Taha Hôih Cooih daok di xã Ta Bhing, huyện Nam Giang, tỉnh Quảng Nam hu rilo menuac dalam bhum thau tal yau sa nghệ nhân pak yot meng kan di urang Cơ Tu. Meng dua plak tangn gheih ngak, meng hatung hatian di sa urang anek Cơ Tu, taha Hôih Cooih pak tabiak hu rilo janih pandap, hu tuai du lịch takre blei, hu bhap bini takre pandar. Ong daok lac menuac thau ngak saong me-in hu rilo janih alat ragam meng kan di urang Cơ Tu. Taha Hôih Cooih caong khin pato veik ka rai hadei, piah ka dom ilamu meng kan di muk kei hu khik veik mait miat..Vơ Nich Oang, urang vak di rayo sap ndom VN hu kadha vak ndom ka ong:

      Urak ini, di huyện Nam Giang, tỉnh Quảng Nam menuac thau ngak saong thau me-in alat ragam meng kan di urang Cơ Tu oh daok hu rilo yau dahlau. Taha Hôih Cooih urak ini umo labaih 60 thun, daok di palei Pà Vã, xã Tà Bhing tuk halei jeng mboh suh sah anak bruk lac rilo ilamu meng kan di urang Cơ Tu dak harei dak lihik nao. Meng tari taring, takre bac megru, meng tuk daok dam, taha Hôih Cooi nao tui dom urang praong thun, bac ngak saong me-in dom janih alat ragam meng kan di urang Cơ Tu yau A Luốt, khèn, Tâm Bhréh…. Gam ngak tabiak gam me-in alat ragam… oh suai livik, Hôih Cooih thau taong dom janih alat ragam meng kan di urang Cơ Tu. Meng thau me-in rilo janih alat ragam meng kan, nan ye tuk hu lễ hội, Hôih Cooih hu mikva dalam palei brei nao parang me-in di grauk labik. Taha Hôih Cooi bui sambai lô kayua hu rik pren tame yaih khan ilamu di bangsa drei tal ayut sahabat, tal dom bangsa adei sa-ai karei karei: “Dahlak mehit lac Đảng Karja oh brei klaak dom ilamu meng kan di Cơ Tu drei. Njauk pathau khan khang jang jhuai caik brei lihik dom ilamu nan. Yaom lac taha ye min dahlak jeng daok kham bac piah thau bloh pato veik ka anek taco. Drei taha ye, bac jeng oh samar. Dahlak bac yuk, bac paik capi, bloh pasram ngak dom alat ragam. Urak ini, rilo takik dahlak jeng thau, thau du halei dahlak pato veik ka anek taco du nan, piah tuk dahlak palang lihik ye anek taco thau saong patagok jang.”

       Sa-ai Bh’nướch Cheo, urang pan akaok kalup kapul daoh tamia ragu bhap bini xã Tà Bhing, huyện Nam Giang brei thau, taha Hôih Cooih lac sa dalam dom urang di kalup kapul. Taha abih hatai tacei pato ka dam dara dalam kalup kapul thau ngak saong me-in alat ragam meng kan di urang Cơ Tu: “Dalam taong abih dom mbang nao parang me-in atah, taha Còi jeng hu mbaok. Taha tuk halei jeng sangka tal abih gauk, ek glang pren yava abih menuac dalam kapul. Dom mbang nao parang me-in, taha mboh hagait oh ka lagaih ye taha ramik veik chip piah ka bruk parang me-in di kapul hu siam jang, gheih jang.”

       Tuk menek tabiak, taha Hôih Cooih hu tật sa gah takai. Bruk nao mai di taha kan kandah jang dom urang karei. Min oh lac yau nan bo ngak kan rai diuk di drei. Taha jeng tabiak hamu, tagok puh, kuhri kuhria ka raidiuk di baoh sang saong hu mbaok tame taong abih bruk puk palei yau dom urang karei. Abih di nyu nan lac meng labaih 10 thun ini mai, tuk dom tour du lịch hu mai tal mikva, tal puk palei tapa dom sarak patagok kinh tế bhum ceik, taha hu jien tame meng bruk pak yot meng kan di drei. Lingiu bruk hamu puh, tuk lahaiy, taha Hôih Cooih pak yot, pak dom janih pandap…mekre meta pablei ka tuai du lịch. Yaok janih pandap yaom meng sa rituh ribau tal sa triệu đồng. Oh lac tuai takre blei, bo mikva dalam palei jeng takre pandar. Meng hu bruk pak yot ini, taha Hôih Cooih duah hu jien tame sang, oh daok nao ngak hamu, ngak puh tra. Sa-ai Bh’nướch Cheo daok di xã Tà Bhing, huyện Nam Giang oh abih panuac pok meyaom  bruk kham merat yam tapa kan kandah di taha: “Cei yaom lac hu tật sa gah takai, nao mai kan kandah, min cei thau ngak rilo janih bo urang karei oh ngak hu. Cei pak yot saong rilo pandap karei… Cai daok ngak hu alat ragam biak joi. Jaik 10 thun ini mai cei oh daok nao ngak puh tra. Cei daok di sang pak yot pablei ka mikva dalam palei saong pablei ka tuai du lịch. Hu rilo pandap cei pablei yaom meng 400-500 ribau sa janih”

      Umo taha, pren takik, bruk tame glai duah dom janih pandap mai ngak urak ini lac bruk oh mbuan ngan saong taha Hôih Cooih. Min meng hatung hatian di sa urang anek Cơ Tu khin khik ramik bruk ngak meng kan di bangsa, ong jeng daok kham merat yaok harei. Bruk khin ka rai raniah umo thau saong khik bruk pak yot Cơ Tu tuk halei jeng mboh dalam hatai ong, saong ong daok kham merat ngak meng abih hatung hatian di drei./.