Umo 75 thun, hu labaih 10 thun hu bhap bini pok ngak urang hu angan je, bruk bo ong Đàng Nguyên tuk halei jeng mboh suh sah dalam hatai lac brei khik ramik dom yaom glaong ilamu, adat cambat, tanarakun siam mekre di urang Cam. Anak bruk dom menuac ngak alat ragam meng kan dak harei dak takik nao, abih di nyu lac dom menuac thau ngak Ghi năng, Paranưng, Kadeit Sarainai, nan ye ong Đàng Nguyên hu nao tal yaok baoh sang nghệ nhân, jak ba dom halau janeng Cam duah jalan pasiam veik, khik ramik ka pahu bruk ngak alat ragam meng kan di urang Cam. Ong Hán Quân, daok di palei Tân Đức, xã Phước Hữu, huyện Ninh Phước lac: “Ong Nguyên lac urang hu angan je di palei Tân Đức drei. Urang hu angan je lac urang hu bhap bini jia meng pok ngak..”

Lac urang dalam mBan adat cambat palei Tân Đức, ong Đàng Nguyên jak ba dom urang gheih me-in alat ragam meng kan piah padang kapul alat ragam meng kan Cam bhian nao parang me-in, duh ka dom adat cambat di palei. Gam haong nan, ong daok dang tabiak peih rilo tal pato alat ragam Cam ka dom urang daok ranaih dalam palei, haong hatai caong pamedeih tagok bruk anit nghệ thuật, ranam dom alat ragam meng kan dalam dom urang daok ranaih. Sa-ai Đàng Phi Long Khánh, daok di palei Tân Đức, xã Phước Hữu, huyện Ninh Phước, hu ong Đàng Nguyên tacei pato jalan me-in Ghi năng, brei thau: “Dahlak mboh ong Đàng Nguyên lac urang hu angan je di palei thau cambaih ka alat ragam Cam……”

Ong Đàng Nguyên biak bui sambai kayua taong abih 7 urang anek di ong jeng lac urang đảng, dalam nan, hu 2 urang anek likei lac Thạc sỹ. Meng ilamu pachreih bac di baoh sang, ong jak ba dom sang dalam but pajaih padang Kadung jien pachreih bac piah yaok thun pandar ka bruk pok meyaom, pachreih ba, daong ka dom anek saih kham merat yam tagok dalam bac ta-a: “Urak ini, dahlak padang hu Kadung jien pachreih bac talei pajaih Tagalau 250 triệu đồng. Anak taco dalam talei pajaih meng pakat 1 tal đại học, thei bac joi jeng hu brei jien pachreih ba.”

Ong La Văn Điểm, bí thư Chi Bộ palei Tân Đức, xã Phước Hữu, huyện Ninh Phước, tinh Ninh Thuận brei thau, meng angan je di drei, dalam yaok pluh thun tapa, ong Đàng Nguyên halan hatian klah rabha haong mikva dom hagait bo drei thau, jak ba mikva klaak nao dom adat cambat klak oh daok lagaih, abih di nyu nan lac, ong daok hu pato pakai dom urang ranaih thau khik ramik saong me-in alat ragam di bangsa drei: “Ong Đàng Nguyên hu rilo rik daong ka puk palei. Bruk njauk ndom di abih dalam dom bruk ngak di ong lac bruk pachreih bac, anek kamuan halei jeng hu bac ta-a tal labik tal dhua, thei jeng hu bruk ngak tani tanat. Yaok thun, sang saong but pajaih hu pok meyaom anek kamuan. Meng bruk ngak di ong hu pambak tabiak bruk pachreih bac dalam but pajaih palei Tân Đức. Ong lac urang hu angan je nan ye kol dahlak ba ong tame mBan adat cambat palei, ong tui iek bruk peih ngak dom adat cambat. Ong jeng hu panuac ieu klaak dom adat cambat klak oh daok lagaih, ba tal lahik jien padai di mikva. Ong jeng hu pato ka rilo menuac thau pandar, thau me-in dom alat ragam Cam, saong padang kapul me-in alat ragam daong ka palei padang ngak Katê.”

Lac urang hu angan je, yaok panuac ndom, panuac biai, yaok bruk ngak di ong Đàng Nguyên jeng hu mikva pang tui, ngak tui. Yaom lac umo taha, praong thun, min urak ini ong jeng daok harei harei jak ba mikva tame padang ngak palei pala bahrau, ba ilamu, kỹ thuật tame pala – ngak, rik daong tani tanat an ninh chính trị, siam mekre sron mbon puk palei di bhum urang Cam. Meng dom bruk ngak ka bhap bini, ka puk palei, thun 2022, ong Đàng Nguyên hu Akaok UBND tỉnh Ninh Thuận pok brei harak meyaom ka dom bruk ngak rik daong tame cakrok KTXH, khik caga siam mekre, sron mbon, salamat puk palei./.