Tui urang bangsa Thai di Mường Lò, ban sit Nghĩa Lộ, tinh Yên Bái, meng kal, jaik tal tukvak si tapa thun bahrau ye Chẩu Mường brei taong hagar, taong caing brei thau blaoh tal sap caing sap hagar di palei, meyah palei halei taong caing taong hagar dahlau ye njauk taong bhat.

Urang bangsa Thai ndom mayai lac melam jaik tapa thun bahrau ieu lac tuk vak piah brei mboh hatai thau phol thau dhar ngan haong yang mebang haong mukkei. Dalam harei duh mukkei di melam jaik tapa thun bahrau, meyah urang Kinh brei hu ralow menuk ye urang bangsa Thai brei hu ralow pabui (meyah pabui sit caik tamo drei, meyah pabui praong ye brei caik akaok, iku saong takai). Urang bangsa Thai yeng cuh galau nyang klauk di dom gah di baoh sang piah thau phol yang mebang 4 gah hu pacang khik, pajak pajeng ka baoh sang dalam thun klak… Ong Lò Văn Chiến, xa Nghĩa An, ban sit Nghĩa Lộ brei thau:

"Tapa sa thun drei ngak mbang duah jien, hu thun mek hu rilo jak jeng, hu thun ye jeng gaok rilo kan kandah min bo tal Tet ye drei jeng kuhria iek veik taong abih thun klak piah mek ilamo ka thun bahrau brei ngak mbang yau habar ka hu lagaih jang. Tui panuac ieu yang di dom ong gru ye langkar mukkei pajak pajeng ka anek taco ngak mbang, jhul dom bruk jhak nao, raok dom bruk patuah jamo, bruk bahrau mai ka baoh sang drei”.

Urang bangsa Thai hu adat mek ia dalam melam jaik jao tapa thun bahrau. Dahlau jaik si tapa thun bahrau dom minit, dom urang praong thun urang taha dalam baoh sang atau urang dam dara tabiak akaok halau mek ia haong sahaneng lac caong khin ba mai sang haong rilo patuah jamo jien padai saong sa thun bahrau kein lagaih, siam mekre.

Harei 1 bingun Tet, tui adat di urang bangsa Thai ye ini lac harei “Tet mukkei”. Ong Tòng Văn Xôm, urang thau tani tanat ka adat cambat, ilamo Thai di palei Mòng, xa Hua La, ban Sơn La, tinh Sơn La brei thau ka hatai sahaneng di mikva: Thun bahrau mai lac abih thun klak, kayua yau nan ye dom bruk jhak tachauk, kurang patuah jamo, kathaot rambah… brei jhul nao tui thun klak, caong khin raok salam sa thun bahrau hu rilo prein yava, patuah jamo, gheih ghang siam mekre, jak jeng, haniem phol selamat:

“Bruk pok sap tadhau ayuh tet thun bahrau, abih di nyu nan lac harei 1 Tet, peih akaok meti ka harei bahrau, bilan bahrau, thun bahrau biak hu makna praong glaong ka yang mebang mukkei. Saong po sang tuk halei jeng caong khin urang akaok meti mai ayuh sang lac sa urang khang kadang, baoh sang siam mekre, haniem phol, jien padai dalam sang meda gap mbiah, anek bik thau pang thau puac, bac megru naih joi. Kayua thei jeng sahaneng lac, urang mai ayuh brei pok sap selamat yau habar ye baoh sang drei mek hu phol dhar yau nan”.

Harei 2 Tet, rahra meng nao tal sang gauk me-in. Bhian ye yaok baoh sang brei sa urang lambaok piah nao tui sa kapul, nao tal yaok baoh sang dalam palei piah tadhau ayuh raya Tet, sang thei jeng srap gap rilo pandap mbang piah payak tuai damuai. Thei mai tal sang jeng menyum sa hasit alak, brei mboh hatai iek praong di tuai damuai haong po sang saong cagar veik. Meng harei bingun 3 raya Tet ba nao, dom palei meng peih ngak dom harei brui me-in bal pataih akaok thun barau.

Hadei di harei Tet, meng harei 10 tal harei 15 saka ia bulan, dom xa, phuong jeng peih harei “Po Rami bilan Sa”… Patui di nan lac dom mbang pakacah tamia xoè;  me-in “Hạn Khuống”, dui pachreih biak rilo mikva palei pala hu mbaok tame. Sa-ai  Lò Thị Trang daok di phuong Tân An, ban sit xa Nghĩa Lộ, tinh Yên Bái brei thau:

 "Drei biak mboh hadah mbaok ka ilamo bangsa Thai saong raidiuk daok dang yaok harei di bangsa drei. Drei thau lac brei khik ramik saong paglaong dom ilamo bangsa ini piah yaih khan hu tal tuai damuai jaik atah mai tal Mường Lò - Nghĩa Lộ”.

Ndom ka pandap mbang, dalam harei Tet, urang bangsa Thai ngak rilo pandap mbang meng ralow pabui, dom pandap ndiuk, dom janih ahar saong ralow menuk. Daok dom pandap piah duh mukkei yang mebang ye oh brei ngak meng ikan, ralow klauk gai oh brei pandam haong mesin hadang. Dalam salao nan tuk halei jeng hu ndiuk lime sambo bar, tung lo mo saong ralow am meng thak… Sa-ai kamei Lò Thị Thúy daok di xa Nghĩa Lợi, ban sit Nghĩa Lộ brei thau:

 "Ralow tuel di ging ye tui yaok bruk srau amraik sara reing nyu brei tabiak rilo pahe bingi karei di gauk. Yaok baoh sang urang Thai thei thei jeng hu bruk ngak ralow tuel ging. Pandap ralow tuel ging bingi jeng ngak ka salao harei Tet biak mbuan hadar”.

Di grauk palei pak mường mala, sap hagar, sap caing danei yava gam haong ragam ragu Thái biak sameng grauk ceik glai Tay Bac salam raok bal pataih masa akaok thun. Nao me-in bal pataih di bhum taneh Tay Bac gheih ghang ini, tuai damuai hu duah thau dom ilamo siam gheih karei di urang bangsa Thai pak ini./.