Xã Mỹ Hòa Hưng dalam bal Long Xuyên, min lac 1 xã cù lao, pak gah lac kroang. Bruk nao mai biak kan kandah, khin mai tal labik ini njauk nao tapa đò, tapa phà... kayua yau nan ye, rai diuk bhap bani pak ini daok biak rilo kan kandah, kurang sap janih. Hu dom ấp yau Mỹ Thạnh hu iew lac ấp “5 oh” : oh hu điện, oh hu aia hacih, oh hu jalan, oh hu sang bac, oh hu balai iek riak". 

Yaom lac kan kandah yau nan, min meng hatai gul pataom, kham merat ngak brei salih mbaok meta puk palei, dom thun tapa, Đảng bộ, karja saong bhap bani Mỹ Hòa Hưng hu yam tapa kan kandah, meng bruk jak ba bhap bani gam haong bruk khai thác siam tiềm năng, pren khang di puk palei. Meng nan, dak harei dak ngak hu siam jalan mbak nao mai, ngak brei đột phá dalam bruk cakrok patagok kinh tế, paglaong jien mek tame ka bhap bani. Abih di nyu nan lac, thun 2015, xã mek hu 19/19 tiêu chí ka bruk padang ngak palei pala bahrau. Ini lac XÃ akaok meti di bal Long Xuyên ngak salah blaoh danak dak ini.

Urak ini, jalan praong nao tal pasak xã hu tuh menyek ginup abih,  jalan palei hu tuh nhựa atau bê tông mek hu chuẩn... Tukvak pahadar harei menek Wa Tôn, dua  jalan bê tông, kênh Ông Cào, ấp Mỹ Hiệp atah 540 m;  jalan Út Na – Năm Dần atah 650 m hu peih pakak saong ba tame pandar ngan haong yaom jien buh tame ngak abih tih labaih 1 tỷ đồng, kayua mikva rik daong. Uan tabuan ka palei pala hu salih bahrau, ong Nguyễn Văn Trí, sa urang daok di ấp Mỹ Long 1, xã Mỹ Hòa Hưng oh padauk hu bui sambai, lac: “Oh njauk lac nduac tui bruk padang ngak palei pala bahrau, bo nyu lac bruk pabak ka bhap bani nao mai. Meng nan mikva hu mbaok tame rik daong biak ralo, biak ralo jien, drap ar saong pren yava. Bo abih di nyu lac pren yava piah peih ngak dom công trình praong, abih di nyu lac ngak tatua, jalan mbak nao mai dalam palei, nan lac dom bruk duh ka bhap bani. Mikva mboh bui sambai tuk dom công trình hu ngak salah blaoh palaghaih ka bruk nao mai, bo nan jeng lac kadha piah dak padang bhummi Wa Tôn, bhummi salih bahrau, bhummi di palei pala bahrau”.

Meng bruk kham merat di raja-ei saong bhap bani, Mỹ Hòa Hưng harei ini hu  salih bahrau mbaok meta. Thun 2017,  abih tih yaom jien mek tame kadung jien karja jaik 9 tỷ đồng; jien mek tame kuhria tui angaok manuac labaih 38 triệu đồng sa urang sa thun. Danak dak patruh eik patrun kathaot, khik kajap an sinh xã hội hu caik hatai, palaghaih ka dom baoh sang kathaot hu ralo jalan cakrok patagok bruk ngak mbang, pala drak, ba brei bruk ngak, paglaong rai diuk piah tapa truh kathaot tui jalan khang kajap; baoh sang kathaot trun daok 89 baoh sang, meblah 1,64% ... Amuk  Nguyễn Thị Bích daok di ấp mỹ Long 1, lac sa dalam 23 baoh sang hu daong ngak sang dalam tuk uan harei menek di Wa Tôn thun ini, bui sambai tuk hu baoh sang bahrau siam mekre, hacih sa-at. Amuk khan lac: “Sang dahlak dahlau diah oh hu taneh daok, njauk daok gam taneh sang adei kamei. Urak ini dahlak hu UB bhap bani xã, ấp daong brei ka dahlak sa baoh sang nan ye dahlak  biak bui sambai. Urak ini dahlak hu sang ini piah ka 3 anek maik daok kham merat ngak mbang, brei ka anek nao bac, tapa truh kathaot”.

         Amuk Huỳnh Lê Thùy Dương, Phaok akaok UBND xã Mỹ Hòa Hưng brei thau, salih bahrau di Mỹ Hòa Hưng harei ini mai meng “ý Đảng, lòng dân”. Tukvak tapa, xã thau lac bruk ngak nong saong du lịch lac bruk ngak mbang piah patagok. Dalam xã tok hu jaik 1.000 ha mblang taneh pala drak , min puk palei khang hatai yah klaak bruk pala sa janih phun padai, salih tapa pala njam patam saong padai pablak haong pala njam patam; taphia di nan pandar khoa học- kỹ thuật tame bruk ngak mbang pala drak... meng nan mek hu jaik 150 triệu đồng sa ha yaok thun. Taphia di nan, xã daok pambak tame pren khang gah kraong aia piah pala raong kaya ikan dalam aia, daong ka ralo baoh sang tapa truh kathaot, yam tagok ngak kaya meda. Urak ini, dalam xã hu labaih 560 lồng bè saong labaih 85 ha danao, dalam nan: 18,9 ha pabam IKAN pajaih. 

           Meng pren khang gah kraong ribaong, khu lưu niệm Wa Tôn - xã Mỹ Hòa Hưng ngan haong jaik pluh baoh sang yao klak, vin taom dhar hu ralo phun kayau, khu bein bingu kiểng that hijao... Ini jeng lac pren khang bo puk palei daok khai thác, patagok bruk ngak du lịch bhap bani, du lịch sinh thái... ralo sang buh jien padang ngak dom  bein sinh thái, pablei pandap mbang menyum, khik ramik dom labik ngak thủ công meng kan…patagok kinh tế pambuak pagam haong ngak du lịch, rai diuk bhap bani hu ginup meda jang. Urak ini dalam xã hu 9 baoh sang ngak du lịch Homestay, duh ka dom bruk mbang menyum, ndih daok saong ba tuai damuai nao rivang iek; yaok bilan taduan raok meng 400 tal 500 tuai nao tui tour Homestay. Ndom ka jalan cakrok patagok kinh tế- xã hội di puk palei dalam tukvak anak tal, amuk Huỳnh Lê Thùy Dương, Phaok akaok UBND xã Mỹ Hòa Hưng brei thau. “Piah patagok rai diuk bhap bani, xã Mỹ Hòa Hưng daok jhul pakhang bruk pathau khan, jak ba dalam bhap bani, paglaong  ý thức tự giác, patagok pren khang hu mbaok gam haong puk palei, khik ramik dom bruk ngak mbang hu kein laba, ngak jeng cảnh quan hijao hacih sa-at, sangka tal gah ngak nong, ba taneh pala padai oh hu kein laba tapa pala phun mbang baoh saong njam patam hu yaom glaong jang piah patagok raidiuk ka bhap bani, ngak brei ka mbaok meta bhummi Wa Tôn prong uranam dak harei dak kaya meda saong siam mekre”.

      Dom harei bilan 8 dak rai sajarah ini, nao tal Mỹ Hòa Hưng, thei jeng mboh hu bruk bui sambai, chreih chai di bhap bani labik ini; angaok jalan tame  labik sang lưu niệm Wa Tôn, dua gah jalan lac talei phun kayau halui, gam saong dom baoh sang bahrau padang ngak.... Ralo bruk ngak chreih chrai, ralo công trình praong di puk palei hu ngak salah blaoh saong ba tame pandar, salam uan pahadar 130 thun harei menek Wa Tôn. Dom jak jeng siam mekre saong dom salih bahrau harei INI, lac jalan peih tabiak ka Mỹ Hòa Hưng  patagok dalam tukvak anak tal, kham merat tal thun anak  mek hu angan xã palei pala bahrau. Rik daong padang ngak bhummi Wa Tôn dak harei dak kaya meda, siam mekre./.