Hatai anit saong biak takre sap kong cheng, yau njaom tame dalam ralow darah di ong Cil Ha Ôn meng tuk daok sit. Ong khan lac, tuk daok sit ong bhian tui amaik ame hu mbaok tuk ngak dom adat yau ye: Uan padai bahrau, ieu yang ceik, yang kraong dahlau di tuk kuac ribaong ngak puh likau ka bilan pala hu siam mekre, pala hagait hu nan. Praong tagok, ong jeng bhian hu nao tui dom taha palei, akaok puk nao taih kong cheng di rilo labik dalam tỉnh yau ye Đam Rông, Lâm Hà, Đức Trọng, Di Linh… Saong urak ini, yaom lac umo 90 thun, min mboh lac sap kong, sap cheng di bhap bini drei daok mbuan si lahik nao, ong Cil Ha Ôn saong dom urang karei dalam palei jeng daok kham merat jak ba anek, kamuan saong mikva dalam palei ba gauk tame khik ramik ilamu kong cheng, gam haong nan, peih rilo tal pato kong cheng ka anek kamuan.
Tal pato kong cheng bahrau abih bo ong Cil Ha Ôn hu mbaok tame pato hu peih tabiak di xã Đạ Sar haong 30 urang bac lac likei, kumei urang đoàn, dam dara urang bangsa K’ho hu umo meng 15 tal 30 thun mai meng dom puk, palei dalam xã. Tal bac ini daok dalam bruk di danak dak “Khik ramik, patagok yaom glaong siam mekre meng kan di bangsa takik pambuak haong cakrok du lịch” dalam tỉnh Lâm Đồng, kayua Sở Ilamu, Thể thao saong Du lịch tỉnh Lâm Đồng pambuak haong huyện Lạc Dương peih tabiak. Ong Cil Ha Ôn brei thau, dom anek kamuan tame bac hu pato ilamu taih saong me-in kong cheng, jalan parang me-in, jalan pandar cheng ka nyu njauk ragu ragam. Hadei di tuk bac blaoh, dom urang bac jeng thau taih cheng biak gheih saong taih hu takik di nyu lac meng 2 tal 3 kadha cheng yau ye: uan tuai mai me-in sang, uan padai bahrau, uan thun bahrau… Ong oh kanal hadar ini lac tal bac hadom bo drei tame pato, tok caong lac tapa nan hu daong hasit prein yava di drei dalam bruk khik ramik ilamu kong cheng. Min piah patagok hu yaom glaong ilamu meng kan ini, brei hu bruk ba tangin tame di abih bhap bini.
Tui panuac khan di ong Kra Jăn Ha Nrang, urang jakar ilamu xã Đạ Sar, meng bruk tacei pato di ong Cil Ha Ôn saong dom urang karei dalam palei, rilo dam dara dalam xã taih hu taong abih dom kadha cheng di bangsa drei. Tal urak ini, xã Đạ Sar padang hu Kapul kong cheng chuyên nghiệp, bhian hu mbaok tame taih kong cheng dalam dom bruk dom kadha praong kayua palei peih tabiak. Ini oh lac bruk uan tabuan di dom nghệ nhân bo daok lac bruk bui sambai di xã tuk oh caik ka ilamu kong cheng lahik nao.
Gam haong kapul kong cheng xã Đạ Sar, huyện Lạc Dương daok hu 5 kapul kong cheng karei saong jaik 15 nyaom kong cheng di dom baoh sang daok di ban sit Lạc Dương saong dom labik ravang me-in yau ye: LangBiang, Plaei Cù Lần, Bein pakat negar Bidoup - Núi Bà. Dom kapul – nyaom kong cheng ini bhian piah pamere tuai damuai mai ravang iek. Bruk njauk biai nan lac, jaik abih dom urang di kapul – nyaom kong cheng ini jeng hu bruk abih hatung hatian tacei pato meng ong Cil Ha Ôn./.
Viết bình luận