Amuk Nguyễn Thị Thao daok di puk Sào Lưới urak ini umo 75 thun, lac sa dalam dom “anek saih” praong thun saong tari tarieng abih dalam tal bac umo 70 thun labik pabah tasik Sào Lưới. Hadei di tukvak nao bac, urang kumei daok di bhum tasik hu mbaok jhuk, tangin thu kayua ngak bruk meng tangin takai, thau bac, thau puac biak cambaih laih. Hu yau nan, mai meng hatai kham marat di tal bac, bo tuk mai sang daok kham marat bac piah samar thau akhar di amuk Thao: “Tuk camriep kan lo, min dahlak jeng kham marat bac piah thau. Bahrau ini min dahlak thau puac paje, harei halei njauk ruak kik meng oh nao bac. Urang karei ndem lac taha yau nan bac piah ngak hagait min drei takre bac lo, takre vak lo. Tuk oh hu dien, mai sang truac gom nao mek ba khía bac nan, piah paguh tagok tal bac oh huac lac oh kanar kadha bac. Nao bac ieu tagok bac, dahlak jeng tagok bac ye”.

Tal bac U70 di tasik Sào Lưới hu peih tabiak jaik 2 thun ini mai saong hu khik tani tanat di harei som, harei but, harei suk yaok adit. Tal bac biak karei ini hu labaih 10 urang bac, rilo meng lac dom urang umo 60 tal 70 thun. Rahra pak ini kak kajap haong bruk nao tasik, dahlau deih, raidiuk kan kandah nan ye dom anai, dom cei oh hu nao bac. Urak ini meng hu mbaok tame tal bac, bo rilo urang thau puac, thau vak. Jeng kayua yau nan bo dak harei dak hu rilo urang kham marat bac, hu urang nao tasik blaoh ye mai bac, jeng hu urang kuhria blaoh bruk dalam sang piah piah mai bac.

Ndom biai haong kol dahlak, mikva thei jeng brei mboh hatai bui sambai kayua yam tapa hu dom bruk biak kan kandah dahlau deih. Pagap yau nao iek ruak, atau ngak harak gar hagait mikva thei jeng kalung tangin, urak ini mikva mbaoh tangin, vak angan di drei yau dom urang karei. Amuk Lê Thị Mệnh, khan lac: “Adei saai kumei pak ini thei jeng caong nao bac piah thau akhar yau urang. Nao taduan jru atau ngak hagait kadung tangin ye oh thau vak. Nao bac ka thau piah mbaoh tangin, dahlau daih oh hu jien piah nao bac. Urak ini thau puac, thau vak paje, tapuk puac hasit hasit hu ye puac samar lac oh hu.”

Tal bac U70 ini hu padang tabiak meng hatai suh sah di saai Đào Thị Thanh An, Akaok Kapul urang kumei xã Nguyễn Việt Khái. 10 thun dahlau, saai An mboh rilo urang kumei daok di dom pabah tasik dalam xã oh thau puac, oh thau vak nan ye gaok rilo kan kandah dalam raidiuk. Kayua yau nan ye, saai Thanh An likau Đảng ủy, UBND xã Nguyễn Việt Khái brei peih tal bac camriep di pabah tasik Gò Công. Oh lac pato oh mek jien bo saai daok nao jak ba yaok urang kham marat nao bac. Hadei di nan, rilo menuac mboh hu dom kein lagaih nan ye likau tame bac. Saai Thanh An patui veik peih tal bac ka dua di pabah tasik Sào Lưới saong jeng ngak tui jalan ngak lac “ba bui sambai tal dom anai, dom cei lac bruk bui sambai di drei”: “pato tui bruk di palei ka nyu lagaih, maong 4 mateh bier harei meng pato, harei ye dom anai, dom cei nao ngak, salah bruk meng tame bac. Tuk hu jak ba nao bac ye mboh dom anai, dom cai biak chreih chrai, thei jeng bui sambai. Tuk dom anai, dom cei thau vak angan di drei tagok bảng ye thei jeng biak drut drui. Dom anai, dom cei bui ye drei jeng bui tui, ba bui sambai mai ka yaok urang, drei mboh biak bui sambai”.

Dom tal bac ka urang umo 70 thun kayua saai Đào Thị Thanh An, Akaok Kapul urang kumei xã Nguyễn Việt Khái peih tabiak hu daong ka dom anai, dom cei umo praong thun di labik bhum tasik oh daok bruk oh thau akhar. Bruk ngak di saai oh lac daong pasiam dom kan kandah dalam raidiuk bo daok daong ka dom anai, dom cei hu thau rilo jang ka ilamo. Thun 2023, saai Đào Thị Thanh An hu pok manyaom lac kreih camin hadah pakat negar, hadah mbaok mata hu Thủ tướng Rajaei alin harak pok manyaom./.