Lac sa urang lambaok ka tỉnh Đắk Lắk hu pok angan di Harei pok mayaom anek saih, sinh viên, dam dara bangsa takik naih gheih di abih mbang ka 10, thun 2023, adei Đoàn Gia Hân, bangsa Tày, anek saih  tal 12 chuyên sinh, Sang bac THPT Chuyên Nguyễn Du biak naih gheih. Adei mek hu dom jai thuong, yau ye jai Nhat pakat tỉnh saong jai Nhì pakat negar di Mbang pakacah Olympic Sap Anh anek saih - sinh viên thun 2022; lac “Anek saih 3 siam” pakat trung ương; lac urang dalam Kapul Anek saih naih joi pakat negar mon Sinh học. Oh lac bac naih joi, Gia Hân daok hu mbaok tame rilo bruk ngoại khoá, bruk ngak ka rahra jang yau dom bruk di Đoàn, Đội. Đoàn Gia Hân khan lac: adei tuk halei jeng kham marat rami ramik tukvak piah hu mbaok tame dom bruk ngak:“Adei daok kham marat cakrok rup drei saong pasiam veik dom bruk oh ka siam piah mek hu siam mekre ba jalan ka harei hadei hu siam jang. Anak tal haong môn chuyên lac sinh học ye adei caong jeng sa urang roh duah ilamo, roh duah kong nghe sinh học jang lac ilamo y sinh piah ba dom ilamo bahrau dalam bruk taong ruak piah daong ka menuac sia”

Ngan haong Y Un Diễm, urak ini daok bac thun ka 3 tal bac Sư phạm sap Anh, sang bac Đại học Tây Nguyên, hatai caong hu nao tal sang bac hu daong ka adei yam tapa yaok kan kandah, tavak tavaiy. Mai veik sang bac piah patui veik hatai caong hadei di 3 thun klaih klaoh, anai kumei bangsa Triêng kham marat bac taa saong hu mbaok tame dom danak dak, jeng lac “Sinh viên 5 siam” pakat tỉnh saong lac akaok dhar kapul ba jalan ka dhar kapul mek hu angan “Kapul Sinh viên 5 siam” pakat Trung ương. Adei jeng hu dang akaok rilo kalup kapul dalam sang bac, gam haong nan, adei jeng hu sa danak dak di drei saong khin peih ngak di puk palei drei dalam harei hadei oh atah. Y Un Diễm brei thau:“Adei hu sa danak dak nan lac “ba sap Anh mai puk palei”. Ngan haong dom ayut saabat lac urang bangsa takik yau adei daok di puk palei lac biak kan kandah saong kan piah hu bac sap Anh. Nan ye tuk bac tamat blaoh, adei caong lac adei meda mai veik palei di drei, mai piah daong ka dom adei nan hu bac sap Anh, hu nao tal dom bhum taneh bahrau saong pachreih ba dom ayut saabat, piah ka dom ayut saabat hu hatai sahaneng khang kajap, hu jalan piah bac taa yau adei.”

Đắk Lắk urak ini hu labaih 170 ribau anek saih, sinh viên urang bangsa takik daok tui bac dom pakat phổ thông saong cao đẳng, đại học. Nao gam haong anek saih, sinh viên, tukvak tapa, tỉnh Đắk Lắk hu rilo sarak, jalan ngak piah daong, pachreih ba anek saih, sinh viên yam tagok, daong palagaih saong pabak prein ka dom adei sahanang hatai bac taa. Saai H Giang Niê, Bí thư Tỉnh đoàn, Akaok Kapul Sinh viên Việt Nam tỉnh Đắk Lắk brei thau: dom sinh viên urang bangsa takik naih gheih meda lac dom kreih camin pambak tabiak dom hatai caong buh prein daong yam tagok ka rai ranaih, abih di nyu nan lac dom ayut saabat daok di puk palei.“Kol dahlak caong lac dom adei meda brei mboh bruk ngak di dom adei dalam bruk ngak di Đoàn, Hội; patagok bruk ba akaok lac anek saih, sinh vien, dam dara bangsa takik dalam bruk khik ramik, patagok dom yaom glaong ilamo bangsa, hu mbaok tame bruk salih số. Kol dahlak caong lac kapul ini meda patagok dom siam lagaih saong meda gam haong Tỉnh đoàn, Kapul sinh viên peih ngak siam dom bruk ba tabiak”.

Meng dom sarak nao gam, daong ba, rilo anek saih, sinh viên urang bangsa takik di Đắk Lắk khang hatai jang dalam dom bruk ngak, dom danak dak. Dom adei jeng kham marat bac taa, pasram megru paglaong ilamo piah caga biak siam ka harei hadei ngan haong hatai caong rik prein yava, ilamo di drei ka rahra, ka puk paga, palei negar./.