Urang kamei bangsa Khơ-mú daok ngak talak 

Lac sa dalam takik menuac dalam bhap bani bangsa Khơ-mú daok di Điện Biên thau cambaih ka diễn tấu saong ngak talak idung, amuk Quàng Thị Dua brei thau, sap talak nan lac sap meng hatung hatian di urang kamei Khơ-mú brei mboh hatai anit ranam gauk dalam sang, hatai thau dhal phol amaik ame raong pato drei jeng manuac jeng urang. Tuk tal jeng dara, urang kamei Khơ-mú daok mek sap talak piah ndom tagok hatai anit ranam urang likei bo drei njauk hatai.

Talak idung di urang Khơ-mú hu ngak meng nding kreim, la-a cakak jeng tuk piah pandar. Nding krem hu cakak atah jaik 50cm, 2 akaok hu pacang sir meng 2 meta di nding kreim, angaok rup talak hu cao dua gilaong sit, 1 gilaong di akaok gah angaok piah bluh yava tame, 1 gilaong di akaok gah ala piah kateik tabiak sap glaong biar. Urang yuk talak brei thau mek yava, khik nhịp, pandar yava meng idung yuk tame gilaong talak piah ngak jeng sap saong ragu.

Tuk me-in talak idung, nghệ nhân tok pandar sa tangin gam khik mbaik talak ka nyu njauk labik, gam bấm gilaong talak, daok tangin diah tamia tui ragam. Jalan yuk talak di urang kamei Khơ-mú daok biak karei di labik, urang gam yuk sáo gam pablak tame dom ragu ragam bingi pang panuac daoh lai la-an. Tuk yuk urang daok hu chat tui ragu ragam, ngak ka rup babhap lamin lamuac. Dom kadha daoh bhian hu urang sahneng tabiak tui dom ragu daoh bhap bini meng kan.

Tui amuk Dua, dam dara harei ini takik thei daok thau yuk saong ngak tabiak dom alat ragam di bangsa drei. Kayua bruk ngak mbang ngak huak, rai diuk jeng hu rilo salih bahrau ngak ka labik parang me-in ilamo bhap bani di urang Khơ-mú nyu sit veik. Anal bruk yau nan, huyện Mường Chà, tỉnh Điện Biên hu ba tabiak rilo jalan ngak piah khik ramik, patagok ilamo hadah krah ka dom rai rah, dalam nan bruk pato veik ka dom rai rah dam dara, ayut daok ranaih dalam palei daoh veik kadha daoh bhap bani, yuk talak; mboh hu siam lagaih./.

Urang lang: Jasi - 11/1