Pruh jru pametai anek ruak 

Dahlau abih, yau panuac khan di dom chuyên gia, bruk rilo urang daok di dom tỉnh - bal hu manuac njauk ruak, salih bruk bhian randap blei pandar meda daong ngak brei siam jang bruk pacang caga jit ruak pambak prong. Taphia di nan, jalan ngak ini  jeng daok dang ka gah công nghiệp tiềm năng – pablei salih điện tử atau pablei salih online.

Đơn hàng tagok samar, urang ba jao taduan mek tagok jaik dua mbang…nan lac dom kadha brei mboh jabat chức năng ndom njauk tuk lac jien mek tame di dom doanh nghiệp gah pablei salih điện tử tagok tal jaik 30% dut haong tukvak ini thun dahlau. Ini jeng lac bruk brei mboh jalan “ ba kan kandah jeng mbuan lagaih” tuk halei jeng meda hu dalam bruk pablei salih. Yau nan min jalan peih tabiak ka sa kapul nyaom, pak ini nan lac dom urang - doanh nghiệp ngak gah pablei salih điện tử daok tỷ lệ thuận haong kein laba – hatai caong khin biak biai di bhap bani halei oh? Tukvak jit ruak rah tabiak srau dhau meng blaoh hu javap jaleiy ka panuac sua tangi ini: nan lac taphia di dom kein laba hu mboh cambaih meng bruk ngak ini jeng hu mboh dom urang, doanh nghiệp pambak tame jalan ngak mbang pablei salih online nan lac urang blei pandar oh hu mong iek tapak, taong yaom pandap panda dahlau di tuk ba-ayar jien saong taduan mek pandap, hu srau meluk pandap oh siam, pandap ja, pandap ngak suan bruk sở hữu trí tuệ… ngak khat lahik tal urang blei pandar.

Biak di nyu, taduan hu panuac brei thau gilac meng bhap bani, taphia di nan kuhria mboh dahlau bruk nan, jabat chức năng hu ba tabiak dom jalan ngak ka bruk ini yau: peih bruk mboh tangin sanya “Ndom oh haong pandap ja dalam bruk pablei salih điện tử” atau patagok “Hệ thống khik iek saong langyah kadha brei thau, yak bak, meriak gauk trực tuyến dalam bruk pablei salih điện tử: online.gov.vn”. Bahrau di abih lac dom harak gar tacei pato pandar dom urang pablei salih, kapul nyaom hu website saong pandar bruk pablei salih điện tử njauk hu pasang iek, mong iek gilac, pok klak dom pandap panda suan adat hukum. Saong tok kuhria tal harei 02/03 hu 8 ribau 900 dalam abih tih 750 ribau gian hàng njauk pasang iek, duah mboh, xử lý vi phạm; hu jaik 2 triệu 800 ribau pandap panda njauk pok klaak ba tabiak website saong xử lý hậu kiểm, mboh rilo nan lac dom janih pandap pambuak pagam tal bruk pacang caga jit ruak. Amuk Nguyễn Thị Minh Huyền – Phaok Cục trưởng cục Pablei salih điện tử saong kinh tế số Mentri Công thương brei thau, dom jalan ngak ini meda hu peih ngak veik khang jang dalam tukvak anak tal.

Oh lac tok brei thau ka dom jalan ngak patrun bruk ngak suan adat hukum; oh lac tok pachreih urang blei pandar brei thau ka bruk bleik saleik dalam pablei salih online, jabat chức năng gam haong dom chuyên gia jeng kakei njauk caik hatai – tacei pato bhap bani jalan blei pandap panda siam laghaih dalam bruk pablei salih online. Chuyên gia Trần Trọng Tuyến, Tổng thư ký Hiệp hội Thương mại Điện tử Việt Nam ndom lac, pablei salih điện tử daong ka urang blei pandar hu rilo janih pandap boh oh njauk hạn chế ka gah không gian, gaok mai yaom biak lap min jeng daok hu dom rủi ro. Yau nan ye manuac urang drei njauk blei pandap panda thông minh, blei di dom website hu angan je. Dom sàn giao dịch atau web hu angan tuk halei jeng hu chứng nhận brei thau ka chất lượng atau chứng nhận di gah ka klau, blei pandap nan mboh hu siam laghaih jang. Daok meyah duah hu janih pandap khin blei bo oh duah hu dom labik siam gheih hu khan pak angaok nan ye tuk taduan mek pandap, peih tabiak mong ka cambaih blaoh ka meng ba-yar jien. Saong abih di nyu lac caik hatai tal dom bruk cagat pachot pagap yau thong tin oh cambaih laih, payua jien dahlau… piah patrun patakik di abih  bruk bleik saleik, lahik jien./.

Urang lang: Jasi - 24/3