Ong Thông Kha, sa urang nong kathaot bangsa Cam daok di xã Tân Thuận, huyện Hàm Thuận Nam (t.Bình Thuận) ndom haong khaol dahlak lac, kathaot glaih glar lô, nan ye hu karja brei mesraiy phun jien drei njauk kham merat ngak mbang piah hu kaya meda.

Drut droi anak bruk Gilang pariak sarak karja peih ngak siam sarak daong brei mesre ka bhap bini Cam jeng ye ka 106 baoh sang urang Cam daok di xã Tân Thuận, ong Kha daok brei thau lac: Urang Cam biak tari tareng, kham merat ngak mbang min kurang phun jien, urak ini hu gilang pariak brei mesre meda ndom lac mikva thau buh phun jien tame pala drak, raong glang, jien menek tabiak jien.

Dalam thun bloh, piah pabak bruk caong khin mesre phun jien di bhap bani urang Cam dalam xã Tân Thuận, Gilang pariak sarak karja huyện Hàm Thuận Nam hu brei ka mikva mesre meng phun jien ưu đãi labaih 3 tỷ đồng.

Mikva mesre piah ngak mbang pablei salih, patagok kinh tế, paglaong rai diuk, patrun baoh sang kathaot khang kajap. Anak meta mboh lac, hu ralo sang meng hu phun jien mesre ini bo hu salih bahrau raidiuk. Yau sang amuk  Thông Thị Nghé. Meng bruk buh jien blei khak, iek glang ia njuh ka 200 gheng thanh long, urak ini sang amuk trun pajaih hu 300 gheng tra. Meng meteh ha taneh thanh long hu mong iek siam ini, amuk kuhria mboh dahlau lac jien mek tame yaok bilan ginup mbang cai dalam sang, oh daok huac iek lipa yau dahlau tra.

Amuk Nguyễn Thị Liễu bui sambai khan lac: “Meng phun jien mesre bo dahlak raong hu 3 urang anek bac blaoh đại học, rai diuk hu tani tanat”.

Ong Nguyễn Thái Hòa – Akaok Gilang pariak sarak karja huyện Hàm Thuận Nam brei thau: “Gilang pariak hu pambuak bruk haong pakat ủy, karja saong dom kapul, nyaom xã Tân Thuận, dom puk palei piah brei thau ka sarak brei mesre ưu đãi di Đảng saong karja ngan haong bhap bani urang bangsa takik  (di puk palei ini lac urang Cam). Khaol dahlak hu niêm yết brei thau cambaih laih bruk brei mesre. Dahlak haong dom urang ngak pak ini hu tacei pato anih hatai piah ba mbuan lagaih di abih ka mikva tuk mesre phun jien”.

Meng bruk pandar siam phun jien mesre di urang Cam xã Tân Thuận nyu pambak siam tal bruk cân đối, parabha phun jien brei mesre meng kadung jien puk palei ủy thác ka Gilang pariak sarak karja, taphia di nan padang hatai jia khang kajap ka bhap bani urang bangsa takik tal dom sarak di Đảng saong Karja.

Likau la gauk angaok mblang bein hijao mekre bak baoh thanh long, ong Thông Kha ndom lac: Ndua dhal phol Karja, min urang mesre jeng njauk tari tareng. Urang Cam khaol dahlak thau cambaih: “Hu ngap ka mưng hu si mbang”. Biak njauk yau nan, khaol dahlak caong lac meng bruk daong di Gilang pariak sarak karja saong tui jalan “Hu ngap ka mưng hu si mbang” di drei, rai diuk bhap bani urang Cam di labik ini hu salih bahrau tapa yaok harei, hu rai diuk dak harei dak trei sil./.