Yaok melam puac adit, sa-ai Wa Hi Da Bi Vi, gam haong labaih 20 adei uranaih dalam palei jak gauk mai Sang ilamu Cam piah pasram tamia. Tuk camereip, rilo adei mboh kan, oh caik hatai pasram dom ragam tamia nan ye mboh alah. Min meng tari tareing abih hatai, sa-ai Vi pachreih ba hu dom adei mai pasram gilac veik.
Adei Pha Ti Hah, umo14 thun, bangsa Cam, daok di xã Xuân Hưng khan brei thau “ tuk birau pasram, rup adei daok khang, min anai Vi kham pato, tacei ka adei miat; tal harei ini adei tamia gheih dom ragam tamia Cam. Anai Vi lac urang pachreih ba ka hulin saong dom ayut sahabat piah ka khol adei thau anit ranam jang ragam tamia ini.”
Dom ragam tamia di bhap bini Cam hu meng lavik mai, nan ye piah tamia njauk ragam, langiu di bruk patoa veik dom hagiat hu bac blaoh, sa-ai Vi daok hu megru veik meng dom urang kumei umo taha, hu ilamu dalam palei. Langiu di nan, sa-ai daok paneh tabiak rilo ragam tamia birau ndung bak ilamu meng kan di bangsa Cam piah kapol pasram saong parang me-in. Bruk ngak nan hu mikva dalam palei biak njuak hatai pachreih tui.
Piah khik hu hatai takre ka dom adei uranaih, tuk dalam palei hu peih harei pataom atau hu ngak bruk hagiat nan, sa-ai Vi jeng tut angan brei kapol kapulan tamia dom kadha meng kan di bangsa Cam. Tal urak ini, urang dalam nyaom kapulan bhian hu mbaok dalam dom danak dak daoh tamia di palei.
Daok lac dược sĩ ngak bruk di Balai Y te xa Xuân Hưng saong lac Pho Bi thu Chi bộ puk 4, sa-ai Vi tuk halei hu mikva pang tui, jia tui. Meng abih hatai haong bruk ngak, sa-ai hu tacei pato, jak ba mikva dalam bhum khik caga prein yawa di rup eng saong bhap bini.
Dalam tuk ngak bruk, sa-ai mboh lac daok hu biak ralo mikva tuk njauk ruak bhian takik caik hatai, eng drei nao blei jru mai menyum bo oh nao iek ruak ngak brei ruak jeng trak. Nan ye, sa-ai kham tacei pato ka mikva thau dom kadha brei thau lac ruak, jeng yau kanjak jhak di bruk eng drei taong ruak di sang piah mikva thau, blaoh nao iek ruak, khik caga prein yawa.
Langiu di nan, sa-ai Vi biak caik hatai tal bruk pachreih bac. Di labik sa-ai daok hu rilo adei uranaih tok bac thau akhar blaoh padeih daong bruk ka amaik ame. Sa-ai Vi kham taom gaok amaik ame dom adei piah khan veik dom bruk di rup drei saong jak ba urang kham brei anek hu nao bac. Meng hu yau nan tal urak ini, bruk bac da-a di dom adei dak harei dak hu sangka saong hu dom adei daok bac gah y khoa, rilo adei karei bac bruk ngak.
Muk Trịnh Thị Ngọc Thúy, Phaok akaok UB bhap bini xã Xuân Hưng khan lac, Wa Hi Da Bi Vi lac urang đảng yau kareih camin di palei. Langiu di ngak siam bruk chuyen mon, Vi daok abih drei hu mbaok tame dom bruk daong khik ramik saong patagok ilamu siam gheih di bangsa Cam. Meng dom rik daong nan, birau ini, sa-ai Wa Hi Da Bi Vi hu UB bhap bini tỉnh Đồng Nai alin harak meyaom urang bangsa takik hadah krah pakat tỉnh./.
Viết bình luận