Xa Hồng Sơn, tinh Lam Dong hu padang meng bruk pagam xa Hồng Sơn saong Hồng Liêm di Hàm Thuận Bắc, tinh Binh Thuan klak. Labaih 10 thun dahlau, labik ini lac sa bhum taneh glai klo dak balau kayua kurang ia. Tal ini: danao kraong Quao, Suốt Đá, Cẩm Hang, ribaong 812 – Châu Tá…Hu ia, urang ngak nong kham merat jah apuh, pala drak, peih praong taneh ngak nong saong parilo janih phun pala.

Ong Lê Xuân Sang urang daok di palei Liêm An, xa Hồng Sơn brei thau, 3 thun jaik ini, meng hu ia tuh blaoh baoh sang pala 1,2 ha padai 3 mbang pala. Jaik ini, ong buh hatai salih taong abih taneh pala padai tapa pala caraih, pablei asar saong pablei taduk bingu caraih.

" Meng dahlau di ini pala padai, sa thun klau mbang pala min oh hu kein lagaih rilo. Urak ini pala phun caraih kuhria rah tapa sa sao duah hu meng 15 – 16 trieu. Sa thun mek hi tal klau, pak mbang pala. Caraih buh jien tame takik jang dut haong padai, njauk lagaih abih lac bilan ini hadei tet, tapa tet, thun blaoh yaom caraih tagok tal 52.000/kg, thun ini daok hu 17.000/kg."

Baoh sang ong Nguyễn Kế Lộc daok sa palei ong Sang, jeng salih 1ha taneh meng pala padai tapa pala caraih saong mboh lagaih jang rilo.

"Ngak padai 1ha oh hu dom, gaok mai oh hu ginup jien bayar buh tabiak. Daok caraih, meyah kuhria rah tapa buh jien tame hu 2 trieu tal 3 trieu sa sao sa mbang pala. Tame mbang pala lagaih bilan ye takik jien buh tabiak, daok urak ini cagan bilan kayua langik, jien buh tabiak glaong jang ha sit min jeng hu laba, urang ngak mbang blei salih ikak kaiy mai tal sang blei."

Kayua hu laba, yau nan ye langiu di pala caraih di angaok taneh hamu di drei, rilo baoh sang rahra di ini daok nao pah taneh di labik karei piah peih praong taneh pala. Meng labik pala caraih di dom mblang hamu dhaong, urak ini caraih di palei Liêm An hu peih praong yaok rituh ha, bangu caraih rak choh pak bilan dalam thun, jeng meng hu halau oa meng kraong ribang.

Ong Nguyễn Ngọc Chín, Akaok palei Liêm An, xa Hồng Sơn brei thau, bruk pala caraih di bhum palei lac jalan langyah salih phun pala siam lagaih, salih ka taneh pala padai oh lagaih. Phun Caraih pajaih Dai Loan hu takre meng bruk ciuk hu pandiak bhang, cakrok siam, brei jien mek tame glaong meng asar saong taduk, bam ai thaik thaot gheih.

"Padai di bhum taneh ini ye mek hu meng 4 ta tal 5 ta di sa hecta. Min kuhria taong abih yaom kaom ye oh siam lagaih. Meng di nan bo mikva ta-eng nao duah thau, sua tangi. Akaok meti hu dom sang pala, hadei di nan mboh hu laba blaoh pala hu meng 4 – 5 thun ini mai paje. Tal tukvak urak ini, palei Liêm An hu labaih 260 hecta phun caraih dalam palei."

Urak ini di dalam xa Hồng Sơn hu labaih 300 ha pala phun caraih, di palei Liêm An labaih meteh tui pala, rilo di nyu hu meng lac salih tapa meng taneh pala padai.

Biak nao bruk pala phun caraih di taneh pala padai oh siam lagaih di dom labik karei di gah Pur Meraong tinh Lam Dong hu meng rilo thun dahlau. Dom mblang hamu caraih hu rilo tuai damuai nao tapa vaih rivang nan hu urang ngak nong kuhria tal bruk ngak jirah rivang angaok mblang caraih. Ong Nguyễn Minh Sơn, urang di Jabat Kinh te xa Hồng Sơn, tinh Lam Dong brei thau veik:

"Daok jalan kuhria, xa peih praong dom tal bac pasram piah palagaih ka phun caraih, blaoh pagam haong ngah jirah rivang ngak nong. Kayua mblang caraih sa mbang hu choh bangu ye ngak jeng thaik thaot biak gheih."

Mblang caraih Liêm An, xa Hồng Sơn daok oh atah Jalan nagar angka 1 saong hu pambuak meng majam jalan mbak palei pala hu salah blaoh, radaih oto meda nduac tame tal mblang caraih. Ini lac dom bruk naih gheih piah bhum palei meda daong urang ngak nong ngak jirah rivang./.