Nao haong ong di mangaok jalan tuh be tong jangaih makre di palei Cam Chakleng, ong Quảng Đại Thính brei ka kol dahlak thau lac, dahlau deih, jalan ini bhian hu gluh baok di bilan hajan, mikva nao mai, pajeng pandap kaya nong biak kan kandah. Ong lac sa dalam dom urang ba akaok nao dahlau dalam bruk alin taneh ngak jalan, rik daong harei ngak bruk piah padang palei Chakleng hu yau harei ini.

Thun 2020, ong hu jak ba mikva rik daong labaih 500 triệu đồng piah ngak jalan nao hacih, mekre. Gam haong bruk Kanja buh jien tame labaih 23 tỷ đồng, palei Chakleng hu padang ngak sang parang iek pandap panda, jalan tame palei ngak, jalan dien truac hadah, ngak jeng mbaok bahrau dalam labik mikva bangsa Cam.

Langiu di nan, labik klaak hareik meng kan di palei hu ong Thính jak ba mikva rik jien, rik prein tame puh ramik saong tuh be tong jangaih, siam, jeng  labik pataom gauk ngak adat cambat di mikva dalam palei. Jalan mbak nao mai hacih, mekre, njauk haong angan ieu lac pasak di huyện Ninh Phước.

Dahlau di nan, di thun 2017, ong Quảng Đại Thính lac urang hu buh prein praong tuk hu jak ba mikva klaak dom adat cambat oh daok lagaih piah padang raidiuk ilamo, khik caga haci hacih alam môi trường. Tui ong Thính, meng kan, bangsa Cam hu adat ka bruk matai lahik lac sang halei hu manuac lahik, oh hu pandar phun kayau klak piah padang kajang piah ieu yang bo gauk gar njauk tagok glai kaoh kayau bahrau ba mai padang ngak kajang ngak ndam matai ye urang metai meng hu siam makre. Kayua yau nan ye, bruk jah tak glai dak harei dak rilo, mikva gam lahik jien nao kaoh kayau glai gam ngak jhak tal alam môi trường.

Piah klak adat oh daok lagaih ini, ong Thính nao taom gaok dom urang taha dalam palei piah ginum gauk ba tabiak jalan pandar dom mbaik pasei hộp urak ini piah ngak khung padang kajang piah ngak ndam matai salih ka phun kayau. Ong langyah lac, mayah pandar pasei ye mikva meda pandar hu veik hadei di tuk ngak blaoh ndam matai, gam takik phun jien, gam daong khik ramik alam moi trong saong oh ngak suan adat hukum.

Min, dom halau janieng oh khin peih ngak adat ieu yang dalam dom kajang ngak meng pasei. Khang hatai ngak ka pahu, ong Thính salih tapa jalan pathau khan, jak ba dom baoh sang dalam but pajaih khang hatai salih. Tuk camriep, tok hu dom sang ngak tui, min hadei di nan, abih palei Chakleng ngak tui saong meng nan klaak nao bruk palai pajoa glai. Tal urak ini, dom palei Cam pak Ninh Thuận jeng bac megru ngak tui. Meng nan, raidiuk, mbang ngui saong mbaok mata puk palei di dom palei Cam dak harei dak hadah hadai, siam makre.

Palei Chakleng danei angan haong bruk manyim khan bai di urang Cam. Pak ini, hu rilo rai urang kumei naih joi dalam bruk ngak, ong Thính hu jak ba mikva pato veik bruk ngak ka anek taco di drei piah khik ramik dom bingu hala meng kan di bangsa Cam. Meng nan, rai ranaih daok patui veik bruk manyim khan bai meng kan saong palei Chakleng jeng lac rivang iek du lich danei angan di Ninh Thuận.

Ong Nguyễn Hữu Tuấn, Bí thư Huyện ủy Ninh Phước brei thau: “Huyện tuk halei jeng sangka patagok labik dang di urang hu angan je piah pathau khan, jhul kadun likuk dom adat oh daok lagaih dalam bhum mikva bangsa Cam. Bruk ini hu rik daong paglaong raidiuk, padang ngak palei pala bahrau, hadah krah, siam makre saong kaya mada.