Thun bac 2017-2018, tỉnh Ninh Thuận hu labaih 132.ribau anek saih di  3 pakat bac, dalam nan hu labaih  33.ribau anek saih bangsa takik. Tong abih dom sang bac, labik bac daok caga ka thun bac bahrau, meng labik bac, pandap bac, tal bruk pato sap  Việt ka anek saih bangsa takik caga tame tal bac 1. Aí Nghiêm, urang vak di rayo sap ndom Việt Nam dok di ban raya Hồ Chí Minh hu khan ka bruk ni:

Dalam dom harei ini, dom gru pato di sang bac Tiểu học Phước Nhơn, xã Xuân Hải, huyện Ninh Hải, tỉnh Ninh Thuận biak glaih glar haong bruk pato sap Yuan ka dom adei anek saih bangsa Cam caga tame tal bac 1. Ngan haong anek saih bangsa takik, tuk tame sang bac dom adei njauk ngak randap haong sa sap ndom karei jang sap di bangsa drei, nan ye dalam tukvak bac da-a jeng gaok oh takik cuang kandah. Anai gru Thành Nữ Khoa Trương, Akaok sang bac Tiểu học Phước Nhơn brei thau: ngan haong dom adei hu tapa blaoh tal bac mẫu giáo ye ndom sap Yuan tuk tame tal 1 hu mbuan lagaih jang. Daok dom adei oh ka tapa tal bac mẫu giáo ye biak kan kandah dalam bruk bac da-a, ndom biai nao mai, kayua yau nan ye, brei hu hu bruk kham merat di gru pato. Thun bac 2017 -2018, sang bac hu 600 anek saih. Taong abih jeng lac anek saih bangsa Cam.

Anek saih bhian nao bac di dom sang bac hu iek glang tani tanat. Dom anek saih kham bac piah jeng….

Tukvak ini, dom sang bac tiểu học bhum urang bangsa takik dalam tỉnh Ninh Thuận peih bruk pato sap Yuen ka anek saih tal sa. Dalam tuk nan, ralo sang bac trung học cơ sở peih bruk sinh hoạt akaok thun piah ka anek saih ngak randap haong gru pato, haong ayut sahabat. Thun bac 2017-2018, Sang bac Trung học cơ sở Nguyễn Bỉnh Khiêm, xã Phước Nam, huyện Thuận Nam, tỉnh Ninh Thuận hu sa sang bac praong, siam, ginup labik bac ka labaih 930 anek saih di 26 tal bac. Anai gru Não Thiên Minh Nguyệt, Hiệu trưởng sang bac brei thau: Jaik abih anek saih di sang bac lac anek kamuan bangsa Cam. Thun bac 2016-2017, labaih meteh dom anek saih bac khá, jioi. Anek saih chyên cần hu labaih 95%. Di bhum urang bangsa takik, bruk bac da-a hu yau nan, lac sa kham merat biak prong di Ban giám hiệu saong dom gru pato. Piah paglaong siam mekre bruk pato saong bac dalam tukvak anak tal, anai gru Não Thiên Minh Nguyệt, Hiệu trưởng sang bac khan lac:

  Tui Sở Pato megru tỉnh Ninh Thuận, tỉnh urak ini hu 24/24 sang bac tiểu học di bhum urang Cam pato saong bac akhar Cam. Bruk pato saong bac akhar Cam hu peih ngak pablak haong pato saong bac dom môn bac phổ thông, hu pato 3 tiết sa adit ngan haong sang bac peih bruk pato 1 van dalam sa harei saong 4 tiết dalam sa adit ngan haong sang bac pato 2 van dalam harei. Ong Lưu Văn Đạo, chuyên viên Phòng Giáo dục Dân tộc dalam Sở Pato megru tỉnh Ninh Thuận brei thau: Thun bac 2017-2018, hu 22 sang bac dalam abih tih 24 sang bac tiểu học bhum urang bangsa Cam hu ngak lầu siam mekre. Daok tapuk giáo khoa hu tái bản jaik 22.000 baoh ka dom anek saih saong gru pato. Langiu di bộ tapuk giáo khoa ka dom khối lớp daok hu tapuk bài tập, vở tập viết di khối tal 1,2 saong tal 3, piah daong ka anek saih bac, pasram. Abih tih yaom jien buh tame in bổ sung tapuk giáo khoa sap Cam nan lac jaik 400 triệu đồng.

Meng bruk kham merat di karja dom puk palei, di gah pato megru, gam haong bruk kuhria caga biak tani tanat taong abih gah di dom sang bac, tỉnh Ninh Thuận hu caga blaoh blai ka harei tame thun bac bahrau 2017- 2018./.