Bruk main sambai hu peih ngak di dom bhum palei 

Po tiem  Lê Văn Vững thun ni umo 25 thun,ndik tapui di ban  Cần Thơ. Kayua sang kan kandah,Vững padeih bac meng thun bac tal 6. Meng nan, Vững ngak rilo bruk duah jien dong ka amaik ame, yau : phụ hồ, cakaong pandap, daong bruk di ghe…Umo 20 thun, Lê Văn Vững nao nghĩa vụ quân sự song tuk tabiak truh bol lin,saai mek jien dong brei nao bac cakak mbuk  .

Thun  2017, saai peih tiem cakak mbuk “Lê Vững Barbershop” tuk camereip daok di  hẻm dom tổ 12 - 20, jalan  Nguyễn Văn Cừ, phường An Khánh, quận Ninh Kiều, ban  Cần Thơ. Tal urak ni, tiem mbuk  hu  4 dhar dalam ban  Cần Thơ, song hu 20 thợ chính song phụ, cakak dom kiểu mbuk likei kamei. Langui di bruk cakak mbuk ka tuai mai cakak di labik, yaok adit atau yaok bilan hu parabha jeng rilo nyaom pambuak bruk  song dom kapul ngak pahla nao tal bhum atah bayah, taom gaok mik va hu rai duik kan kandah, uranaih kan kathaot, urang taha, urang jaoh jo, urang pablei  vé số piah cakak mbuk brei saoh.

Saai  Lê Văn Vững brei thau: 3 thun ngak bruk pahla, sa-ai song dom ayut oh kanal hadar abih dom labik hu nao tal, tok thau lac dak nao dak mboh takre rilo:

"Pren khang piah adei ngak lac adei khin dong ka abih urang, kayua adei mek bruk ngak di drei nao dong ka urang karei. Jien ndua adei jeng oh hu rilo, adei mek bruk daong ka adei saai piah urang hu bruk ngak dalam rai duik"  

Tui jalan ngak lac  “Brei saoh min abih hatai, ba hatung hatai tame bruk cakak mbuk”, di yaok labik nao tal, Lê Vững Barbershop hu ba bui sambai chreih chai ka mik va . Adei Lê Tiến Hưng, anek saih tal  10  Pasak pato pakai thường xuyên huyện Cờ Đỏ, ban  Cần Thơ, mai cakak mbuk 0 đồng di  tịnh xá Ngọc Liên khan lac: tuk camereip adei mboh melau, min tuk khan lac khin cakak mbuk, dom  saai cakak brei chip, mboh biak bui sambai .

Dalam dom mbang nao ngak bruk pahla , menuac ngak di Lê Vững Barbershop hu thau jang song bac cakak mbuk meng abih hatung hatai di drei. Piah ka hatai ranam hu peih prong jang, rilo ayut ranaih umo takre bruk ngak pahla jang, akaok thun  2020, Lê Văn Vững peih tal bac cakak mbuk  0 đồng, hu jiak 10 urang tame bac. Tal bac 0 đồng lavik di abih lac  labaih  3 bilan  ye thau cakak, urang halei oh ka hu bruk ngak, meyah hu hatai takre, jeng hu Vững brei tame bac.

Adei Lê Thị Kiều Nguyệt, daok di  huyện Châu Thành, tỉnh An Giang mai bac bruk ngak tapa  mạng xã hội Facebook. Adei  Nguyệt brei thau: tuk camereip, oh jia hu tal bac  0 đồng, tabiak truh palei mai Cần Thơ haong hatai huac. Hadei di labaih sa bilan, Nguyệt mboh adei saai  di  Lê Vững Barbershop biakanit ranam gauk, biak jum pataom gauk:

"Tuk camereip mehit lac tal bac  0 đồng ye huac gru pato oh pato abih hatai, min tame bac ye meng mboh gru pato hu jien atau oh hu jien jeng dreih yau gauk.Gru tuk halei jeng dong ka adei dalam dom bruk, adei oh thau labik halei ye gru pato adei abih, gru oh padauk bruk.Yaok mbang nao ngak pahla lac adei halan hatain nao dahlau, adei oh khin dok di sang, nao tui piah dong ka urang, adei bac megru hu rilo jang"

Saai Vững brei thau:Gam song khóa bac 0 đồng, saai song dom auyt yaok urang meda blei sa sruh radeih  Honda piah cakak mbuk di yaok sang ka dom urang taha oh hu pren yava mai tal tiem, tal labik cakak mbuk pahla

"Adei oh cong khin hagait jang lac dom mikva adei saai,tong abih menuac urang cong adei jeng hu cakak mbuk siam. Bruk ngai di adei hu khik miet miet, oh padeih meteh dhi piah dong ka rilo menuac".

Urang “dang akaok”Lê Văn Vững song nyaom ayut ranaih umo lac dom urang hu baoh hatai siam, abih drei ka menuac sia saong hu menuac sia anit ranam.Meng dom sruh radeih patuh, urang dok tui ngak bruk biak hu makna di drei, tapa nan rik dong pambak prong kadha lac “hala siam pacang hala tahak” tal yaok menuac, yaok urang./.

Urang lang: Hanipha- 12/10