Yaok adit, tal malam som saong malam jip, tal bac palahik bruk oh thau akhar haroh di palei Kret Krot, xã H’ra, huyện Mang Yang hadah gom tagok, yava sap puac akhar haroh di dom urang bac. Tal bac ini hu labaih 40 urang, meng anek naih tal dom amaik, dom ame urang Ba Na daok di palei Kret Krot.

Hadei di sa harei ngak bruk glaih glar, sa-ai Sen (umo 45 thun), nao tame tal bac njauk mon piah bac cih haroh, vak akhar. Yau rilo adei sa-ai kumei karei, sa-a Sen tok pasang, khin lakei meng tuk daok sit, sang kan kandah, oh hu bac ta-a. Urak ini tal bac hu peih tabiak, sa-ai khang hatai nao bac kayua ini lac jalan lagaih ka sa-ai thau akhar haroh.

Dreih yau nan, sa-ai Mah (umo 29 thun) urang daok dalam palei haong gauk jeng mai bac hadei di sa harei nao tagok puh. Plaak tangin thu lagu di urang randap haong bruk pan jaleing, urak ini daok kham merat vak yaok akhar, haroh. Yaom lac kan kandah, min sa-ai Mah khang hatai bac ta-a kayua jia lac bruk thau akhar haroh meda daong ka sa-ai, ka sang sa-ai hu rilo bruk: “Dahlak khin bac piah thau akhar haroh, piah tuk drei nao halei tah, drei thau haroh jeng mbuan jang. Yau urak ini drei oh thau akhar haroh nao halei jeng njauk urang preo puac, yau harei ba anek tame sang iek ruak, urang pandar cih angan bo drei oh thau cih, nan ye bác sĩ preo huac lo. Urak ini drei kham nao bac piah thau akhar haroh, piah harei hadei nao halei jeng mbuan, bingi jang”.

Taom gaok mikva di puk palei, Trung uý Lê Tuấn Thành – urang jakar Công an xã H’Ra, huyện Mang Yang thau cambaih dom kan kandah di mikva oh thau akhar haroh. Tuk mikva nao ngak harak gar di xã jeng gaok biak rilo kan kandah. Nan ye, hu bruk njauk hatai di pakat angaok, di pakat ủy karja palei, Trung úy Thành jeng gru pato piah daong ka mikva thau akhar haroh, thau yaok, meng nan salih jalan sahneng, jalan ngak dalam cakrok patagok bruk ngak mbang kinh tế.“Tuk camereip daok kan kandah kayua mikva daok malau. Mikva lac urang Ba Na nan ye bruk ndom biai nao mai haong mikva gaok kan kandah hasit. Piah khik tal bac suai lavik ye brei pambuak pagam haong hệ thống chính trị, dom akaok palei, dom urang công an, pambuak bruk bac haong bac joi ye hu  pok meyaom, alin hadiah pandap ka urang bac”.

Xã H’ra, huyện Mang Yang, tỉnh Gia Lai hu 9 puk, palei, urang bangsa takik hu tal 2/3, rilo meng lac urang Ba Na. Ông Dung – Phaok Chủ tịch UBND xã H'ra brei thau, bruk gru Lê Tuấn Thành gam pato akhar haroh gam pablak tame bruk patahu khan, jak ba bhap bini, daong ka Công an puk palei pambuak pakajap jang talei rohim haong bhap bini, ngak siam bruk jak ba.‘Thau akhar haroh mikva hu thau rilo bruk jang, tuk drei pathau khan jeng mbuan jang, hadei ini mikva daok nao ngak mbang, pala drak, blei khak, blei jru tavao piah pala drak, patagok bruk ngak mbang. Karja palei ba tabiak bruk yau ye pathau khan ka bruk lakhah caga tuk daok sit, oh ka tal umo thun tui hukum, khin gauk dalam but pajaih, ye mikva mbuan thau jang. Caong khin lac tal bac ini daok hu peih di palei Kret, Krot, ye harei hadei hu peih praong tabiak tal dom palei karei”./.