Muk Rơ Châm Mir (umo 69 thun), urang di Kalup kapol menyim khan bai pambuak saong du lịch bhap bini Ia Mơ Nông daok taphia janeng menyim tacei pato dom uranaih Gia Rai menyim khan bai, lavik lavik muk rapeik akaok meyaom dom kamuan bac samar thau, naih joi lo!

Urang palei Kép ini saong dom urang dalam palei jiak taphia oh hu thei thau bruk menyim khan bai hu meng tuk halei mai. Muk Rơ Châm Mir jeng yau nan. Meng tuk daok sit, muk hu mboh dom muk, dom amaik, dom anai menyim khan bai. Blaoh muk hu bac menyim bingula, bac tro merai, blaoh dom blah khan bai hu menyim tabiak. Muk Rơ Châm Mir lac, tui thun bilan saong tui dom salih karei di sajarah, bruk menyim khan bai di mikva  labik ini dak harei dak lahik nao. Pandap piah menyim khan bai di urang  Gia Rai urak ini oh daok.

Birau ini, meng hu bruk daong di mikva dalam palei, bruk menyim di palei Kép 2 daok hu medeih veik, meng dom sa-ai di Kapol urang kumei xã Ia Mơ Nông. Mboh bruk ngak di bangsa mbuan lahik nao, puac thun 2018, sa-ai H’uyên Niê, Phaok Akok Kapol urang kumei saong dom adei sa-ai dalam xã ba gauk jak ba dom adei sa-ai kumei thau menyim khan bai piah Padang Kalup kapol menyim khan bai pambuak saong dulich bhap bini di xã Ia Mơ Nông.

Hadei di jaik 2 thun padang tagok, tal urak ini Kalup kapol hu labaih 30 urang tut angan tame, umo thun meng 19 tal 60. Yau sa-ai H’hoan, labaih 30 thun kak kajap hong bruk menyim khan bai, harei hlei oh daok tame janeng menyim lac sa-ai mboh yau kurang hagiat nan. Dom blah khan bai ngak ao choàng, kadop, kadung bak, khan hu sa-ai menyim biak ghieh, bingula biak mekre. Khan bai di sa-ai H’hoan ngak tabiak oh lac pandar dalam sang bo daok hu pablei tabiak langiu piah sang  duah hu jien pandar cai.

Pandap ngak meng khan bai meng kan yaom pablei biak glong kayua ngak meng tangin. Yaok blah khan bai praong hu bingula kan menyim meda lahik 1 bilan meng menyim salah, yaom pablei labaih 1,5 trieu đồng sa blah. Piah duah hu labik pablei khan bai, dom urang di kalup kapol gam saong karja dom pakat sahaneng brei pasiam veik bruk menyim khan bai pambuak saong bruk rivang main dulich bhap bini, gam haong nan, yaih khan pandap angaok mạng XH, blah web điện tử piah pandap hu mbuan tal tangin urang pandar jang.

Dalam thun 2021, Kalup kapol urang menyim khan jak ba hu dom urang dalam kapol haong bhap bini pala kapah mek ngak merai, piah ka merai laman, kajap saong njauk merai ngak khan bai bangsa. Gam haong nan, anak tal Kalup kapol meda likau karja palei padang sa labik parang pandap. Gam pambuak bruk rivang main menyim iek khan bai bangsa, piah kham khik ramik ilamu meng kan, gam cak rok patagok kinh tế./.

Urang lang: A.Nghiem – 31/8/2021