Palei Phò Trì, xã Tân Thắng, huyện Hàm Tân urak ini hu labaih 562 baoh sang, dalam nan hu 395 sang urang Cam Aval. Dom thun jaik ini, raidiuk mikva Cam palei Phò Trì hu rilo salih bahrau, abih di nyu lac meng tuk hu bruk padang ngak palei pala bahrau. Rilo jalan palei hu tuh bê tông siam mekre, sang danaok di mikva hu padang ngak khang kajap.... Bruk an ninh trật tự, bruk jum pataom gauk di palei hu khik kajap. Meng nan, palei Phò Trì, xã Tân Thắng 9 thun gam mek hu angan Palei Ilamu. Thun 2023, palei hu pok brei angan Palei pala bahrau.

Tui panuac khan di mikva dalam palei, bruk salih bahrau njauk uan tabuan ini hu prein yava rik tame biak rilo di ong Huỳnh Văn Cơ, lac urang hu jaik 20 thun dang akaok palei saong jeng lac urang hu angan je di palei Cam. Ndom ka urang dang akaok palei, urang hu angan je di palei drei, ong Thông Văn Tàu brei thau: “Saai Cơ ngak bruk biak siam, lac urang akaok palei abih drei ka palei pala…..”

Piah daong ka mikva Cam di palei Phò Trì hu bruk hit ngak mbang tani tanat, paglaong jien mek tame, tukvak tapa, ong Cơ jak ba peih hu 4 tal pato bruk ngak katut panak harei ka 115 urang. Pasak pato bruk ngak huyện Hàm Tân mai tapak tal palei peih pato dom bruk ngak yau: jhik kong nghiep, raong glang, padang ngak, pala njam hacih.

Palei daok jaik tapen tasik, dalam tukvak tapa, ong kham merat pambuak bruk haong karja palei saong Đồn Biên phòng Tân Thắng khik ramik siam mekre sron mbon puk palei. Ong Huỳnh Văn Cơ brei thau, palei hu kết nghĩa haong MT negar huyện Hàm Tân saong Đồn Biên phòng Tân Thắng piah sangka daong ka raidiuk di mikva: “Abih 3 gah ini cap tangin gauk, daong gauk ngak siam bruk di drei. Tapa nan hu ba gauk lang talaih tavak tavaiy, hu dom jalan ngak gheih piah daong ka mikva. Yau meng blaoh, dom labik oh ka hu điện ye urak ini hu điện mai tal, jalan mbak kan kandah nao mai ye urak ini jeng hu jak ba padang ngak.”

Meng dom bruk ngak ba mai kein lagaih, ong Huỳnh Văn Cơ lac sa dalam 2 urang hu angan je hu mBan Bangsa tỉnh Bình Thuận pilih ruah hu mbaok dalam Danak dak "Labik pambak tame di puk palei", pok meyaom dom urang hu angan je dalam bhap bini bangsa takik bhum tapen negar di taneh ia. Ong Nguyễn Minh Tân, Akaok mBan Bangsa tỉnh Bình Thuận brei thau, ong Huỳnh Văn Cơ lac sa dalam 2 urang di tỉnh hu mbaok tame danak dak: “Ngan saong danak dak “Labik pambak tame di puk palei” rilo meng lac bhum tapen negar. Bình Thuận oh hu jalan tapen negar haong dom taneh ia, min Bình Thuận hu jalan tapen negar tasik. Dua urang lambaok ka tỉnh Bình Thuận hadah krah dalam bruk jak ba bhap bini ngak njauk tui sarak ka bhum tapen negar tasik, saong jeng lac menuac ngak hu rilo bruk praong”

Meng ngan je, ilamu, thau cambaih ka adat cambat, tanarakun, ilamu meng kan di bangsa Cam gam haong hatung hatian di drei, ong Huỳnh Văn Cơ hu rik daong siam ka bruk salih bahrau di palei Cam. Mikva palei Phò Trì, xã Tân Thắng, huyện Hàm Tân, tỉnh Bình Thuận maong ong lac urang dang akaok dalam padang ngak puk palei dak harei dak siam mekrte, kaya meda./.