Khan Piêu hu menyim meng kapah, bhian atah meng 1met meteh tal 1 mét 6, praong meng 30 tal 40 cm. Ngan saong urang kumei Thái, nyu oh lac piah me-om akaok pacang pandiak pacang hangin, bo daok khik ấm tuk langik la-ar. Urang bhian mbak khan tapa rup biak gheih, ving siuk ngak jeng blah khan. Hu anek sit, urang kumei Thái mbak siuk piah bak anek. Lingiu di nan, piêu nan daok lac pandap ngui cuh ngak brei mekre jang di urang kumei Thái. Meng gheih pambuak dom samboh mau, bingula, jalan jhik, piêu hu jeng sa dalam dom ilamu di bangsa Thái.

          Tok hu takik urang Thái mbong meom tamo tát, siuk pak meta, daok urang Thái juk di Sơn La saong dom tỉnh Tây Bắc ralo meng me-om khan piêu. Piêu hu rilo janih, hu janih hu pet bingula hadah di dua akok khan, janih karei tok lac sa blah khan njom sambo chàm…Tui bhum palei bo piêu hu dom bingula karei. Bruk karei nan mai meng bruk jhik pet bingula di dua akok khan, atau mai meng dom bingula angaok blah khan.

 Khan piêu jeng karei di gauk tui yaok bhum palei. Pagap yau, bhum Thuận Châu Sơn La ye urang tok pet rah trun tui 4 kieng, blaoh pet dua klau baoh bingu DI bangsa Thái di 4 kieng. Di dom bhum palei karei urang pet yau sa blah siuk sit di kieng piêu. Dom asar baoh njuk urang brei papaoh vil val meng khan bai, cakak khan bai bhong tabiak jhik bloh urang meng papaok veik. Hadei di nan, urang pet di gah langiu dom baoh nyuk sit, eiw lac paceng pieu.

 Blah khan piêu gheih brei hu rilo janih. Dalam nan, merai pet hu makna praong. Meyah blah tanyiak ngak khan menyim meng kapah ye merai pet lac merai meng tơ tằm. Mek Merai tơ tằm piah pet ye sambo màu nyu hadah njuac saong ngak brei mekre jang dom bingula pet angaok blah khan. Piêu lac sa nghe thuat biak gheih kayua plak tangin gheih ngak di urang kumei Thái ngak tabiak. Urang Thái sahaneng lac anek kumei praong tagok  thei jeng brei thau hjik pet, menyim khan bai. Yau nan ye, meng umo 7 tal 8 thun, anek kumei Thái bac menyim khan bac saong pet dom janih bingu la. Mbiah tal tuk tok pasang, dom blah phui men, khan bai saong pieu ngak hu,  brei mboh urang kumei nan tarieng atau alah, gheih tangin atau oh…

Piah hu sa blah khan pieu, bhian ngak gam meng 3 tal 4 adit.  Min urang kumei Thái tok pet tuk lahei, yau nan ye piah ngak blaoh sa blah khan pieu bhian abih luac sa bilan. Tuk pet dom bingula tagok dua akok khan, urang maong tui mẫu, min meda ngak tui hatai drei. Kayua Yau nan ye, bac pet khan pieu, ngan saong urang kumei Thái lac bruk thau sahaneng bac megru saong pasram tangin gheih di drei piah caga padang raidiuk.

 Lingiu di gheih mekre, khan piêu daok ndung bak ralo makna dalam raidiuk xã hội di urang Thái. Piêu lac pandap pagol gauk di dom dam dara bangsa Thái, pandap piah alin tuk urang kumei nao tui pasang likei, jeng lac pandap piah paling yang, piah me-om mbaok ka urang tuk plang nao. Urang kumei Thái dahlau diah, meng tuk camereip thau pet thau menyim lac brei ngak khan pieu, hu yau nan tal tal tuk tok pasang meng hu ginup khan piah alin ka sang tahama.

 Urang kumei Thái praong tagok brei caga piah khan pieu meng ginup. Dahlau diah, urang Thái bo tok pasang ye adei saai gah pasang hu hadom urang praong ye urang brei alin do nan blah khan pieu. Anek kumei ye alin Khan pieu, anek likei ye alin baoh patal atau khan bai capha, tui bhum palei. Bhian di nyu baoh sang halei rilo adei sa-ai urang brei caga 3,4 pluh blah khan piah alin. Hadei di nan, urang alin ka abih urang adei sa-ai dalam but pajaih. Urang kumei dara tuk likau ala ayut cuai di drei meda mbak khan di takoi piah hadar tal urang ranam di drei. Nan lac dom makna di blah khan pieu.

Piêu oh lac ngak brei gheih mekre dalam angui cuk meng kan mai, bo daok brei mboh ilamu, ndung bak dalam nan dom hatung hatai, jalan diukrai di urang Thái./.