Tui takai urang jakar mBan Bangsa tỉnh Bình Thuận, khaol dahlak mai rivang xã Phan Hòa – sa dalam 3 xã hu ralo bhap bani Chăm di tỉnh. Ini jeng lac palei hu ralo salih bahrau dut haong dom palei Cam karei dalam tỉnh Bình Thuận. Phan Hòa lac sa xã thuần nông, min hu tal 50% baoh sang kaya meda. Jien mek tame kuhria rah tapa tui akaok menuac lac jaik 34 triệu đồng sa urang sa thun. Labaih 65% baoh sang tui bruk pandar jamriak dalam bruk ngak nong yau blei mac li-ua, mac xới, mac yuak, piah patrun jien buh tame, takik pren ngak saong patrun khat lahik hadei di tuk yuak, jien mek tame tani tanat. Langiu di 20 ribau hecta taneh ngak padai, năng suất mek hu 7 tạ/ha, labaih 70 hecta taneh pala thanh long, caraih mek asal... Dom thun tapa, Đảng, Karja saong palei hu ralo sarak buh jien tame ngak jalan điện, jalan mbak, sang bac, balai iek ruak, ribaong ba aia, padang ngak sang danaok pambuak pagam haong danak dak padang ngak palei pala bahrau ngak jeng pren khang paglaong rai diuk bhap bani Cam.

Piah daong paglaong gah tinh thần, bhap bani xã Phan Hòa rik daong jien padai, pren yava gam haong karja palei padang ngak 3 sang ilamo bhap bani di 3 palei Cam, padang ngak bimong Pô Patao Át abih labaih 1 tỷ đồng, tui kuhria meda peih pakak di harei 30/4/2018 anak tal…Công trình ini ngak blaoh, daong ka bhap bani hu labik sinh hoạt ilamo, tôn giáo, tín ngưỡng bhap bani, rik daong samar ba Phan Hòa ngak salah blaoh dom tiêu chí padang ngak palei pala bahrau. 

Gam haong xã Phan Hòa, pak dom xã Chăm Phan Hiệp saong Phan Thanh, dalam huyện Bắc Bình saong dom xã dalam huyện Hàm Thuận Bắc oh lac hadah hadai tagok meng dom baoh sang bahrau, jalan dhuan tapak mbaok, hu labik sinh hoạt tôn giáo bo tapa bruk padang ngak palei pala bahrau, padang rai diuk ilamo di labik daok... hu ngak brei salih bahrau jalan saneng, jalan ngak di bhap bani Cam. Xã Phan Thanh hu mong lac "taneh bac", di ini taong abih uranaih dalam umo nao bac jeng hu tame sang bac. Hu ralo anek kamuan urang Cam tốt nghiệp đại học, cao đẳng saong mai veik puk palei ngak bruk. 

  Bhap bani Cam tỉnh Bình Thuận hu labaih 7 ribau hộ, meblah 3,26% bhap bani dalam tỉnh, jaik abih diuk rai meng bruk ngak nong. Piah ba bruk ngak saong patagok jien mek tame ka bhap bani Cam, tỉnh hu pasiam veik, patagok dom palei ngak meng kan, pambuak pagam haong du lịch cộng đồng di dom xã Phan Thanh, Phan Hòa, Phan Hiệp  di  huyện Bắc Bình. Ralo sarak an sinh xã hội jeng hu tỉnh peih ngak samar drah, njauk manuac njauk urang saong mek hu ralo jak jeng siam mekre. Rai diuk bhap bani Cam di Bình Thuận harei ini salih bahrau biak ralo, baoh sang kathaot trun daok 4%. Ini lac kadha bui sambai prong abih di bhap bani Cam, rik daong patagok kinh tế - xã hội di puk palei. 

     Yau nan min, urak ini bhap bani Cam jeng daok caong khin ralo jang bruk sangka padang ngak cơ sở hạ tầng; daong brei taneh pala drak piah patui veik bruk patruh kathaot saong yam tagok ngak meda; ba  bruk ngak ka anek kamuan urang Cam... Amuk Thông Thị Minh Hiền, Phaok akaok Ban Dân tộc tỉnh Bình Thuận brei thau: Anak tal, tỉnh daok sangka patagok kinh tế - xã hội ka bhum urang Cam. Roh duah langyah brei taneh pala drak ka mikva, sangka padang ngak cơ sở hạ tầng; ka klau nan lac patui bruk khik ramik ilamo Cam; ka pak padang ngak đề án ngak yau habar piah ba bruk ngak ka bhap bani bangsa takik, dalam nan hu urang Cam.”

     Gam haong bruk sangka di Đảng saong Karja, bruk pachreih ba di karja puk palei, bhap bani Cam tỉnh Bình Thuận daok patagok bruk gul pataom, buh pren ngak mbang piah dak padang rai diuk trei sil, haniem phol./.