Lac Urang hu angan je dalam bhap bini urang Low ban Trà Vinh, ong Trần Phát (ndih tapui thun 1952), urak ini lac Akaok mBan taom gaok Kapul urang Việt Nam daok di taneh ia langiu, bhian hu bhap bini pok meyaom, pilih ruah nao hu mbaok dalam Nyaom roya urang lambaok dom bangsa takik pakat negar mbang ka II di Hà Nội (thun 2020).

Dom thun tapa, meng angan je di drei, ong Trần Phát jeng talei pambuak bruk praong di karja haong bhap bini urang Low, bhian pathau khan, jak ba urang Low ngak njauk tui sarak, hukum di karja, pachreih ba urang Low tari taring ngak mbang, daong cakrok KTXH ka tỉnh. Urang Low bhian hu ilamu dalam bruk ngak mbang, pablei salih, nan ye raidiuk mbang ngui daok dang dak harei dak tagok, dom sang kan kathaot dalam bhap bini urang Low biar jang rilo duk haong tanut kuhria rah tapa di tỉnh.

Urang hu angan je dalam bhap bini urang Low biak abih hatai dalam bruk pato megru saong bruk ngak pahla. Dom thun tapa, urang hu jak ba Hội Tương tế urang Low rik daong padang ngak 7 baoh sang jum pataom, daong brei yaok ratuh triệu đồng ka Kadung jien daong ka urang kan kathaot di ban Trà Vinh, Kadung jien patagok “tài năng trẻ” di tỉnh, alin hadiah pandap brei ka dom sang kan kathaot tuk lễ tết; alin hadiah pandap ka urang taha di tuk uan harei dunya urang praong thun....

Gam haong ong Trần Phát, ong Dư Tráng Hồng (SN 1949), bangsa Low, jeng hu thau tal lac Urang hu angan je dalam bhap bini DTTS urang Low. Ong urak ini lac Chủ tịch Hội Tương tế urang Low TP. Trà Vinh. Meng angan je di drei, ong Dư Tráng Hồng jeng kham merat pathau khan, jak ba urang Low ngak njauk tui adat hukum di Karja, rik daong ka rillo bruk KTXH, bac ta-a, pato megru. Pagap yau bruk ong jak ba hu jak jeng dom sang urang Low kuac mek talang gauk gar di 5 nghĩa địa saong jao taneh ka Karja padang ngak dom bruk kein laba ka bol bhap rahra.

Gam haong nan, jak ba bhap bini urang Low sangka tal bruk bac ta-a di anek bhik urang Low. Hu bruk sangka di Đảng saong Karja brei padang labik pasak ilamu urang Low daok di jalan Nguyễn Đáng praong 11.000m. Dalam mblang bein labik ini, Hội tương tế urang Low hu padang Sang bac Mầm non – Tiểu học Tân Minh Trí hu 16 bilik bac mẫu giáo saong tiểu học hu ginup abih pandap bac saong pato. Meng bruk pato pakai haong yaom jien sahui labaih 4 tỷ đồng kayua mikva halan hatian rik daong. Dalam tukvak gaok kan kandah kayua jit ruak COVID-19 sang bac brei padeih pato, raidiuk di 63 gru pato, urang ngak di sang bac Tân Minh Trí gaok rilo kan kandah, Hội Tương tế urang Low hu daong labaih 2 tỷ đồng piah sang bac bayar jien bilan ka gru pato, ka urang ngak di sang bac saong daong ka anek saih yam tapa kan kandah.

Tui panuac di ong Lê Thanh Bình, Phaoak akaok UBND tỉnh Trà Vinh, dom Urang hu angan je dalam urang Low hu patagok bruk ba akaok nao dahlau, kham merat  dalam bruk ngak saong khik hu talei pambuak bruk haong dom gah chức năng, samar khan brei thau dom bruk kan kandah tavak tavaiy dalam bhap bini urang Low, daong ka dom gah chức năng thau cambaih bruk piah samar langyah, rik daong pakhang hatai jia dalam bhap bini urang Low saong patagok bruk jum pataom bangsa, khik ramik an ninh chính trị, siam mekre salamat puk palei./.