Chôl Chnăm Thmây daok ieu lac Tết raok thun bahrau di urang Khmer lac lễ praong, hu maong akaok di abih dalam thun.  Thun ini, Chôl Chnăm Thmây  hu mikva Khmer peih ngak dalam dom harei lac 14, 15 saong 16/4. Da-a mikva saong taong abih gauk duah thau hasit ka Tết Chôl Chnăm Thmây di urang Khmer daok di ban raya Hồ Chí Minh tapa kadha vak di Ái Nghiêm, urang vak di rayo sap ndom Việt Nam daok di ban raya Hồ Chí Minh:

Tukvak ini, labaih 25.000 bhap bini Khmer di ban raya Hồ Chí Minh  daok chreih chrai uan raok thun bahrau Chôl Chnăm Thmây – lac Tết meng kan hu makna lac var klaak nao dom bruk oh patuah jamo, caong ka sa thun bharau siam mekre, hajan siam, ngin lagaih, pala drak njauk, raidiuk trei ir, taneh ia siam mekre, kaya meda. Amuk A Thị Xuyên daok di xã Tân Kiên, huyện Bình Chánh, ban raya Hồ Chí Minh bui sambai lac:

   "Chôl Chnăm Thmây, di sang jeng ngak sa salao lisei piah da-a muk kei, raok thun bahrau, ramik bàn thờ, pasiam sang danaok piah anek kamuan mai pataom gauk bloh ba tame baha, dahlau di abih lac pok ka dom ong bhik, hadei di nan drei da-a muk kei."

Baha Candaransi (Chăntănrăng Sây), Phường 7, Quận 3 lac labik khik ramik saong ngak adat cambat di labaih 3.000 bhap bini bangsa Khmer.  Chôl Chnăm Thmây thun ini di baha Candaransi biak chreih chrai, hu jaik 5 ribau menuac mai ngak adat cambat, caong hu sa thun siam mekre. Sư Danh Lung, Trụ trì baha Candaransi brei thau: "Adat raok Chư Thiên thun bahrau lac raok yang 4 mbaok, brei mboh hatai từ bi hỉ xả, ini lac ilamu hadah krah di bhap bini urang Khmer. Ini jeng lac kadha gheih mekre di Chôl Chnăm Thmây njauk khik ramik, kayua yau nan ye, yaok adat cambat dalam tuk ini jeng hu makna biak praong, ngak ka bhap bini hu mbaok tame biak chreih chrai."

3 harei Tết di urang Khmer, yaok harei hu sa angan ieu karei di gauk, saong hu peih ngak di baha. Harei camereip ieu lac “Maha Songkran”, ini lac harei menuac sia ba gauk tame baha  cuh gilau, paling muk kei. Tapa nan, urang Khmer pandar menyek mbau piah rao mbaok tuk pagaiy, menei rup pabhap tuk biar harei, saong rao takai di tuk melam. Harei ka 2 ieu lac “Virak Wanabat”, ini lac harei ngak pahala daong ka urang oh patuah jamo dalam raidiuk. Harei ka 3 ieu lac “Tngay Leang Saka”, lac harei abih gauk pandar menyek mbau piah pamenei Phật, anek naih mek menyek mbau luk tagok dom urang praong, urang taha, aong hatai jia lac ngak yau nan hu khang tangin kajap takai, hu trường thọ saong haniem phul. Ini jeng lac harei praong di abih kayua harei ini hu maong yau harei báo hiếu ka ong muk, ong kaok, ong kei, ơn Phật. Sư  Tăng Ngọc An, Trụ trì baha Pothiwong, Phường 10, Quận 11 brei thau:

 "Dom sư dalam baha tacei pato phật tử ngak adat cambat, cầu an, cầu siêu, pamenei Phật di baha.  Bruk ini lac daong ka mikva padang siam mekre, patuah jamo dalam 3 ngày Tết, saong piah khik veik ilamu di bhap bini bangsa Khmer meng kan mai."

Lingiu dom adat cambat meng kan, dalam 3 harei Chôl Chnăm Thmây, mikva Khmer di ban raya Hồ Chí Minh daok peih dom bruk me-in sambai, ngak bui yau daoh, tamia, me-in dom kadha meng kan di bhap bini. Pa-uan Chôl Chnăm Thmây, dom urang pan akaok ban raya Hồ Chí Minh jeng hu nao rivang, tadhau ayuh, lain hadiah pandap di dom baha saong ka mikva bangsa Khmer daok di dom quận, huyện dalam ban raya. Ong Tăng Cẩm Vinh, Phó trưởng Ban Dân tộc ban raya Hồ Chí Minh lac:

 "Ban raya tuk halei jeng sangka daong palagaih ka mikva Khmer raok Chôl Chnăm Thmây biak bui sambai, haniem phul."

Dom adat cambat tanarakun hu peih ngak dalam 3 harei Tết Chôl Chnăm Thmây di urang Khmer Nam Bộ, dalam nan hu ban raya Hồ Chí Minh oh lac rah tabiak dalam baha saoh, bo urang Khmer daok da-a dom ong bhik mai sang drei piah tụng kinh, piah hu patuah jamo ka baoh sang./.