Palei Vĩnh Hiệp, xa Hòa Bình, tinh Ca Mau daok hu 1 baoh sang kathaot saong 10 baoh sang jaik kathaot. Piah daong rahra patruh kathaot, karja palei daok ngak cambaih laih dom jalan langyah “njauk urang, njauk bruk”, dalam nan hu bruk pak meng tangin hu maong yau ye sa jalan ngak lagaih haong anek kamei palei pala.

Di labik daok dang me-in di Kapul Urang kamei puk palei Vĩnh Hiệp, labaih sa pluh adei sa-ai kamei di rilo thun umo karei gauk yaok harei daok jal val di dom ndap nda ngak mekre meng tangin meng njam hang saong talei phun talaoh tui bruk kakei blei di gah ngak mbang pablei salih.

Sa-ai Phan Thu Hương daok di palei Vĩnh Hiệp brei thau, bruk pak gak oh kan, tok brei hu tacei ba dom var lac meda ngak hu. Yaok adit, patui tukvak, sa-ai ngak hu labaih 10-15 baoh ndap nda. Yaom lac jien oh rilo, min jeng daong ka sa-ai hu jien mek tame piah pandar dalam baoh sang. Sa-ai Hương caong khin gah pablei salih patui patagok rilo thaik thaot bahrau, hu yaom pataom blei siam jang piah adei sa-ai kamei parilo jien mek tame. Urak ini, adei sa-ai kamei taduan ndap nda mai sang tukvak daok laho lahei.

"Jeng lagaih ralo, drei patak pataom bayar jien ndien, jien ia, hu lagaih ka bruk nan, ngak bruk nan drei hu jien mek tame. Caong khin kongti ngak rilo thaik thaot, blei hu yaom labaih jang sa sit piah adei sa-ai kamei hu jien rilo jang".

Daok sa-ai kamei Nguyễn Thị Huệ, bahrau tame ngak bruk pak gak labaih 4 bilan ini. Yaok tuk salah blaoh sa thaik thaot, kongti brei salih tapa thaik thaot karei, ndap nda kaya jeng hu pabak tal labik, adei sa-ai kamei tok taduan mai ngak tui thaik thaot hu dahlau. Meng tuk hu bruk ini, baoh sang sa-ai Huệ hu jien mek tame, yaom lac oh rilo min hu jeng karo tani tanat.

"Praong thun paje jeng oh ngak di langiu jeng veik o, tok hu daok di sang ngak bruk ini min. Pataom tame di ini pato, pato blaoh bruk thei thei ba nao sang ngak, abih thaik thaot ini ye urang ba thaik thaot karei mai".

Jeng ba drei tame bruk pak gak, sa-ai kamei Lê Thị Hiền brei thau, bruk oh kan min brei ka hu bruk tani tanat, rilo meng lac dom bruk yau payeng rup saong ngak pabah ndap nda. Tui sa-ai, bruk ini lagaih, gam ngak gam raong dua anek sit, oh nao ngak atah hu. Yaok harei sa-ai Hiền ngak hu labaih 2-3 ndap nda. Sa-ai caong khin Kapul Urang kamei saong bhum palei hu dom danak dak daong piah parilo jien mek tame ka urang kamei, rilo meng lac dom urang praong thun umo atau daok raong anek sit.

"Janih kaya ini ngak samar sa harei hu 2-3 baoh, tukvak lahei rilo ka meng ngak hu, gaok mai hu harei oh ngak hu hagait. Ini ye adei khin kapul urang kamei hu daong ye daong ka dom adei sa-ai kamei di ini sa sit yau nan, kayua di ini rilo meng lac urang praong thun ralo umo, urang kamei hu anek sit ye oh ngak hu".

 Amuk Nguyễn Trúc Ly, Bi thu Chi mbo pul palei Vĩnh Hiệp brei thau, rilo urang kamei palei pala praong thun umo atau hu anek sit nan oh nao ngak atah hu. Kuhria rah tapa di yaok harei, adei sa-ai kamei ngak hu 2-3 ndap nda, jien mek tame labaih 50.000-60.000 dong. Yaom lac jien mek tame daok takik, min jeng njauk iek praong lac adei sa-ai kamei biak tari taring ngak bruk, oh pambak caong maong tame bruk daong. Bruk pak gak biak lagaih kayua brei bruk ngak di tapak, blaoh hu brei peih praong bruk ngak saong salih yaom pablei piah urang ngak bruk takik glaih glar jang. Amuk Nguyễn Trúc Ly caong khin, tukvak anak tal, bhum palei patui veik taduan hu bruk daong di karja palei piah daong urang kamei palei pala hu kein lagaih patruh kathaot karo kajap.

"Peih praong bruk ini tabiak, brei yaom kaom darak pasar glaong sa sit piah mikva drei tani tanat jang sa sit, lac yaok harei ngak labaih 2-3 baoh, meyah ba anek nao bac, sangka lisei ia ye gaok mai 2 baoh min, meyah 2 baoh hu lime pluh dom, oh ka pabak 60 ribau dong sa harei, kuhria mboh lac jien mek tame di mikva drei daok biar. Blaoh mikva maong tapa jeng mboh chreih takre ngak bruk jeng ta-eng uak drei tagok blaoh oh caong maong".

Bruk pak gak di puk palei Vĩnh Hiệp, xa Hòa Bình daok daong brei bruk ngak, daong urang kamei palei pala hu jien mek tame, dalam nan lac dom urang praong thun umo atau daok raong anek sit. Bruk ba bruk ngak tal palei pala hu maong yau lac bruk ngak lagaih, daong patagok yaom kaom ngak bruk, pasiam raidiuk saong brei kein lagaih ka urang kamei palei pala dak harei dak patruh kathaot karo kajap, daong patagok kinh te, xa hoi bhum palei./.