Di sang bac THCS Hòa Đông, xa Hòa Đông, huyen Krông Pắc, tinh Đak Lak, bui sambai sap ndom mayai di gru pato, anek saih saong urang jakar bol lin Lu ndoan Dac cong bo 198. Abih gauk pajum tangin bah mblang, daraoh hareik, cakak dhan phun piah pahacih mblang sang bac saong ngak pasiam dom paban kik khut tayah…Muk Bùi Thị Mộng Thường – Phaok Hieu truong sang bac THCS Hòa Đông khan lac, ralo thun tapa ndon vi pambuak mayut bhian daong iek sang bac dom bruk piah pato magru hatai ranam nagar, pato magru adat meng kan di cach mang ka anek saih thau krein ilimo…Muk Bùi Thị Mộng Thường mayai lac:

“Sang bac hu peih tabiak danak dak brei ka anek saih hu mbaok tame pasram sa harei ngak bol lin dalam ndon vi bol lin. Tapa danak dak khol dahlak hulin mboh biak siam makre, pato ka dom adei thau ranam Nagar, saong thau krein cambaih laih di bol lin va Ho. Anek saih hu mbaok abih gauk saong ni lac sa bruk biak gheih ghang di sang bac saong Lu ndoan Dac cong bo 198”.

Xa Ea Yiêng jang lac ndon vi pambuak mayut haong Lu ndoan Dac cong bo 198 meng thun 2012. Lữ đoàn hu padak padang 1 baoh sang gul pataom daong ka baoh sang kan kandah; daong kaya pandap ka xa, jien padai saong prein yava, padak padang 1km jalan mbak nao mai di bhum palei; ngak pasiam 6km kraong ribaong. Dom tukvak pala drak blaoh, ndon vi bhian alin brah ka dom baoh sang kathaot, jaik kathaot; alin hadiah ka dom urang dalam sarak karja di tukvak harei ngak adat, harei Tet. Ong Phạm Hữu Chuyện – Bi thu Ndang uy xa khan lac:

“Dahlak hulun caong Lu ndoan 198 marat prein sangka veik bruk padak padang dom baoh sang anit ranam ka dom baoh sang kathaot rambah. Pajum tangin haong xa ngak veik dom jalan mbak piah mikva nao mai, pajeng kaya nong, pandap pandar, pala drak saong yuak kuak hu lagaih. Ngan haong nan hu peih dom guan pathau khan piah patagok sahaneng hukum nagar di mikva bangsa takik dalam rai urakni”.

Tui dai ta Vũ Ngọc Hưng – Chinh uy Lu ndoan Dac cong bo 198, padaok di bhum taneh praong, ralo bangsa takik diuk rai. Piah padak padang kajap hatai ranam di rahra, Lu ndoan hu pambuak mayut haong UB Bhap bini ralo xa, sang bac saong kapul rahra. Meng thun 2021 tal nin, ndon vi padang hu blaoh 13 baoh sang gauk yut, 14 baoh sang anit ranam, 9 baoh sang gul pataom saong dua sang bac alin ka karja bhum palei saong rahra di labik padaok bol lin. Lingiu di nan hu daong labiah 10 tan brah di bilan pala drak blaoh ka mikva; yaok pluh rabau harei ngak bruk pasiam jalan mbak nao mai, kraong ribaong, yuak kuak kaya nong; peih ngak ralo mbang iek ruak, paphat brei jru ka labaih 7.000 urang ruak…Dai ta Vũ Ngọc Hưng khan lac, ngan haong bruk padak padang prein masuh patagok, bruk jak ba rahra jang hu lữ đoan caik di hatai glaong abih:

“Khol dahlak hulin daok jhul catang bruk pathau khan ngak pambuak mayut kajap di bol lin – bhap bini. Pambuak pajum karo saong pakat uy dang, karja hu mbaok tame daong padak padang palei pala bahrau ka dom xa. Marat prein peih ngak dom danak dak daong padang baoh sang gauk yut, baoh sang anit ranam, baoh sang gul pataom saong sang ilimo bhap bini…Tui haong nan, daong mikva yuak kuak…”

Dom bruk pambuak mayut, bhian jak ba mikva biak siam makre di Lu ndoan Dac cong bo 198 tỉnh Đak Lak, oh tok rik prein daong ba dom bhum palei di labik padaok bol lin ngak siam bruk salamat nagar, bo daok pato magru adat meng kan cach mang ka uranaih, pato ranam taneih ia, pajum pataom kajap hatai ranam di bol lin saong rahra. Tapa di nan, padak padang dak harei dak khang kajap “Hatai ranam di bhap bini”, ngak hadah siam gheih di adat meng kan di Bol lin Bhap bini Viet Nam./.