Di baha Tam Sóc, dalam xã Mỹ Thuận, huyện Mỹ Tú, tỉnh Sóc Trăng, jaik meteh bilan ini mai, harei halei jeng yau nan, tuk salah bloh bruk hamu puh, hu labaih 60 urang likei khang kadang saong mikva phật tử chreih chrai ba gauk mai pataom di baha pasram pakacah ghe Ngo, piah hu mbaok tame harei pataom pakacah ghe Ngo - Óc Om Bóc. Sa-ai Danh Thiệu, urang 5 thun hu mbaok tame vah pakacah brei kapul ghe ngo baha Tam Sóc brei thau,  yaom lac jar var haong bruk ngak mbang di sang, min meng hatai takre môn thể thao di bangsa, tuk hu Acar trụ trì, ban quản trị baha ieu, jak ba, sa-ai kham merat hu mbaok piah pasram: "Takre lô môn thể thao ini, nan ye drei tame me-in. Drei hu mbaok tame pakacah 5 thun paje, ini lac môn thể thao paglaong bruk jum ptaom gauk, drei bui sambai saong uan tabuan lô."

           Ghe Ngo baha Tam Sóc, lac sa dalam dom kapul ghe hu angan di dom mbang pakacah dalam tỉnh Sóc Trăng jeng ye dalam bhum. Bruk njauk biai nan lac, kapul ghe Ngo di baha rilo mbang hu brei lambaok nao pakacah di negar lingiu, yau di Cam-Pu-Chia, Sin-ga-por, Thái Lan, Trung Quốc. Dom thun jaik di ini, kapul ghe Ngo di baha Tam Sóc pakacah oh daok hu siam yau dahlau daih, min oh lac yau nan bo hatai takre thể thao di phật tử dalam baha trun nao. Bruk jum pataom, hatai jia, caong rik pren yava tame piah daong khik ramik saong patagok ilamu di môn thể thao bangsa jeng daok tamo dalam hatung hatian di mikva, phật tử saong urang takre kapul ghe ngo di baha. Ong Danh Can – urang dang akaok kapul ghe Ngo baha Tam Sóc brei thau: caga hu mbaok tame pakacah thun ini, baha hu buh tabiak labaih 80 triệu đồng piah ngak pasiam veik baoh ghe Ngo biak mekre. Lingiu di nan, baha hu pilih ruah jaik 100 urang vah gheih, hu rilo ilamu nan ye thun ini caong mek hu hạng glaong. 

  "Urak ini baha daok ngak pasiam gai vah ghe saong daok pasram urang vah yaok harei. Thun ini mikva phật tử, urang vah ghe pakacah di baha  Tam Sóc biak jum pataom gauk saong daok kham merat jang yaok thun. Yaok biar harei halei jeng hu 60-70 menuac mai pasram. Jum pataom gauk, ba gauk pasram piah hu mbaok tame pakacah …

Likau drei tabiak truh  baha Tam Sóc, kol dahlak nao tal Tum Núp daok dalam xã An Ninh, huyện Châu Thành, tỉnh Sóc Trăng tuk lingik laik sup. Meng atah, kol dahlak hu mehit sap preo cổ vũ yau ngak brei hadah tagok labik joa lange di baoh baha klak meng kan ini. Tapa maong iek, kol dahlak mboh hu jaik 100 menuac lac vận động viên likei, kumei daok chreih chrai pasram vah.

        Kol dahlak hu Đại đức Lâm Hiệp, trụ trì baha Tum Núp brei thau: thun ini, lingiu ghe Ngo likei pakacah yaok thun, baha saong mikva phật tử hu rik tame labaih 150 triệu đồng piah ngak pasiam baoh ghe ngo brei ka urang kumei tame pakacah. Ini lac bruk buia sambai praong di mikva dalam phum sóc. Bruk njauk biai jang nan lac, baoh ghe Kề Hâu (lac ghe piah pajeng dom ong bhik trụ trì, sư sãi, archa nao tui ghe Ngo pakacah) hu meng yaok rituh thun dahlau, daok hu khik piah di baha, hu ba tabiak brei mikva maong iek dalam “Lễ padang veik saong khik ramik ghe Kề Hâu”,  sa dalam dom bruk praong di rija Óc Om Bóc – Pakacah ghe Ngo Sóc Trăng mbang ka 3, bhum taneran kraong CL thun 2017. Đại đức Lâm Hiệp, trụ trì baha Tum Núp, lac:  "Baha Tum Núp kol dahlak biak uan tabuan, jaik 50 thun ini mai, ghe Ngo di baha tuk halei jeng hu mbaok patakach. Yaom lac raidiuk di phật tử hu tuk jeng gaok kan kandah, min meng hatai takre saong caong khin khik ramik, patagok ilamu bangsa"./.