Yaom lac yam tapa umo 75 thun min ong Thông Long jeng buh abih prein ka bruk patagok di bhap bini urang bangsa Cam daok di palei Phú Thuận, xa Hàm Thuận Bắc, tinh Lam Dong (labik Hàm Thuận Bắc, Binh Thuan klak).

Oh sa janih lac urang naih gheih urang nao dahlau dalam bruk ngak mbang patagok kinh te, padang palei pala bahrau, ong Long daok kham merat hu mbaok tame padang majam politik khik ramik saong patagok dom yaom kaom ilamo bhap bini di bangsa Cam.

  Ong Thông Lạc, daok di palei Phú Thuận, xa Hàm Thuận Bắc brei thau, hu dom bruk karja oh ka thau tanat, ong Thông Long dil drah samu brei thau. Hu dom bruk oh siam haong gauk nda lac kan ba pasiam, meng bruk buh abih hatai tian saong bruk ndom meyai gheih ghang siam makre, ong daong dom gah duah hu sa sap ndom.

 “Baoh sang ong Thông Long biak hu angan je, daok ong Long tuk halei jeng jaik taphia haong mikva, dom baoh panuac ndom di ong jeng kayua sa bruk di palei pala nan abih urang jeng pang”.

Jeng yau ong Thông Long, dom thun jaik di ini, ong Huỳnh Cứng, Phaok Akaok Kapul Halau janeing Cam Ahier daok di tinh Lam Dong, gam saong bruk ngak Phaok Po Gru Bhum Bac Binh (labik Bac Binh, Binh Thuan klak), ong hu mbaok tame khik ramik bruk ngak mbang padang raidiuk an ninh siam mekre - ka salamat karo kajap. Dom rik daong di ong, daong paglaong bruk pambuak khang catang di karja, kapul kong an saong halau janeing saong mikva Cam.

Ong Huỳnh Cứng brei thau, bruk hu mbaok tame khik kajap karo an ninh, siam mekre lac sa bruk di yaok rahra, piah pacang khik raidiuk salamat di baoh sang, bhap bini saong palei pala bhum pasai.

 “Asal dahlak brei kham merat haong karja, Mban Dui ba palei Phan Hiệp jak ba mikva bangsa Cam di ini khik an ninh siam mekre ka nyu siam gheih jang. Juai luai ka dom kamuan di drei hadei ini laik tame dom kanjah jhak yau ye: peih nduac radaih kacah samar, me-in jru aphil…yau nan ye oh siam”.

Bhap bini urang bangsa Cam di Lam Dong hu dua majam kapul halau janeing pagam haong aguma di bhap bini, dalam nan hu: Kapul Halau janeing Cam Ahier saong Kapul Halau janeing Cam Awal tinh Lam Dong. Dom halau janeing dalam bhap bini bangsa Cam harei ini, oh tok daong khik ramik ilamo bangsa, blaoh daok lac kapul urang hu makna dalam pathau khan, jak ba rahra patagok ngak mbang kinh te, padang raidiuk ilamo, khik ramik an ninh siam mekre saong pasiam bruk gul paataom bangsa dalam negar.

Ndom mayai brei ka bruk di halau janeing urang bangsa Cam dalam bhum taneh bhumi, ong Võ Ngọc Hiệp, Phaok Akaok UB Bhap bini tinh Lam Dong ndom khang lac.

“Tui ieik glang taong yaom jeng ye sua tangi dom adei saai jakar di pakat palei mboh mikwa urang bangsa Chăm, dom urang halau janeng yau ye po Dhia po imem taong abih jeng jie hatai tame urang Ndang pan akaok, meng di nan blaoh ngak tui blaoh jie hatai uak rup ngak mbang padang raidiuk truh eik patrun kathaot, dak harei dak tagok kaya mada”.

Tui bruk hik di drei, dom urang dang halau daneng dalam ugama gam saong urang dalam kapul ba bruk di jammaah urang bangsa Cam daok di tỉnh Lâm Đồng ngak siam dom bruk ngak di pakat palei, ndam gam saong rahra bhap bini, daong tame bruk padang karja palei pala dua pakat dak harei dak khang kajap./