Hu labaih 500 ribau urang diukrai saong ngak bruk di 22 quan, huyen saong ban Thu Duc, meblah labaih 5% taong abih bhap bini dalam Banraya, bhap bini dom bangsa takik di Ban raya HCM hu raidiuk tani tanat, sahanang hatai ngak mbang duah jien saong padang mbang ngui. Mikva jia hatai tame bruk tacei ba di Đảng, dak harei hu ba drei tame haong bruk patagok di Ban raya.

Meng raidiuk mbang ngui, bruk ngak mbang kinh te - xa hoi di bol bhap dom bangsa takik dalam Ban, Ban raya hu ba tabiak ralo jalan ngak, tacei pato peih ngak siam sarak karei daong bhap bini, lagaih haong bruk patagok taong abih gah  ka bhap bini.

Anai gru Hoàng Thị Lê bangsa Tày, daok quận Bình Tân, sang daok di Cao Bằng mai TPHCM padang 7 thun tapa khan lac: “Dom urang jakar yaok pakat sangka daong urang bangsa takik biak tani tanat, adei biak bui sambai saong hadah mbaok meta ka taneh ia drei, hu biak ralo bangsa saong thau jum pataom anit ranam saong daong ba gauk. Urang bangsa Tày di palei adei raidiuk kan kandah, caong khin karja sangka daong hu ginup jang tal urang bangsa takik, piah dom anek saih  hu nao bac, atau hu sarak cambaic laic ka bac ndai hoc, piah raidiuk di yaok urang hu siam jang saong taneh ia dak harei dak patagok”.

Ban raya HCM lac sa dalam dom ban nao dahlau dalam bruk sangka kuhria bruk bac da-a ka anek bangsa takik. Meng thun bac 2019-2020 tal thun bac 2023-2024, Ban raya hu sarak bac oh mek jien ngan haong anek saih bangsa Khmer, bangsa Cam meng pakat mau giao tal THPT di dom sang bac karja. Langiu di nan, daok hu sarak daong jien bac ka anek saih đại học bangsa takik lac urang dalam sarak baoh sang kathaot, jaik kathaot.

Ngan haong jalan sahaneng “bol bhap dom bangsa takik sumu yau gauk, jum pataom, sami samar, dak padang saong patagok Ban raya HCM ilamo, salih birau, anit ranam”, muk Phùng Kim Phụng, bangsa Lo - Akok Mban mat tran KP 6, Q11 sahaneng mboh hadah mbaok meta saong hatai caong takre. Yaom lac raidiuk daok rilo kan kandah, min muk jia hatai tame jalan tacei ba di Ndang lac labik pambak tame  jalan sahaneng  kajap ngan haong urang bangsa dalam nan hu urang bangsa Lo. Urang jia lac, dom sarak  njauk meda peih tabiak jalan ngak mbang birau cakrok patagok, trei sir saong haniam siam ka abih urang.  

“ Dalam tukvak tapa, ngan haong urang bangsa Hoa ye sarak ka bruk tani tanat raidiuk biak bruk sangka kuhria ralo, brei harak BHYT, daong brei pandap pandar  piah ngak mabng ka urang kathaot yam tapa tanut kathaot, tani tanat raidiuk. Tuk pathau khan ye hu sap Lo gam sap Viet piah bhap bini hu thau cambaic laic jang, daong ngak siam.”

Dom thun jaik ini, bruk khik ramik, patagok adat tanarakun siam gheih meh kan dahlau, drap ar ilamo; bruk khik ramik  sap ndem panuac pauac, akhar vak, khan ao ngui cuh, adat cambat, roya tet di dom bangsa takik hu sangka kuhria daong. Anak bruk kan kandah di dunya, bhap bini dom bangsa daok kham merat khik panuac ndem meyai, khan ao ngui cuh saong adat cambat siam gheih  meng kan dahlau. Rilo mikva caong khin hu lagaih piah patagok dom labik parang ilamo bhap bini, sang bac pato sap bangsa. Saai Trịnh Thị Mỹ Lệ, bangsa Khmer khan lac: “ Adei caong khin bruk sangka kuhria ka raidiuk bhap bini bangsa Khmer, jeng yau dom bangsa adei sa-ai karei hu rilo mbuan lagaih piah patagok jang. Bruk praong abih lac labik ngak bruk, duah bruk ngak sahanang jang; hu rilo sarak daong urang taha umo, dam dara lahik bruk ngak…"

Tui UBMT negar TPHCM, yaom lac raidiuk urang bangsa takik hu ralo salih birau, min dom baoh sang daok gaok ralo kan kandah dalam bruk taduan dom jitvu daong ka raidiuk, bruk bac da-a saong iek ruak y te. Yau nan min, bhap bini dom bangsa takik,  abih di nyu nan lac dom rairah dam dara brei mboh bruk ngak di drei piah daong tame bruk cakrok patagok khang kajap di Ban raya HCM dalam jaman birau – jaman uak drei patagok di bangsa. Ayut Triệu Chí Phong, bangsa Lo, sang bac  Ndai hoc Khoa học Xã hội Nhân văn TP.HCM sahaneng yau ini: “ Lac rairah dama dara bo abih di nyu lac sinh vien, adei caong takre Banraya hu rilo sarak daong ka dam dara bangsa takik padang mbang ngui hadei bac tamat đại học. Adei sahaneng  bruk cuang kandah di ayut lac phun jien, njauk brei hu ilamo, bruk thau ba ilamo tame pandar tuk hu tame start-up kapol padang bruk ngak mbang birau halei nan, saong duah thau ka ilamo kong nghe, abih di nyu lac pambuak tal AI”

Ban raya HCM lac ndo thi biak gheih biak karei, oh parabha lahik urang bangsa takik, oh hu dom xã biak kan kandah, oh daok baoh sang kathaot saong jaik kathaot hu jien mek tame tui tanut kathaot di negar, min bruk patrun kathaot kajap karo ngan haong urang kathaot, jaik kathaot lac urang bangsa takik tuk halei jeng hu Thành ủy, UBND Ban raya sangka, tacei pato cati catang saong peih ngak hu jak jeng siam mekre. Abih di nyu, Ban raya peih ngak siam sumu gauk rilo jalan patagok kinh te - xa hoi piah patagok kien lagaih, hu phun jien, pambuak urang ngak mbang pablei salih dalam bhap bini pambuak haong bruk cakrok patagok kinh te di Ban raya HCM. Meng nan rik tame paglong raidiuk, jalan sahaneng di urang bangsa takik, khik kajap bruk tani tanat raidiuk chinh tri dalam Ban raya./.