Tuk hajan dalam glai khaong blaoh, bingu dã quỳ kanyik rak chroh bak dom mbuan ceik, jeng lac tuk yuak paik blaoh blai saong tukvak “Mbang thun menyum bilan - hoă blăm mnăm thun”, atau lac “bilan padeih padei - khai ning nơng” jeng mai tal haong grauk baoh sang.

Kayua hu rilo bangsa diukrai nan sambo bar raya Tet di Tay Nguyen jeng yau nan bo hu biak rilo. Langiu di Tet Nguyen dan di bangsa Yuan, dom bangsa di Tay Nguyen daok hu dom Tet yau ye” Tet lisei bahrau, Tet padang sang ka urang metai, Tet Padai, Tet Ia, Tet Apui…Ini lac dom harei raya chreih chrai, bui sambai abih dalam thun.

Tet apui saong Tet Ia lac adat di bangsa Sê Đăng (daok rilo di tinh Kon Tum)

Dalam adat cambat Urang Sê Đăng, hu dua Po Yang hu makna abih lac Yang Ia saong Yang Apui. Nan lac dua Po Yang di bruk pala drak saong bruk diukrai. Tet Apui biak nao lac Tet Lisei bahrau, uan tabuan ka bilan yuak paik bahrau. Tet Ia lac adat paling ka Yang Ia bhian hu peih ngak dalam bilan 3 saka ia harei. Hadei bilan yuak paik, urang ngak pasiam dom tanang ia, uak rao tathak dom pandap padang ia, hadei nan ngak adat “ieu yang ka tanang” dalam yaok baoh sang saong dalam mbon palei. Mikva daok ba gaok, jeik, baoh ploi thu tabiak mek ia bahrau, da-a ong gru mai ieu yang, blaoh pataom gauk mbang huak, menyum ia tapai, taong paoh kong caing, adaoh tamia gam gam rilo harei

Tet padang sang ka urang metai lac Tet di urang Jrai, daok rilo di tinh Gia Lai

Adat Padang sang ka urang metai di urang Jrai dreih yau adat nao ghur di bangsa Yuan, lac bruk ieu mukkei, pahadar, pasiam pahacih sa-at ghur dom urang plang lahik. Dalam dom harei Tet Nao ghur, mikva dalam mbon dui gauk nao tal yaok baoh sang piah daong ngak bui sambai. Tuk adat Nao ghur hu peih ngak, dalam ghur danei yava kong caing, thanh la, hagar. Grauk urang dui gauk mai tal dom sang ghur, tangin pan truai daok khuah apui. Anak sang ghur, urang klauk sa phun nêu tual meng dom hala gun hijao bhong, ong gru ieu yang atau po sang kamaon saong langkar Yang, caong ka binguk yava urang plang lahik mai me-in haong dom urang dalam baoh sang daok diukrai. Di labik sang ghur, peih caih alak tapai, cuh apui mbang menyum, kong caing, adaoh tamia, me-in luac kreh malam bram paguh.

Bangsa S’tiêng hu Tet uan padai bahrau.

Harei Tet Uan padai bahrau, sang halei jeng blei khan bahrau, ao bahrau ka dam dara. Urang kamei thei jeng cuk abih kaong nyuk bo drei hu piah parang haong dom urang dalam mbon. Dom baoh sang jeng hu yaok pluh caih alak tapai saong jeng thik ralow kabao, limo, pabui piah payak mikva mbon palei.

Dalam Tet uan padai bahrau, mbon palei peih harei klauk kabao, taong kong caing adaoh tamia biak bui sambai. Urang Stieng hu adat harei Tet uan padai bahrau lac mek talei phun la-a saong jan brai blaoh srau haong haluk, blaoh luk tagok rup yaok urang piah kakei anek taco lac meng kal mai urang menuac hu pajeng tabiak tok hu rilov bo oh hu talang. Tet uan padai bahrau di bangsa Stieng dui atah dua klau harei.

Bangsa K’ho di Tay Nguyen hu Tet Nholir-bông

Tet Nholir-bông jeng lac sa Tet uan padai bahrau, lisei bahrau min oh rah tabiak di dua, klau harei yau dom bangsa karei oh dui atah sa bilan, lac sa bilan padeih padei hadei mbang yuak paik. Dahlau tuk rah tabiak Tet Nholir-bông, mikva peih ngak Adat ieu yang angin, likau ka angin di papuk pakak, likau ka angin khang piah badai bahrau biak hacih sa-at. Dalam Tet Nholir-bông, sang thei jeng ngak rilow kabao, limo, pabui, menuk, mek darah menup luk tagok kaya padang padai, dom pambang praong, pambang tho. Srau darah menuk haong akaok kanyik, anek maok taneh, kanduh phun kayau taha, phun ralaoh thaok klik, blaoh luk tagok tada, tagok dhei di dom urang dalam baoh sang, luk tagok dom kaya dalam sang haong makna lac likau patuah jamo, klak dom bruk jhak. Dalam bilan Tet dalam mbon palei thei jeng nao meng sang ini tal sang daih mbang menyum, tadhau ayuh gauk, adaoh tamia biak bui sambai.

Harei ini, ngan haong bruk salih pajaih phun pala meng pala padai apuh tapa pala phun kong nghiep suai harei atau phun padai ia, dom adat meng kal pagam haong saka ngak nong atau rairah jeng biak takik.

Gam haong nan bruk maluk ilamo di urang meng rilo bhum mai tal tay Nguyen, bruk sangka di karja dom pakat, mikva dom bangsa takik di Tay Nguyen jeng hu mbang tui adat “mbang tet” Nguyen dan di bangsa Yuan.

Srap gap raok Tet, mikva rami ramik, pasiam hacih sa-at sang danaok. Baoh sang halei jeng blei khan ao bahrau ka uranaih, papaok tapei nung, tanek ndiuk meng brah pahe bahrau, srap gap dahlau dom drei menuk, gaok mai dom drei pabui hu raong dahlau meng dom bilan blaoh, blei dom janih mứt, ahar keo, mbia, ia yamen piah daok gilac haong baoh sang, padeih padei pataom gauk dom harei haong dom anek bhik nao ngak pak atah mai sang. Oh lac tok dalam baoh sang, yut cuai, bo karja, kapul nyaom dalam palei jeng hu rivang tangi, alin hadiah pandap kaya ka mikva, ngak jeng sa bruk bui sambai, trei sir, gheih ghang.

Yaom lac oh hu rilo, dui pachreih yau dom adat bhap bini meng kal, min bruk bui sambai dalam harei Tet Nguyen dan di Tay Nguyen jeng biak chreih chrai saong trei sir. Sambo bar Tet di Tay Nguyen jeng yau nan bo hu rilo jang./.