom urang kumei dalam sang ngak pok tagok paling yang .

Taha palei Che Uyên, buôn Nà Sược, xã Ea Huar, huyện Buôn Đôn, tỉnh Dak Lak brei thau, bruk paling yang ini piah likau ka puk palei plaih hu bala, dom bruk oh patuah jamo. Tuk peih ngak adat lac abih menuac dalam palei ba gauk rik tame blei pabui, daok alak saong dom pandap karei ye dom sang eng drei kuhria caga.

Tui sang hu jien padai takik atau rilo bo pandap ba nao paling yang rilo atau takik. Langiu di nan, mikva jeng caga pandap oh kurang hu lac mbaik din hu ngak meng sap darko hadei tuk njak abih ia. Patui nan lac dang mrai kak tangin. Yaok sang njauk caga dom talei mrai kak sumu saong dom urang dalam sang drei, piah hadei di tuk ngak adat blaoh hu kak tame tangin di yaok urang. Ndom ka bruk praong di adat paling pambang palei, taha palei Che phiên brei thau:” Ini lac adat hu meng livik rai, hu ngak piah caong hu siam mekre ka puk palei, kayua yau nan ye nyu hu caik veik tapa dom rairah. Hu dom adat karei drei meda klak hu, min  adat paling pambang palei lac oh klak hu. Dalam palei di dahlak oh hu thun halei klak adat ini, thun halei jeng ngak, hu jeng bruk randap. Mengkan tuk daok diuk, ame dahlak lac urang dang tabiak ngak adat paling yang palei. Meyah khik adat ini nyu ba mai siam mekre ka puk palei drei, ka bến ia drei, ka anek taco di drei. Drei raong kubao, limo jeng tagok hu jeng tapol”

Pandap paling yang hu dom sang caik pataom di akaok palei, libik hu pilih ruah piah ngak adat. Pak ini, taha palei hu padang dahlau sa phun nêu, sa baoh ndrơng (bàn thờ) piah caik pandap paling. Tuk dom sang dalam palei mai ginup, taha palei yuk sa mbang tù-và saong yau panuac brei thau adat paling pambang palei hu peih tabiak. Taha palei caik dom pandap tagok bàn thờ saong peih ngak dom adat paling yang.

Dahlau di abih, taha palei lai darah pabui saong alak tapai, blaoh cakak 3 klaih gan pabui klauk tame sa mbaik gai padang tame pabah ché alak tapai. Hasit lisei gam rilo pacoh sit, srau takik darah pabui piah dak vil tom dar dom tanyi di ché alak tapai. Bhapbini palei patui gauk caik pandap paling kayua sang drei kuhria caga meng dahlau di taphia nan. Tuk salah bloh, taha palei meng pok panuac meroi: “ lei yang kraong, yang craoh, yang ceik yang glai. Lei suan yava di amuk kei…caong ka dom yang khik puk palei kol dahlak, caong ka abih menuac sia dalam palei hu khang kajap pren yava, plaih hu ruak kik, pandik harao,. Caong ka hajan siam angin lagaih, pala drak njauk, padai bak kho, tangei khang asar. Raong kubao, kubao jeng tapol, raong limo pabui bak mblang bak var, sang sang bui sambai, haniem phuan”

-Urang ba gauk dang vil tom dar phun nêu piah ngak adat paling. Hadei di nan, yaok urang lambaok ka yaok sang hu daa tagok menyum alak. Dom urang nan tok nhấp cambuai blaoh tuh alak tame baoh kathaoh ba nao sang. Hadei di tuk tamat blaoh bruk paling di taha palei saong bhapbini di pambang palei, ye urang ba dom pandap nao sang, maong lac “ lộc ban”. Urang ba alak hu srau darah pabui barau paling yang cih tagok gai nyan atau bambang praong di baoh sang. Bruk ini piah pateok, pacang dom bala ka sang drei. Urang praong thun di abih mek talei mrai barau nao paling mai njuk tame alak lai saong darah pabui kak tame tangin ka yaok menuac dalam sang meng praong tal sit, makna lac yaok urang hu po yang khik caga.

-Tamat adat di dom sang, urang tapa bruk mbang menyum, ba gauk mbang dom janih pandap bo drei hu caga bloh. Uranaih sit mbang ahan ndiuk, mbang ralo, urang praong chreih bui ba gauk menyum alak tapai. Dalam sap chiêng tanyi atah, dom likei dam, kumei dara, urang taha uranaih ba gauk tame daoh tamia. Dom ragam tamia, dom kadha daoh nao mai hu dui atah tal abih harei, tal tuk alak abih, urang mebhuk having, uranaih ndih bingi tapeng ging apui.

-Amuk H’ Camry Rya, akaok palei Jang Pông, xã Ea Huar, huyện Buôn Đôn, tỉnh Dak Lak ndom ka adat paling yang di palei drei: “ tui adat di urang M’nong di palei, yaok thun jeng peih ngak adat paling yang di pambang palei. Taha palei saong akaok buôn dang tabiak ieu mikva abih hatai pataom mbaok tame. Yaok thun uy mban xã jeng hu daong jien, daong palagaih piah ngak adat. Ini lac adat njauk hu khik veik, nyu hu peih ngak yaok thun piah pachreih mikva jum pataom, kham merat pala drak, ngak mbang kinh te dak harei dak nao tagok./.