Ban raya HCM nan lac labik hu rilo ilamo siam gheih mai meng dom bangsa. Bruk nan ngak jeng bein ilamo siam gheih karei pachreih hu ralo tuai damuai jaik tah vaih tame. Taplak taka 157 jalan Dương Bá Trạc, Quận 8 hu rilo urang Cam Islam daok abih dut haong 16 jama-ah dalam Ban raya HCM.

Pak ini, urang Cam daok khik du dom ilamo bangsa, mboh di meta lac dom blah ngan ao ngui cuk tui meng kan lavik mai. Yau ye, urang likei ngui khan Sarong, atau siuk Hijab me-om akok di urang kumei hu ngui cuh yaok harei.

Diuk rai meng sit tal praong tagok di labik ini, ong Abdol Halim, Phaok mban quan tri sang megik Jamiul Anwar, Q8 khan lac, meng dom thun 1960 bhap bini urang Cam di tỉnh An Giang ba gauk mai ini daok saong ngak mbang. Labaih 50 thun tapa, bhap bini daok khik tamo ilamo di bangsa drei. 

Ban raya HCM hu abih tih 16 jama-ah di urang bangsa Cam, dalam nan hu sang megik  Jamiul Anwar di Quận 8, hu padang ngak meng thun 1966 lac jama-ah hu rilo urang Cam Islam diukrai. Ini lac labik piah hakim saong dom urang likei Cam mai ngak abadat sampahyang 5 mbang yaok harei tui dom adat cambat di agama Islam. Yaok harei, tal tuk ngak abadat, dom urang likei yaom lac thuvi thuvar yau halei jang salih khan ao hacih tagok sang megik sapahyang likau brei kajap karo saong salamat ka baoh sang, manuac sia bhap bini dalam jama-ah.

Urang Cam labik ini thei jeng thau akhar Cam saong ndem meyai cambaic sap Yuan. Tabiak jalan ndem meyai sap Yuan, daok di sang meyai sap Cam haong gauk. Yaok baoh sang urang Cam hu sakavi ka drei eng piah kuhria iek harei bilan peih ngak adat agama. Piah khik ramik ilamo amuk kei oh brei lahik nao saong panuac ndem meyai di bangsa, di Sang megik tuk halei brei peih tal pato sap Cam ka rilo rairah, meng uranaih, dam dara saong urang taha umo. Tal bac ini hu peih ngak meng labaih 50 thu ini. Dom adei hu bac akhar huroh jawi, huroh Ả Rập, palih cih tui akhar Cam. Urak ini tal bac hu 5 cei gru saong 2 anai gru pato.

Ong Haji Mohamad Amin, Na-ep Sang megik Jamiul Anwar lac sa dalam 7 urang pato panuac, khar vak di urang Cam pak ini. Ong khan lac, urak ini oh ka hu tapuk birau pato sap Cam gah meraong yau nan ye dom cei gru nai gru pato tui 3 baoh tapuk di klau tal bac 1-2-, tui dua sap Cam – Viet, kayua Sở Pato megru Tây Ninh saong An Giang ngak tabiak. Abih hatai anit ranam ka bangsa, caong khin khik ramik panuac ndem saong akhar vak di bangsa yau nan ye dom gru halan hatian mai pato:  “ Salah bruk Toul halei yau Toul nan ye ngan gauk klak masa tukvak mai pato ban ugama, bangsa Cam drei nan brei lahik oh…”

Kaya pandap mbang, rija roya jeng lac ilamo siam gheih karei di bhap bini Cam paka Quan 8. Yaok thun urang Cam hu dom harei roya praong di bilan 4, bilan 9 tui daka ia bulan, yau: Roya haji, bilan Ramadal…Abih di nyu lac bilan Ramandal, mikva pablei rilo pandap mbang, kaya menyum, ahar baoh kayau, khan ao…tui ilamo di urang Cam Islam. Ini lac bruk hu mbang dom kaya kan di urang bangsa Cam dalam ban raya.  Sa-ai Ca Riem khan lac: “Bilan Ramandal urang blei pandap birau piah mbang raya, blaoh bilan eik nan mikva tame bilan Roya talaih eik.”

Uak drei tame haong bruk patagok di ban raya, mikva urang Cam di labik ini hu bruk sangka di UB bhap bini Phuong 1, UB bhap bini Q8 saong dom sarak di Ban raya HCM yau nan ye rilo urang ngak bruk di di bhum palei, abih di nyu lac kapol nyaom yau dam dara, urang kumei, Mat tran Negar…

Tui ong Halim, sang megik Jamiul Anwar, dahlau diah, urang kumei Cam bhian daok sang iek kuhria bruk ging gaok, taneh huak, oh hu tabiak ngak bruk gah langiu. Min urak ini, urang kumei Cam jeng hu ngak bruk yau peih tiem pablei salih, jhik khan ao, pablei pandap di sang…Urang uranaih ye hu ao bac, hadei bac baoh hu nao ngak bruk gah langiu. Yau nan ye raidiuk di mikva dalam puk paga dak harei dak siam jang.

 “Meng hadei jit ruak COVID-19, mbiah tal ini raidiuk mikva hu tani tanat jang. Mbiah tal ini mikva pablei salih oh hu ralo. Min mikva saong adei sa-ai hun gauk haong karja gaik ngak jalan kol anek naih nao bac da-a sa-at mat, anak sang megik khol hulin ngak brei hacih ye”.

Muk Zami Nas, daok pak ini meng sit praong tagok, baoh sang muk daok rilo kan kandah, yaok harei muk pablei pandap mbang panal, duah jien raong baoh sang. Meng hu bruk daong di karja palei baoh sang muk hu tapa truh kathaot: “Hulin pablei pak ini yaok harei, hulin hu Kapol urang kumeri daong phun jien 5 trieu ndong piah padang labik pablei salih…”

Bruk chreih chrai uan raok thun birau nasak Ula Naih 2025 hu pambak tal yaok janah jalan, puk palei Cam. Ngan hong urang Cam, Tet Nguyen dan oh njauk tet di urang Cam, min ba drei tame haong tet bangsa, urang Cam hu veik sa tet tra. Thei jeng bui sambai, uan raok cang mong sa thun birau  salamat saong haniem phol. Dom harei ini, dalam yaok baoh sang, yaok urang hu mai taom gauk ngak dom janih ahar, pandap mbang meng kan di bangsa piah uan raok Tet.

Sa-ai Fa-ti-mah bui sambai lac, ngan hong urang Cam, Tet Nguyen ndan di bangsa Viet Nam jeng lac tuk piah pato padar anek taco mong gilac veik sa thun tapa bruk hagait ngak hu, bruk hagait oh ka ngak hu piah thun anak kham merat jang.

 “Karja pak ini sangka lo lo. Mikva hu mesre phun dhar piah ngak mbang. Raya Tet , urang Cam sang kan daman jeng hu karja daong brei pandap Tet.”

Yaom lac bilan ban pataih daok mai blaoh. Daok rilo kan kandah, glaih glar min mikva urang Cam pak ini jeng mboh bui sambai, kham merat haong dom bruk drei ngak hu siam dalam thun blaoh tapa. Tame thun birau ini, caong khin ka raidiuk trei sir, haniem siam mai haong yaok baoh sang urang saong taong abih mikva urang Cam dalam Ban raya Ho Chi Minh./.