Baoh sang sit di nghệ nhân Trần Ngọc Nương daok di khu phố 6, ban sit Cần Đước, Long An tuk halei jeng bui sambai sap cambi, sap daoh di dom urang bac pasram daoh tui panuac tcei pato. Dom sap daoh kadha Bắc, kadha Oán biak druat druai, ngak brei chreih chreih di puk palei Tây Nam bộ. Lavik lavik dalam tal bac mehit sap klao bui sambai di gru pato saong urang bac tuk hu urang daoh suan panuac atau taih oh njauk phím. Adei Võ Minh Hiếu daok di ban sit Cần Đước, tui bac hu dom bilan ini mai, lac:

“ Adei takre đờn ca tài tử Nam bộ min oh thau cambaic makna di nyu yau nan ye  tame bac di cei Nương piah hu thau jang. Yaok tuk daoh hu sa panieng đơn ca tài tử ye dahlak mboh biak uan tabuan.”

  Rilo urang bac duah tal nghệ nhân Trần Ngọc Nương piah thau ka nghệ thuật đờn ca tài tử Nam bộ oh lac ong paik capi naih joi, bo daok abih hatai ka alat ragam bangsa, yau hu mboh tapa bruk pato tacei. Dalam tal bac di ong hu biak rilo urang bang meta. Dom urang takre saong kham bac kham pasram ye drah thau, daok dom urang birau bac, abih di nyu lac urang bang meta, ong brei pan tangin caik tagok capi, daoh saong paik rilo mbang, ladei ladei piah urang hadar tui panuac pato. Sa-ai Nguyễn Thị Thùy Trang daok di ban sit Cần Đước lac:

“ Bac ralo ye, thau tal kadha 3 nam, 6 bắc, 7 hạ bac hu pluh dom kadha ye. Cei pato abih hatai, drei caik hatai kham bac meng jeng, kadha biak kan min dahlak takre rilo nan ye kham bac.”

Ndih tapui tabiak saong praong tagok di sa baoh sang hu tal 15 adei sa-ai ngak nghề rèn, meng umo 4 thun, meta ong Trần Ngọc Nương oh daok mboh hadah. Tuk umo 14 thun,  sang ong brei nao bac akhar huroh ndon, hadei di nan brei bac đàn piano, min kayua  sang ong biak kan kandah yau nan ye ong padeih bac meteh dhi. Bloh ong patak pataom jien piah nao bac cổ nhạc, mehit labik halei hu gru pato ye duak tal labik nan bac tui hatai sahaneng lac  njauk kham merat bac piah hu bruk ngak raong rup drei klah pagam pambak tame baoh sang.

  Urang khang kadang bac đàn daok kan, urang bang meta yau ong dak kan jang rilo mbang kayua bac meng dua gah tanye tangi piah thau lac saun njauk di lagu. Yau nan min, meng hatai takre biak takre alat ragam bangsa saong pasram oh padeih, tuk ini ong Trần Ngọc Nương oh lac ma-in hu guitar bo daok joi đờn sến, đờn cò, đờn hạ uy di…Taom gaok dom uarng dreih yau drei, ong ba mai sang pato paik đờn, daoh piah daong ka urang duah jien. Hu tuk sang ong raong ba yaok pluh urang oh kuhria jien padai, mboh urang bac dak harei dak naih ye ong bui sambai. 

  Angan siam dane atah, urang daok di Đồng Tháp, Sóc Trăng, Trà Vinh jeng duah mai bac. Ngan saong ong, radiuk daok kan kandah min khin rik prein yawa tame khik sap capi meng kan oh sahaneng kuhria hagait. Nghệ nhân Trần Ngọc Nương brei thau:

“ Dahlak khin khik ramik alat ragam bangsa di drei min oh mek jien bac. Dom adei khin bac ye duah mai labik ini, hu adei kamuan takre ralo, oh thau labik halei pato, ye mai labik ini paling yang tổ blaoh tame bac.”

  Labaih meteh rai kak kajap haong đờn ca tài tử saong alat ragam bangsa, nghệ nhân Trần Ngọc Nương hu patoa veik ka biak ralo urang bac. Radiuk ong nan lac dalikan biak druat druai di sa urang nghệ sĩ naih gheih, kham merat yam tapa than vak saong ba abih hatai daong urang karei. Rilo urang bac hu jak jeng, ba panuac daoh tal rilo urang pang urang maong iek di grauk labik, rik tame ngakjeng prein diukrai khang kadang ka nghe thuat đờn ca tài tử./.