Ong Lâm Tấn Bình, daok di palei Bình Tiến, xa Phan Hiệp, huyen Bắc Bình ieu lac sa urang di dalam dom urang thau ilamo but pajaih Cam.

        Praong tagok meng bruk adaoh tamia rahra di bhum palei Cam, meng thun 1990, ong Bình hu urang pan akaok huyen tuk nan panduan nao ngak bruk di Pasak Ilamo, Padhih huyen Bắc Bình, hadei nan hu mai ngak Phaok Yam ndok Sang adaoh tamia phling Biển Xanh gam haong ngak Akaok kapul adaoh tamia bhap bini Cam tinh Bình Thuận. Tal thun 2010, ong Lâm Tấn Bình hu panduan nao ngak Yam ndok Pasak Parang ilamo Cam Bình Thuận, tal thun 2016 ye ong padeih tui sarak abih thun ngak di karja.

        Yaom lac mada hu rah tapa rilo labik pan akaok saong dom jabat, labik karei di gauk, min di yaok jabat, labik ngak bruk, ong Bình jeng ngak sa bruk lac gah ilamo saong oh meda khan abih hu dom bruk jak jeng no ong ba mai ka than drei jeng yau bhum palei saong tinh meng dom bruk hadah krah, ilamu nghe thuat di drei.

        Meng hatai anit ranam saong thau ka bruk di drei haong ilamo bangsa, meng tuk padei bruk ngak mbiah tal ini, ong Bình tari taring pato ilamo bangsa ka uranaih dam dara, daok tame bruk khik ramik, ngak medeih hatai anit ranam ilamo bangsa dalam bol bhap rahra, abih di nyu dalam nan hu uranaih dam dara.

        Ong oh hadar ong hu pato ka dom urang, tok thau lac rilo uirang hu ong abih tung tian pato tacei hu thau taong Ginang saong chreih chrai hu mbaok tame bruk pato yau ong.

        Ong Bình brei thau, tal bac jaik abih bo ong hu mbaok tame pato ragam ragu bangsa Cam di xa Hàm Trí, huyen Hàm Thuận Bắc, tinh Bình Thuận.

"Tapa tal pato ragam ragu bangsa Cam di palei Lâm Giang, xa Hàm Trí, dom adei hu mbaok tame tal bac haong tukvak 20 harei ye oh meda halei bo thau abih meyah pato tui jalan klak. Min kayua hu roh duah ngak jeng giáo án piah pato tui jalan ragu ragam pho thong, nan bruk pato saong bac nyu mbuan jang."

        Hu mbaok tame tal pato ragu ragam di urang Cam di xa Hàm Trí, huyen Hàm Thuận Bắc daok hu ong Mã Châu Sa, sa nghe nhan urang daok di palei Lâm Giang, xa Hàm Trí.

        Ong Sa brei thau, dahlau daih kayua kein lagaih raidiuk daok kan kandah, nan ong klak tapa sa gah hatai anit ranam saong suh sah di drei dalam bruk khik ramik ilamo halau agha bangsa.

        Tuk baoh sang hu mbang hu ngui, anek bik hu bruk ngak mbang tani tanat, ong mai gilac haong hatai anit ranam saong suh sah di drei, nan lac bruk ngak pamedeih, khik ramik saong patagok yaom kaom ilamo di bangsa drei.

        Oh lac tok thau taong Ginang, pah Baraneng bo ong daok ngak dom janih ragam ragu ini. Bruk njauk ndom pak di ini, dom yau ginang ong ngak tabiak tok piah duh ka bruk pato saong alin hadiah ka palei Cam tuk hu hatai khin caong.

"Ilamo bangsa drei ngak habar bo klak hu. Karja brei kein lagaih peih tal piah ka drei hu mbaok tame pato ka anek kamuan urang Cam di palei Lâm Giang, xa Hàm Trí, meng nan bo rairah sit thun umo thau dom janih ragam ragu di bangsa drei nan lac Ginang, Saranai, Baraneng."

        Tal pato bac megru ragam ragu bangsa di urang Cam di xa Hàm Trí, huyen Hàm Thuận Bắc lac sa dalam 6 tal pato kayua Gilang khik drap ar tinh Bình Thuận peih ngak dalam thun 2024, daok dalam Danak dak “Khik ramik, patagok yaom kaom ilamo siam gheih di dom bangsa takik pagam haong patagok gah jirah rivang” daok dalam Danak dak pakat negar patagok kinh te – xa hoi bhum mikva bangsa takik saong bhum ceik tukvak 2021- 2030.

        Ong Đoàn Văn Thuận, Yam ndok Gilang khik drap ar tinh Bình Thuận brei thau: Ragam ragu di urang Cam iau lac sa bruk biak kan si pato, dom urang hu mbaok tame bac brei hu hadah krah dahlau ka ragam ragu ngan haong bruk ini. Saong dom urang yau ye ong Lâm Tấn Bình atau ye ong Mã Châu Sa yau ye “drap ar diuk”, daong khik ramik nghe thuat ilamu sini bhap bini bangsa Cam:

"Maong veik mboh lac, dom nghe nhan, dom adei sa-ai thau ka bruk pato nan saong dom urang mai bac jeng biak chreih sambai hu mbaok tame bac megru, jeng caik veik bruk siam gheih ngan haong mikva, daong khik ramik ilamo siam gheih di bangsa drei. Kol drei brei kham merat ngak yau habar piah pagam pambuak saong dom thun anak tal hu dom tal ka njauk."

        Ngan haong bruk ba abih hatai jai tung tian, ong Lâm Tấn Bình saong ong Mã Châu Sa hu rilo bruk rik daong ka danak dak ilamo nghe thuat seni ilamu di bangsa Cam dalam luac sa tukvak atah. Bruk khik ramik saong pato drap ar ilamo di yaok bangsa daong ka drap ar nan miat miat daok diuk haong rairah./.