Tui sarak klaak hu ba tabiak di Nghị định 02/2017/NĐ-CP di Raja-ei ka jalan ngak, sarak daong bruk ngak nong piah pasiam veik labik njauk bala, jit ruak ye yaok drei pabui metai kayua jit tả pabui châu Phi saong jit ruak karei, haei di tuk am cuh klaak meda hu karja daong yaom 38.000 đồng/kg pabui hơi. Yau nan min, urak ini mikva urang nong, dom po raong pabui jeng daok duh hatai kayua tui sarak daong, bahrau hu Thủ tướng tacei pato ye yaom jien daong ka drei pabui metai kayua jit tả pabui samu 80% yaom pablei di darak pasar, bruk ini meda ngak ka urang raong glang njauk khat lahik dut haong yaom jien ba tabiak nan lac 38.000 đồng/kg. 

   Tui dom po raong pabui, meng hadei di tuk hu jit tả pabui châu Phi, tal harei ini yaom pabui di rilo puk palei trun khang, meng 51.000 - 53.000 đồng/kg pabui hơi trun daok 45.000 đồng/kg di tukvak urak ini. Saong tui pasang siek di harei 5-3, rilo labik yaom pabui trun daok 39.000 - 40.000 đồng/kg. Yau nan, meyah kuhria yaom jien daong samu 80% yaom darak pasar ye yaom jien daong biak di nyu brei ka mikva lac jaik 32.000 đồng/kg, biar jang yaom jien daong klak tal 6.000 đồng/kg pabui hơi. 

Yau nan min, tuk ndom tal bruk ini, Thứ trưởng Mentri ngak nong saong patagok palei pala Phùng Đức Tiến brei thau, bhap bani njauk thau cambaih laih nan lac Karja daong oh njauk lac bayar jien đền bù ngan haong pabui njauk jit saong ba am cuh klaak. 80% nan lac yaom jien daong takik di abih tui tacei pato di Thủ tướng, daok yaom jien daong biak di nyu daok pambak tame yaok puk palei. Tui nan Thứ trưởng Phùng Đức Tiến brei thau, pagap yau bal Hải Phòng hu ba tabiak yaom jien doang am cuh pabui menek, pabui tano pajaih njaom mbak jit tagok jaik 2 mbang ye dalam harak ba tagok Ra-jaei, mentri Ngak nong saong patagok palei pala hu panuac likau patagok yaom jien daong meng 1,5 – 2 mbang./.