Dalam rilo thun tapa, ong hu rik daong biak rilo dalam peih ngak dom bruk jak ba, bruk pakacah gauk ranam taneh aia di puk palei, pasiam, pakhang, padang talei gul pataom taong abih bangsa hu bhap bani iek prong, jia tui. Kadha “Menuac gheih bruk siam” adit ini, khaol dahlak khan brei thau kadha vak di Đoàn Trúc angaok harak báo Bình Thuận hu ndom ka “Urang jakar Mặt trận bangsa Cam abih drei ka bol bhap rahra”.

Meng bruk ngak di drei ong Xích Kháng gam haong Mban điều hành palei hu jhul khang bruk pathau khan, jak ba bhap bani dalam palei ngak njauk tui dom sarak di Đảng, hukum di Karja, dom adat di palei, di labik daok. Hu mbaok tame bruk duah thau dom hagait rah tabiak dalam rai diuk, samar langyah dom kandah kandaiy, tavak tavaiy di labik daok, oh caik rah tabiak bruk hagait srau kadau.

Yaok thun, ong duah thau cambaih bruk di palei piah palih ruah dom asal kadha, dom bruk ngak lagaih piah peih ngak siam 5 asal kadha di bruk jak ba “Taong abih bhap bani gul pataom dak padang palei pala bahrau”. Pambuak bruk jak ba bhap bani rik daong pren yava, jien padai piah tuh bê tông abih 5 jalan nao mai dalam palei atah abih tih labaih 943 m, haong yaom jien labaih 1 tỷ đồng. Ba tabiak bruk “Halaw janeng, agama khik iek an ninh trật tự”. Jak ba bhap bani tut mek angan baoh sang ilamo, hu mbaok tame dom bruk ilamo, daoh tamia, padhih, bruk kế hoạch hóa gia đình, ba gauk bhian tabiak puh ramik puk palei, jalan mbak nao mai dalam palei, pataom mek hareik, pala phun hijao...

Gam haong nan, dom bruk ngak pah hala sangka iek glang tal urang kathaot jeng hu caik hatai sangka. Meng thun 2017 tal ini ong hu pambuak bruk jak ba Kadung jien “Brei ka urang kathaot” yaok thun jeng mek hu tanut ba tabiak; alin hadiah 1.850 pok pandap ka urang kathaot, urang hu rai diuk kan kandah; pambuak bruk peih dom tal pataow pathram panduan jao ilamu kỹ thuật tame dalam bruk ngak nong saong raong glang, klah rabha dom ilamo siam gheih piah ka mikva khang hatai pandar ilamu khoa học kỹ thuật tame bruk ngak mbang, raong glang piah ba mai kein laba ka bhap bani. Meng hu yau nan, tal urak ini, palei hu taduan brei angan oh daok hu baoh sang taik tahak, dalam palei oh daok baoh sang kathaot.

Ndom ka ilamu ngak bruk Mặt trận, ong Xích Kháng brei thau: “Khin ngak bruk hu siam lagaih, dahlau di abih, urang jakar njauk ba akaok nao dahlau, tuk halei jeng khik hu angan je di drei piah ka bhap bani jia tui, pang tui. Dom bruk ngak di Mặt trận brei tabiak meng hatai caong khin saong kein laba di bhap bani, brei daok jaik bhap bani saong tuk halei jeng caik quyền lợi di bhap bani tagok angaok nan ka meng ngak hu”.

Meng kham merat dalam bruk ngak, tukvak tapa, ong hu Ủy ban Trung ương MTTQ Việt Nam, Ủy ban MTTQ Việt Nam tỉnh, Ủy ban MTTQ Việt Nam huyện Bắc Bình pok brei harak meyaom, ba-ar meyaom kayua ngak siam dalam bruk ngak di Mặt trận. Bahrau ini, ong hadah mbaok hadah meta hu Ủy ban Trung ương MTTQ Việt Nam pok angan saong pok brei harak meyaom kayua hu bruk ngak siam dalam bruk Mặt trận tukvak thun 2017 - 2022./.