Urang Thái main khen be dalam harei rija roya 

Mbaik khèn bè di urang Thái daok di gah pai Nghệ An song di Tây Bắc taneh ia drei, hu mong yau sa kadha nghệ thuật siam di abih. Nyu lac bruk pambuak pagam dom janih pandap panda di langik tasik  song hatai anit palei negar, ranam bangsa di dom nghệ nhân ngak jeng boh khèn. Khèn bè hu pandar di rilo labik, tui yaok bruk karei di gauk, yau dalam dom tuk lễ, Tết, tadhau yhut, raok tuai, likhah caga…

Ngan song dom urang likei Thái bahrau prong, khèn bè lac pandap dong brei thau hatung hatian, brei mboh hatai anit urang drei ranam ; khèn lac “ong maha” pambuak pagam dua likei kamei haong gauk, saong daong ka urang jeng duik jeng pasang. Ong Lương Văn Phỏng daok di palei Tân Sơn, xã Môn Sơn, huyện Con Cuông brei thau:

Dahlau deih nao main  ye yuk  khèn bè, anai kamei taro merai menyim khan bai. Urang likei mai tal dok la pak nan yuk khèn main ka bui sambai ….

Ngan saong dom urang likei Thái, megru yuk khèn oh lac piah main sambai, bo tapa nan dok brei mboh bruk naih gheih di drei song lac jalan piah nao duah ka drei urang anit ranam. Thaot binguk urang likei khang kadang yuk khèn naih gheih dom kumei dara caik hatai anit ranam,  yau panuac ndom di nghệ nhân.

Ngan song urang Thái daok di gah pai Nghệ An, dahlau deih, tuk mai jiak tal sang ayut kumei, ye urang likei nan yuk tagok sa kadha pí atau khèn bè. Tapa lagu khèn nan, anai kumei thau lac, urang ranam di drei mai ye tabiak peih pabah mbang piah dok ala ndom biai atau pok sap doh dom lagu lăm, lagu nhuôn. Meyah anai doh ye urang likei taong lagu meng yuk khèn bè. Nghệ nhân, nhạc sỹ Lê Hoàng daok di ban sit Con Cuông, brei thau:

Tapa nan, urang ndom tagok hatung hatain di sa urang likei, bhian di nyu melam urang pan khèn nao main hong urang anit ranam ye mboh anai kamei dok taro merai menyim khan bai, hu tuk saai dang di ala kanyan mong tagok, hu tuk saai dang akaok kanyan mong tame. Mong iek adei dok taro merai ka nyu salah bloh ba gauk nao main.     

Meng sap glaong, biar, lai la-an, samar drah ngak drut drui oh thau hadom boh hatai, khèn bè dok brei mboh bruk jum pataom bhap bini, ngak jeng pren khang jum pataom di dom urang anek  palei Thái. Dom boh khèn bè yuk tagok ba tal dom ragu tamia, ba mai bui sambai, chreih chrai, brei mboh hatai caong ka rai duik siam mekre, sron mbon, cong khin trei sil haniem phol. Kayua yau nan ye, tapa thun bilan, rai duik hu rilo salih bahrau, min urang Thái daok di dom huyện gah pai Nghệ An jeng daok khik ramik boh khèn bè di bangsa drei./.

Urang lang: Hanipha- 12/10