Tui urang bangsa K’Ho, pak gak yot oh sa janih tok brei ka hu gheih tangin, kham merat blaoh daok lac ilamo hu pato jao ba meng jaman mukkei. Ragei Nghe nhan angan Rơ Ông Ha Bông, urang bangsa K’Ho daok di palei K’Nơh, xa Đam Rông 4, tinh Lam Dong ieu lac sa urang di dalam dom urang jeng daok pagam haong bruk ngak bhap bini. Tui ilamo di ong, yaok janih yot gilac hu caong khin karei ka kaya tamo saong ilamo ngak.

“Urang ngak ragei nao tame glai hu mbon palei brei adat saong duah dom phun hu ginup 2 thun piah kaoh, phun la-a hu ruah ngak lac dom phun siam, khang saong kajap. Hadei tuk ba mai, kaya tamo patui hu neh rabha tui thun umo saong yaok binah di phun. Binah halei laman, hu tanut racam njauk lagaih ye hu khik gilac piah ngak.”

Hadei tuk srap gap kaya tamo, urang hu langyah yaok mbaik kreim, ngak thaik thaot saong dak dom jalan pak. Patui jalan ngak, dom jalan pak meda hu klau, pak, dalipan, pluh atau pluh dua jalan. Urang brei pasiam prein tangin, khik ka dom mbaik kreim pambuak khang, oh jaoh; gam haong nan pasang iek, cakak binah labaih saong pakajap dom inem kak piah gak salah blaoh baoh yot.

Gah likuk yaok kaya pak gak yot hu bruk kham merat saong ilamo hu patak pataom tapa rilo thun bilan. Saong bruk ini daok hu nghe nhan Rơ Ông Ha Bông pato ka rai rah dam dara sit umo dalam sang patui ngak bruk ini. Bon Niêng Hoàng Đức, ndih tapui thun 2013, taco di ragei Rơ Ông Ha Bông. Matui amaik meng tuk umo 3 thun, adei hu diuk pasang Rơ Ông Ha Bông raong ba. Praong tagok taphia ong, Hoàng Đức aval drah chreih takre bruk pak saong meda gam haong ong ngak jeng dom baoh yot akaok meti.

“Dahlak hulin biak chreih. Dahlak khin khik bruk bhap bini di ong amuk mei dahlak. Dahlak biak chreih takre pak gak yot. Ini lac sah ni, daok ini ieu lac trồ…”

Tui urang bangsa K’Ho, bruk pak daok pagam haong jalan sahaneng ka bruk di urang likei dalam sang saong urang bhap bini. Nghe nhan ragei Rơ Ông Ha Bông ndom meyai lac:

“Tui mukkei, khin pak jeng sa baoh yot brei nao duah la-a, khin mbang anek dúi brei nao duah hu kreim, khin thau ndom puac brei pang, khin jeng ong, jeng ame dalam sang ye brei thau ka pak. Pak gak ieu lac gai dut iek piah brei mboh labik di anek likei dalam bhap bini. Dahlak meng sit hu pasram pak saong tal ini dahlak hu 58 thun paje min jeng daok pak yot”.

Mai meng dom baoh kadha bac magru akaok rai taphia ame tal dom jalan pak daok hu pato ka anek taco, jalan di ragei nghe nhan Rơ Ông Ha Bông lac asal kadha ka prein diuk di bruk pak yot bhap bini do Dơng K’Nơh. Yaok baoh yot hu ngak tabiak oh tok pagam meng bruk gheih tangin, ilamo di urang ngak blaoh daok khik dom yaom kaom ilamo di urang bangsa K’Ho. Tuk nghe nhan ragei jeng daok kham merat chreih mekre saong bac magru gak pak, dom jalan pak gak meng kan jeng patui pambuak atah, daong khik ilamo bhap bini di raidiuk harei ini.