Tui sa-ai Tà Thía Banh, sa urang ngak alak di xã Phước Hà, huyện Thuận Nam, bhap bini Raglai di Phước Hà iek alak lac pandap menyum biak hu yaom glaong, oh kurang hu hu dalam raidiuk di urang Raglai; abih di nyu nan lac dalam adat mbang akaok padai bahrau. Dalam dom adat cambat, alak hu pok tagok dom pô yang, pambuak menuac sia haong yang mebhang. Ngan saong ayut sahabat, alak lac jalan piah  klah rabha  bruk bui sambai atau bruk mebuk hatai, lac talei pambuak rohim di menuac urang… Yaok mbang  taom gaok gauk, alak hu ba tabiak piah pabak jang talei rohim, piah pok da-a, likau dom po yang sraong daong.

Bruk mbang menyum di urang Raglai dalam tuk ngak adat jeng ye dalam sang tuk halei jeng tui trình tự, iek praong gauk, yau Yuan lac kính trên nhường dưới, urang taha, urang praong thun, urang hu angan je dalam bhap bini, ong muk, amaik ame lac menuac hu mbang menyum dahlau, hadei di nan meng tal urang ranaih jang. Atau tuk hu tuai mai sang, njauk brei ka tuai  menyum dahlau, hadei di nan meng tal menuac dalam sang. Lingiu di nan, alak cần daok brei mboh bruk jum pataom gauk.  Tuk cần dui trun, urang menyum dahlau njauk menyum abih bloh yar cần  ka urang daok tapen, Ia hu tuh bak tame panyin veik, bloh urang daok tapen nan menyum abih mbiah tal tuk alak taba meng padeih. Sa-ai Tà Thía Banh brei thau: “ Bruk menyum alak cần brei mboh bruk jum pataom biak glaong.  Tuk menyum brei hu meng 5 – 10 urang, hu tuk hu 2,3 urang, oh menyum 1 urang hu. Tuk tết, tuk likhah caga, ndam metai, adat mbang akaok padai bharau atau taduan tuai praong meng menyum alak cần, daok bình thường oh menyum alak ini.”

          Dahlau daih, bhap bini ngak alak cần meng sa janih men hu ngak meng gha phun glai haong brah, meriak, mekuah…Urang saok klaik dom janih nan haong gauk, bloh mek men ini ủ haong tangei, bei kayau atau bo bo… Urak ini, kayua lingik tasik kan kandah, pandiak luac thun, dom nguyên liệu dalam glai jeng dak harei dak takik nao, nan ye mikva oh daok ngak men tra bo nao blei meng di gah lingiu,ba mai tahanek haong brah bingi. Min jalan ngak ye oh salih karei duk saong dahlau daih.

        Piah ngak hu alak, njauk tapa rilo công đoạn, meng caga pandap ngak tal bruk  chế biến, kuhri kuhria tukvak ka nyu lagaih, ngak habar ka nyu njauk tuk piah pandar… piah ngak ka alak nyu bingi di abih. Sang urang Raglai halei jeng thau ngak alak cần, min yaok sang jeng hu ilamu ngak alak karei di gauk. Kayua yau nan ye alak nyu pahe karei di gauk tui hatai takre di yaok sang.

Ong Ô Rai Hồng, sa urang ngak alak daok di Phước Hà lac: “ Urak ini urang halei jeng thau ngak alak cần, min ngak  bo oh hu ilamu ye alak khut jeng hu, alak mesam jeng hu, alak taba jeng hu…urang hu ilamu ye alak ngak takik khut saong biak bingi. 1 mbao brah ngak hu 7 ché alak saong tui men, meyah men lô menyum mboh phik, daok men takik alak nyu taba. Daok menyum ye hu 2 jalan: tuai randap ye drei brei menyum tapak dalam ché, drei caga tuh ia bak sa panyin lac bingi, daok menuac urang karei ye drei tuh tabiak panyin yar ka urang menyum”.  

Urang Raglai rap ar tuai lô, nan ye dalam sang tuk halei  jeng hu 1 tal 2 ché alak cần piah payak tuai. Tuk menyum alak cần, urang da-a tuai mbang gam ralo pabui jhuk saong menuk glai pahe bingi biak karei di bhum ceik glai. Ilamu ini di urang Raglai Phước Hà daok daong khik ramik saong patagok ilamu mbang huak meng kan di sa bangsa daok livik rai di bhum taneh gah kreh negar bak pandiak haong ngin Ninh Thuận./.