![Urang lang: MINH KIÊN](/themes/custom/vov_4/images/avatar.png)
Sa drei sa-ai Trang Kim Tiền, pasang oh daok, sa drei sa dran daok di palei An Thành, phường An Tây, ban Bến Cát, tinh Binh Duong raong klau anek sit. Raik diuk di sa-ai ralo kan kandah meng nan mai, urak ini sang danaok saai piah daok oh daok kajap. Sa-ai caong hu sa baoh sang khang kajap piah pacang pandiak pacang hajan ka dom anek bik min oh lac mbuan. Thau ka bruk kan kandah di sa-ai Kim Tiền, akaok thun 2024, Uy mban MTTQ phuong An Tây hu jak ba dom urang ngak pahla ngak phol saong buh tabiak kadung jien daong urang kathaot piah padang sa baoh sang bahrau daong ka sa-ai. Baoh sang praong hu 52m², hu padang haong abih jien labaih 120 trieu dong. Tuk taduan hu baoh sang bahrau, sa-ai Tiền biak mboh drut druai saong biak uan tabuan dalam hatai.
“Hu palei pala daong brei sang daok, dahlak biak uan tabuan. Dahlak kham marat ngak mbang piah maong iek ka 3 anek nao bac. Mayah harei hadei hu kein lagaih, dahlak caong ngak sang ngak pasiam laneing jang”
![Sa-ai Trang Kim Tiền (gah hanuk) haniem phol dalam baoh sang bahrau.](/sites/default/files/styles/large/public/2024-12/anh1._sa-ai_trang_kim_tien_gah_hanuk_haniem_phol_dalam_baoh_sang_bahrau.png)
Bruk ngak ka sa-ai ieu lac sa di dalam 441 baoh sang kan kandah dalam tinh Binh Duong hu daong padang jeng ye ngak pasiam veik sang danaok daok meng Kadung jien daong urang kathaot saong jak ba meng thun 2021 mai tal ini. Abih tih jien ka dom danak dak ini hu tagok labaih 36 ty dong. Jang meng sarak ini, thun 2021 mbiah tal ini, Binh Duong brei patrun hu 5.447 baoh sang urang kathaot, oh hu baoh sang halei kathaot gilac veik, dom baoh sang kathaot trun daok 1,08%.
Muk Nguyễn Kim Lan, Phaok akaok Uy mban MTTQ Viet Nam tinh Binh Duong brei thau, sa dalam dom bruk ngak siam lagaih di tinh ieu lac hu bruk jak ba dom gah piah sangka, daong ka urang kathaot. Meng kadung jien ini, thun 2025, tinh mada patui bruk padang saong pasiam veik sang ka 419 baoh sang kan kandah brei ka sang danaok daok.
“Jeng biak caong hu dom kapul, gah ngak mbang pablei salih, urang rik daong, padang kadung jien ngak ka urang kathaot piah pataom dom kadung jien ini sangka ka urang kathaot, urang jaik kathaot; sangka ka urang daok gaok kan kandah, pasang iek ruak, urang ruak trak, alin hadiah jien pachreih bac piah pachreih ka dom anek saih hu mai tal sang bac”
![Urang pan akaok So Lao ndong - Thuong binh saong Xa hoi rivang tangi, thau ka bruk kan kandah di baoh sang kathaot hu bruk daong.](/sites/default/files/styles/large/public/2024-12/anh2._urang_pan_akaok_so_lao_ndong_-_thuong_binh_saong_xa_hoi_rivang_tangi_thau_ka_bruk_kan_kandah_di_baoh_sang_kathaot_hu_bruk_daong.png)
“Brei gal vah” ka urang baoh sang kathaot, meng bruk daong phun jien ngak mbang, pablei salih mek laba lap jeng hu gilang pariak peih ngak. Jabat daong brei kein lagaih, mbuan jang ka bruk ngak harak gal piah ka urang kathaot mbuan sanang dalam bruk mesraiy nyim phun jien ngak mbang. Gam haong nan, dom bhum palei, jabat karja jeng jak ba dom labik dhua, urang daong pajaih phun pala, anek athur raong ka baoh sang kathaot piah hu kein lagaih patagok bruk ngak mbang.
Ong Trịnh Đức Tài, Yam ndok So Lao ndong – Thuong binh saong Xa hoi tinh Binh Duong brei thau, tukvak tapa, So hu pato tacei dom sang bac pato bruk ngak ruah dom bruk ngak njauk haong hatai caong di gah ngak mbang pablei salih saong kein lagaih di bhum palei. So kajar hu pataom tame bruk pato pakai dom bruk ngak piah brei ka urang ngak nong meda pandar tame bruk ngak mbang. Meng di thun 2021 mbiah tal ini, dom labik pato bruk ngak hu pato pakai ka 170.000 urang, dalam nan dom urang hu bruk ngak hadei tuk bac megru bruk ngak lac labaih 90%.
“Dalam tukvak mai meng anak tal, kol dahlak hulin daok patui bruk pasang iek khau tin di darak pasar bruk ngak, hu dom bruk ngak bahrau hu ba tame dom danak dak pato pakai ka njauk haong gah ngak mbang pablei salih. Khik kajap ka gah ngak mbang pablei salih hu bruk ngak tani tanat, rahra hu bruk ngak piah daong patagok kinh te – xa hoi truh kathaot karo kajap”
![Rilo jien pachreih bac hu alin hadiah ka dom adei dalam baoh sang kathaot, uranaih jaoh jo.](/sites/default/files/styles/large/public/2024-12/anh3._rilo_jien_pachreih_bac_hu_alin_hadiah_ka_dom_adei_dalam_baoh_sang_kathaot_uranaih_jaoh_jo.png)
Piah padang ngak jeng pasak kinh te dalam bhum, ngan haong ngak kong saong yitvu bahrau, ndo thi hijao, bruk patrun kathaot karo kajap ieu lac sa bruk ngak drah samar chip. Langiu di nan bruk parilo dom bruk daong meng jien padai jeng brei paglaong ilamo ka urang kathaot piah dom urang nan ta-eng drei sang ka ngak bruk. Bruk taong yaom, pasang iek jalan ngak dom danak dak trun kathaot brei hu paglaong piah khik kajap kadung jien hu pandar siam lagaih saong mek hu jak jeng siam di abih./.
Viết bình luận