-Oh tuk halei hareik tuh tabiak meng kadung ni long gilac rilo ye urak ini. Kayua kadung ni lông kan si phân hủy, urang blei tuh tabiak rilo yau nan ye nyuk dak harei dak pataom jeng mbuk, ngak ka alam moi truong gaok nerak trak. Piah rik daong trun bruk ini, Kapul urang kumei phường Mỹ Đông, ban sit Phan Rang-Tháp Chàm, tỉnh Ninh Thuận hu tabiak mbaok kalup kapul “ Teik bai nao darak – hadah hambaok di urang ngak mbang ngak huak” piah ieu bhapbini takik pandar kadung ni long saong oh prah kadung ni lông tabiak lingiu, rik daong paglaong akaok sahneng khik caga alam moi truong. Hoài Hương – urang pambuak bruk di rayo sap ndom VN brei ka dom bruk ngak hu di mo hinh ini:

-Piah ngak jeng bruk randap saong pachreih dom urang gam tame, page harei adit yaok adit, dom urang dalam kalup kapul “ teik bai nao darak –hadah mbaok meta di urang ngak mbang ngak huak” pataom tame di sa libik piah gam saong gauk teik bai nao darak, gam tui nan lac ba tui hala pataiy, harak báo piah papaok dom janih pandap panda salih ka bruk pandar kadung ni long. Meng bruk ngak siam ini, kalup kapul hu pachreih rilo urang tame, rik daong takik pandar kadung ni long. Saai Trần Thị Ngọc Trí, Chủ nhiệm kalup kapul brei thau:” adei saai teik bai nao darak saong mboh cambaih nyu lagaih jang, oh mblo tabiak kadung. Dom pandap jeng daok kheih dalam bai, takik ngak nerak alam moi truong”

 - Sang saai Phạm Thị Hữu Huê, di phường Mỹ Đông, ban sit Phan Rang – Tháp Chàm hu 5 urang. Yaok harei nao darak, piah papaok dom janih nyam, ikan, ralaow saong dom janih pandap panda karei ba mai sang, saai njauk pandar meng 7 tal 9 kadung ni lông praong sit. Bruk ini njauk lac dom kadung ni long meda tuh tabiak lingiu. Saai kuhria, meyah 10 sang, 100 sang saong bhapbini jeng yau nan lac yaok harei hu yaok trieu kadung nilong hu prah tabiak alam moi truong. Sahanneng hu bruk jhak ini, saai Phạm Thị Hữu Huê hu tame kalup kapul “ teik bai nao darak –bruk hadah mbaok meta di urang ngak mbang ngak huak” saong jak ba dom urang jaik tabhia takik pandar kadung ni long. Saai Phạm Thị Hữu Huê khan lac” sa harei pandar 9-10 baoh kadung, yau nan lac sa bilan thau hadom ngak nerak alam moi truong. Yau nan ye dahlak jak ba sang, urang gauk gar, mikva di dahlak pataom tame kalup kapul teik bai nao darak piah takik ngak nerak. Blei ikan lac mek hala pataiy papaok, daok njam rathun ngò…lac mek harak báo papaok veik. Yau nan lac dom kadung hareik ini oh prah tabiak jalan veik”

Phường Mỹ Đông, ban sit Phan Rang – Tháp Chàm daok tapeng tasik, tanek sit menuac rilo yau nan ye bruk tuh hareik, kadung nilong…ngak jhak tal alam moi truong tuk halei jeng lac bruk duh tahai di puk palei rilo thun tapa oh ka hu langyah catang. Yau nan ye, kalup kapul “ teik bai nao darak –hambaok meta di urang ngak mbang ngak huak” hu rik daong salih bruk randap pandar kadung ni lông, paglaong akaok sahneng di urang bhapbini, tame khik caga alam moi truong daok meng dom bruk ngak yaok harei moang ye mbuan. Saai Nguyễn Thị Kim Yến, akaok kapul urang kumei phường Mỹ Đông, Phan Rang – Tháp Chàm, tỉnh Ninh Thuận lac: “ kalup kapul teik bai nao darak barau dak padang labaih sa bilan. Tapa bruk pathau khan di dom adei saai kumei tal hoi vien urang kumei dom puk palei lac dom urang sahaneng hu bruk pandar kadung nilong ngak jhak tal alam moi truong, meng di nan takik pandar kadung nilong tuk nao darak”

         Takik pandar kadung nilông, pamaong tal oh pandar kadung ni lông lac bruk ngak di kalup kapul “ teik bai nao darak –hadah mbaok urang ngak mbang ngak huak”. Yau nan ye, njauk hu sangka di karja puk palei piah kalup kapul ngak bruk dak harei dak siam, pachreih rilo urang pataom tame ndom oh saong kadung nilong./.