Katê daok rah tabiak dalam chreih chrai, bui sambai di palei Hữu Đức, xã Phước Hữu, huyện Ninh Phước. Yaom lac lingik pandiak, min biak ralo urang Cam, meng urang taha tal uraniah, jeng hu mbaok piah raok khan ao Pô Inư Nưgar meng xã Phước Hà mai palei, ini lac adat praong njauk ngak dahlau di abih. Pô Inư nưgar lac sa dalam dom Pô Yang ginreih hu buh rilo pren yava daong ka bhap bini Cam.  Amuk hu daong ka urang Cam thau pala drak, thau menyim, pet..mbiah tal harei ini. Kayua yau nan ye, adat raok khan ao pô yang jeng lac tuk piah ka bhap bini Cam brei mboh hatai thau dhar phor di drei tal pô Yang, tapa nan, likau po yang sraong daong ka dom thun anak tal, lingik tasik siam mekre, pala drak njauk, anek taco hu pren yava khang kadang piah ngak mbang, pala drak, pasiam raidiuk, dak padang puk palei siam mekre, kaya meda. Sa-ai Nại Thành An daok di palei Hữu Đức, xã Phước Hữu, huyện Ninh Phước, tỉnh Ninh Thuận lac:  " Kate tha thun tha mbang..."

Mai tal palei Cam Mỹ Nghiệp, ban sit Phước Dân, huyện Ninh Phước, tỉnh Ninh Thuận, gam saong bruk hu mboh dom kumei dara Cam daok tapen kik menyim dom blah khan bai hu bingu la hadah mekre tui ilamu Cam, tuai damuai daok hu maong dom ragam tamia, dom ragu daoh bhap bini Cam kayua dom nghệ nhân Kalup Kapul alat ragam meng kan Camlabik ini parang me-in. Kadha bahrau dalam mbang Katê thun ini, lac karja palei hu peih ngak dom bruk yau ye: pakacah cuk ngui khan ao Cam meng kan, pakacah ngak mbang huak, pakacah tangin gheih ngak…hu mbaok dom nghệ nhân, dom thợ giỏi di dom palei ngak. Jien piah ngak dom bruk ini jeng kayua bhap bini rik tame. Sa-ai Hán Văn Luận, urang dang akaok palei Mỹ Nghiệp, ban sit Phước Dân, huyện Ninh Phước brei thau:

 Katê thun ini rah tabiak njauk di tuk “Lễ hội Nho saong Vang Ninh Thuận 2016” nan ye dak chreih chrai bui sambai jang. Dom harei ini, hu biak ralo tuai damuai mai tal Ninh Thuận rivang me-in, duah thau ka ilamu Cam tapa adat cambat tanarakun, tapa mbang ngui, daok dang tapa daoh, tamia. Adei Nguyễn Thị Ngọc Như, urang tuai mai meng tỉnh Khánh Hòa bui sambai lac:

"Mbang akaok meti adei mboh Kate di bangsa Cam, adei bui sambai lô. Ini lac mbang camereip adei mboh rilo menuac yau ini." 

Jeng mboh chreih chrai yau adei Ngọc Như, ông Justin Kabaros – sa urang tuai Mỹ tuk mai tal Ninh Thuận lac:

 “ Ini lac harei biak praong di urang Cam, lac harei adei sa-ai amaik ame taom gauk urang ngak bruk karja jeng hu padeih bruk, urang ngak hamu jeng padeih bruk. Mai veik Việt Nam hu taom veik ayut sahabat, kol dahlak bui sambai lô, chreih chrai lô."

Katê lac labik pataom veik, lac kreih camin hadah brei mboh dom bruk ilamu di urang Cam. Kate brei mboh veik biak cambaih dom adat cambat, tanarakun, dom ilamu nghệ thuật hadah krah di urang Cam. Urak ini, tỉnh Ninh Thuận daok pok hồ sơ khoa học likau UNESCO  công nhận Katê lac yaom glaong inem krung ilamu phi vật thể di menuac sia dunya. Katê saong dom yaom glaong di nyu dalam raidiuk urang Cam jeng yau urang Cam Ninh Thuận, biak njauk haong bruk pok likau nan./.