Page ini 18/12, Pahadar 20 thun dak padang Danak dak papar sap Cam saong alin paok jien bac ka anek saih bangsa Cam peih tabiak di Rayo sap ndem Viet Nam - Jabat ngak bruk di TPHCM.

Sap Cam lac sa dalam dom danak dak papar sap bangsa takik di Rayo sap ndem Viet Nam. Thun ini, sap Cam gam haong 12 danak dak papar sap bangsa karei di Rayo sap ndem Viet Nam harei harei patagok bruk pathau khan meng sap ndem, akhar huroh vak di bhap bini, rik tame ngak salah biak siam bruk jao brei di Rayo sap ndem Viet Nam, rik tame  ngak siam bruk “ Bhap bini kaya meda, taneh ia khang kajap, xa hoi sumu, dan chu, ilamo hadah krah”.

Ngan haong jalan “ Ndem ka bhap bini di khol drei, ndem ka bhap bini drei pang, piah bhap bini hu ndem”, luac 20 thun tapa, dom urang jakar, urang vak, urang cihvak, urang lang tapa sap Cam , urang ba panuac, urang pasang iek sap Cam hu ngak bruk ngak oh lac harei melam, rik tame ngak siam bruk pathau khan meng sap bangsa takik di Rayo.

Ong  Đỗ Thái Hùng, Akok mban Bangsa  - VOV4 khan lac:

“Khol dahlak njauk patui bruk pambak praong veik, patagok jang veik dom bruk ngak hu di jalan pathau khan piah hu tal mikva urang bangsa takik jang. Dahlak sahaneng  dalam tukvak tapa papar sap Cam di khol drei hu ngak siam bruk nan”.

Danak dak papar sap Cam oh lac pathau khan samar drah, njauk tui dom jalan, sarak di Ndang, Karja, bo daok brei mboh, khaw tin dom gah dalam raidiuk di bhap bini bangsa Cam dalam nan dom bangsa adei sa-ai dalam bhap bini dom bangsa Viet Nam. Yaom lac, danak dak papar sap Cam hu jang yau pandap pachreih jalan sahaneng oh kurang hu di dalam bhap bini Cam di dom tỉnh Ninh Thuận, Bình Thuận saong dom tỉnh Gah Meraong negar.

Hu mbaok di var pahadar, sa-ai Đặng Trung Thành, Akok palei Bình Hoà, xã Phan Hòa, huyen Bắc Bình, tỉnh Bình Thuận khan lac:

“Danak dak papar sap Cam pathau khan dom asar kadha di Ndang saong Karja, daong ka mikva samar duah thau khaw tin, pabak ilamu siam lagaih dalam raidiuk  piah patagok bruk ngak mbang pala drak. Caong khin di dahlak jeng yau mikva bangsa Cam lac danak dak pathau khan khaw tin biak lagaih saong njauk hatai takre  di bhap bini Cam jang”

Langiu di bruk ba tagok riyak dom Danak dak papar Sap Cam, dom gah truyen thong sap Cam karei yau Website sap Cam angaok VOV4, Fanpage sap Cam angaok nen tang taka so di Rayo hu saong daok njom pambak tagok tal 180.000 mikva bangsa Cam dom tinh, Ban raya. Nan lac dom tinh bhum Kreh meng Ninh Thuan, Binh Thuan, Binh Dinh, Phu Yen; tal Ban raya Ho Chi Minh, Binh Phuoc, Binh Duong atau trun bhum gah mala yau An Giang, Tay Ninh…

Tapa 20 thun, Danak dak papar Sap Cam hu taduan rilo yai Pariak, yai Ban, yai Khuyen khich di dom mbang Pataom mbaok papar sap, yai thuong Sap ndom, Viet Nam.

Ong Trần Minh Hùng, Phaok Taong Yam ndok Rayo Sap ndom Viet Nam ndom lac:

“Ini lac sap ndom di Negar, sap ndom di Ndang, Karja. Dom yaom glaong chinh tri di nyu praong glaong jang biak rilo. Nan lac bruk samu gauk dalam dom bangsa, dalam 54 bangsa adei sa-ai saong bruk di drei hu patagok, khik ramik yaom glaong ilamo di bangsa. Dalam tukvak anak tal, danak dak sap Cam hu patui veik oh padeih bruk salih bahrau piah paglaong danak dak hu siam gheih, paglaong jang sap ndom di mikva bangsa takik.

Thun 2025 anak tal, paglaong dom bruk jak jeng mek hu, sa dalam dom bruk ngak pasak di Bilik Sap Bangsa, Jabat Rayo Sap ndom Viet Nam di TP.HCM lac peih ngak bruk roh duah, padang meng inelang Viet – Cam hu pandar dalam di Rayo Sap ndom Viet Nam. Nan lac bruk jak jeng siam lagaih salam uan harei pahadar 80 thun padang Rayo Sap ndom Viet Nam saong 50 thun peih paha gah Merraong, yasa taneh ia.

Gam haong nan, Bilik Sap bangsa, VOV TP.HCM saong VOV dalam nan hu patui veik kham merat piah danak dak papar sap Cam dak harei dak hu salah blaoh, daong paglaong jak jeng, siam lagaih dalam bruk ngak sarak bangsa, paglaong yaom kaom, ilamo dom bangssa takik, paglaong bruk samu gauk, pasiam veik saong paglaong bruk gul pataom dom bangsa, paglaong hatai je di bol bhap mikva haong Ndang saong Karja./.