Bruk menyim jih dalah di urang Thái daok pak Quỳ Châu hu meng lavik rai mai. Dahlau diah,jih dalah hu ngak piah pandar dalam sang, hadei di nan ngak jeng pandap panda piah pablei salih. Meng dom baoh sang ngak mbang sit sot, darak pasar oh grap tanat, hu bruk daong di karja palei, dom baoh sang dalam palei thau pambuak bruk haong gauk, daong ba gauk piah ngak. Akaok thun 2009, Hợp tác xã (HTX) Palei menyim jih dalah Hoa Tiến hu padang tagok ngan haong 60 urang. Dom urang dalam HTX hu thau ngak tabiak dom janih pandap panda ngan haong ralo mẫu mã, ralo janih ba mai hatai jia dalam tuai damuai urang blei pandar.

  Kayua daok atah dom pasak pablei salih, bruk darak pasar saong bruk meyaih khan pandap panda oh ka pabak hu nan ye dom janih pandap di HTX ralo meng lac piah pablei dalam palei, ngak tui đơn đặt hàng nan ye oh ka ba mai kien laba glaong, jien mek tame oh tani tanat. Meng anak bruk yau nan, sa-ai Sầm Thị Bích - Akaok HTX Palei ngak Hoa Tiến – brei thau: pandap jih dalah hu dom ban, ngành daong palaghaih, ba nao parang iek, nyaom darak pasar saong hu tuai negar langiu biak sangka. Darak pasar blei pandar pandap ini urak ini oh lac tok hu dalam negar bo daok yam tabiak negar langiu yau: Trung Quốc, Lào, Thái Lan, Pháp, Canada; kapul lingiu rajaei CRAP LINK la sa khách hàng thường xuyên di palei ngak.

  Ong Lê Bá Ngọc – Phaok akaok Kapul Pablei tabiak negar lingiu pandap thủ công mỹ nghệ Việt Nam – khan lac: ralo menuac mboh tatuak drei anak bruk gheih, mekre di jih dalah, abih di nyu lac jih dalah Quỳ Châu mek hu đẳng cấp dunya. Dom janih pandap jih dalah yau khan, ao Thái, khăn piêu… hu pandar dom ilamu kỹ thuật menyim biak karei yau: Menyim pagam bingu ala angaok daneng menyim; menyim ikat; menyim thảm. Jih dalah di palei  Hoa Tiến hu urang takre blei ralo oh lac kayua hudom bingu ala gheih mekre meta bo nyu daok ndung bak janih biak karei, hu nhuộm meng dom janih hala paik dalam bein atau meng dom phun glai hu angaok bhum taneh Quỳ Châu yau: Cà phê, hala tia, hala ổi, hoàng đẳng, hala hom, linka… Kayua yau nan ye, jih dalah  Quỳ Châu hu sambo màu hadah, karei jang dom janih pandap jih dalah di dom bhum palei karei. Bruk nhuộm sambo màu pandar dom janih hareik, phun kayau, bingu hala di urang Thái bo oh labik halei  tui samu ngak brei patagok yaom pandap panda jih dalah jeng janih pandap thời trang cao cấp; dom janih pandap di bangsa Thái Việt Nam hu mbaok di darak pasar Mỹ.

Ong Lê Hải Lý - Akaok Jabat ngak nong saong patagok palei pala huyện Quỳ Châu – brei thau: Anak tal, huyện meda daong ka dom HTX dom bruk yau: hu mesraiy phun jien; pato pakai patagok ilamu khik iek ka urang jakar HTX; pambuak haong dom pakat, dom ngành meyaih khan pandap, peih dom tour du lịch cộng đồng piah ka HTX palei ngak jhul pakhang bruk pablei pandap; hu mbaok tame dom nyaom darak parang iek…

Jasi lang tapa sap Cam