Palei Cavait, sa baoh palei Cam daok di xa Phú Lạc, huyen Tuy Phong, tinh Binh Thuan, thei thei jang thau tal diuk pasang hu hatai anit ranam ilamo bangsa Cam. Urang hu angan ong Chế Quốc Minh saong amuk Qua Thị Hồng Loan.

Meng dahlau ong Minh muk Loan ieu lac sa urang jakar gah y te tuk halei jang gam haong bruk ngak biak jal val, min diuk pasang ong Minh saong amuk Loan tuk halei jeng caik tukvak brei ka bruk duan duah pataom dom ragam ragu bhap bini bangsa Cam meng jaman dalau. Dalam dom harei adat praong sit di bol bhap urang bangsa Cam dalam palei, ong Minh amuk Loan jeng cih vak biak tani tanat dom kadha adaoh, dom ragam tamia saong dom ragam ragu adaoh bhap bini di dom halau janeing adaoh. Diuk pasang ong Minh pataom veik, pasram adaoh blaoh pato veik ka rai uranaih dam dara dom ragam ragu adaoh bhap bini, dom ragam tamia tadik bhap bini di urang bangsa Cam.

Thei hu tukvak mai tal bhum palei Cam palei Cavait, xa Phú Lạc dalam harei adat ye pang hu dom ragam ragu adaoh bhap bini Cam biak yamen taphia bimong kalan Po Dam.

Dalam harei Kate di palei, ong Minh dang tabiak jak ba dom urang ngak phol rik prein jien peih danak dak pakacah ndua ia, tamia tadik, taong Ginang, yuk Saranai… ngak jeng bruk bui sambai saong hu bruk me-in ma-eic siam mekre ka dom dam dara uranaih dalam palei.

Ong Minh sahaneng lac, haong jaman lek taka so urak ini, rairah uranaih dam dara mbuan si var tal ilamo halau agha di bangsa, meyah khol drei oh hu bruk ngak lagaih:

"Diuk pasang dahlak tuk halei jeng sahaneng ngak habar piah khik ramik hu ilamo di bangsa drei. Saong dalam darah drei jeng hu dahlau hatai anit ranam meng ragam ragu adaoh bhap bini bangsa Cam, tal bruk taong hagar Ginang, Baraneng, blaoh tamia Cam saong dom adat dalam dom harei adat di urang Cam. Saong tuk ngak bruk ini hulin dahlak mboh bian uan tabuan, blaoh tal mikva palei pala”.

Daok haong baoh sang di sa-ai Nguyễn Văn Luận saong sa-ai kamei Đạo Thị Bích Lan daok di ban Phan Thiết, tinh Binh Thuan, yaom mada lac daok di dalam labik ban hu rilo urang menuac, min dua diuk pasang umur daok sit thun urang Cam ini jeng caik tukvak piah ba hatai sangka tal dom yaom kaom ka ilamu bangsa drei.

Dom harei puac abih dalam adit, dalam sang diuk pasang sa-ai Luận, sa-ai Lan (labik 6A-7A, Nguyễn Thị Định, phuong Phú Tài, Ban Phan Thiết) tuk halei jeng danei sap Saranai saong sap catang cadu di ragam pah paoh Baraneng tui dom ragam ragu adaoh bhap bini Cam.

Sa-ai Nguyễn Văn Luận brei thau, thun halei jeng yau nan, tal harei Kate, sang sa-ai haong dom yut cuai bhian tagok bimong Po Sah Ine daok di phuong Phú Hài, Ban Phan Thiết, gam piah duh Po Yang, likau phol ka baoh sang gam pahadar veik dom yaom kaom ilamu meng kal di urang bangsa Cam, abih di nyu nan lac bruk me-in dom janih ragu ragam bhap bini:

"Ong pajeing dahlak (ame pajeing ame sa-ai - PV) hu caik gilac dom janih ragu ragam, hu ginup abih, min dom anek di ong oh hu thei thau me-in. Tuk praong tagok, dahlak mboh palai nan likau veik saong eng duah bac jalan taong Ginang, Baraneng, yuk Saranai. Tal urak ini, dahlak thau me-in abih ragu ragam ini. Saong jeng mboh ini lac sa bruk piah dui pachreih ka dom anek bhik dahlak duah tal nyu”.

Raidiuk urak ini hu rilo bruk piah sangka ngak ka rilo urang var ilamo di mukkei. Gam haong nan, dom uranaih urang bangsa Cam urak ini jeng oh “mbak tarak” haong ilamo bangsa di drei. Kayua yau nan ye dom bruk ngak lagaih di diuk pasang ong Minh, amuk Loan di palei Cavait, xa Phú Lạc, huyen Tuy Phong saong bruk di diuk pasang sa-ai Luận, sa-ai Lan di Ban Phan Thiet, tinh Binh Thuan biak njauk iek glaong.

Ong Huỳnh Tấn Sinh, Akaok UB Bhap bini xa Phú Lạc, huyen Tuy Phong, brei thau:

"Ngan haong diuk pasang di nai Loan haong cei Minh ini ndom lac biak hu tung hu tian haong dom bruk bol bhap rahra dalam palei. Abih di nyu nan lac adat cambat di urang Cam. Cei Minh takik rilo jeng thau ka ilamo Cam saong dang tabiak pato ka dom dam dara taong Ginang, yuk saranai. Daok nai Loan jeng yau nan, taphia nan nai daok jak ba urang dalam but pajaih nhak njauk jalan di Ndang, sarak di Karja, dalam nan hu adat di palei Cam”.

Daok sa-ai Huỳnh Đình Phú, sa rahra daok jaik sang sa-ai Luận daok di Ban Phan Thiết ndom lac:

"Po sang lac sa urang ngak bruk cih plang sang nan bruk sang danaok gheih lac bruk bhian. Tame sang ka meng mboh bruk ngak thaik thaot sang di po sang. Meda oh lac sa drei hulin dahlak bo thei jeng yau nan. Daok bilik tuai ye sa-ai ngak biak gheih, biak siam, dom ragu ragam bhap bini, dom gait hu pambuak tal ilamo Cam ye sa-ai jeng daok khik hu, me-in ragu ragam jeng biak gheih, dahlak mboh bruk nan biak siam, njauk iek praong. Khik hu ilamo di bangsa drei yaom lac sa-ai daok di dalam Ban Phan Thiết”.

Baoh sang di ong Chế Quốc Minh di palei Cavait, xa Phú Lạc, huyen Tuy Phong saong baoh sang sa-ai Nguyễn Văn Luận daok di ban Phan Thiết, tinh Binh Thuan daok daong pambak tabiak dom yaom kaom ilamo Cam tal bol bhap. Dom urang Cham ini tuk halei jeng kham merat duan duah tak pataom, khik piah, khik ramik ilamo urang bangsa Cam, tapa ngak medeih hatai anit ranam, hatai hadah mbaok ka dom yaom kaom ilamo siam gheih di bangsa Cham drei./.